ରାୟପୁର: ଛତିଶଗଡ଼ ସରକାର ରାଜ୍ୟର ଆଖୁ ଚାଷୀମାନଙ୍କୁ ଏକ ବଡ଼ ଆଶ୍ୱସ୍ତି ପ୍ରଦାନ କରିଛନ୍ତି। ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏ ଆଖୁର କ୍ରୟମୂଲ୍ୟରେ ବୃଦ୍ଧି କରିଛନ୍ତି। ପୂର୍ବରୁ କ୍ୱିଣ୍ଟାଲପିଚ୍ଛା ୩୫୫ ଟଙ୍କା ରହିଥିବା ଏହି ମୂଲ୍ୟକୁ ବୃଦ୍ଧି କରି ସିଧାସଳଖ ୪୨୫ ଟଙ୍କା କରାଯାଇଛି। ‘ଭାରତୀୟ କିଷାନ ୟୁନିୟନ’ (BKU)ର ଏକ ପ୍ରତିନିଧିମଣ୍ଡଳୀ ମୁଖ୍ୟମନ୍ତ୍ରୀଙ୍କୁ ଭେଟି ଆଲୋଚନା କରିବା ପରେ ଏହି ନିଷ୍ପତ୍ତି ନିଆଯାଇଛି ବୋଲି ସରକାରୀ ସୂତ୍ରରୁ ଜଣାପଡ଼ିଛି। କୃଷକମାନଙ୍କୁ ସେମାନଙ୍କ କୃଷି ଉତ୍ପାଦର ଉଚିତ୍ ଏବଂ ଭଲ ମୂଲ୍ୟ ଯୋଗାଇ ଦେବା ଏବଂ କୃଷିକୁ ଏକ ସମ୍ମାନଜନକ ତଥା ଲାଭଦାୟକ ଜୀବିକାରେ ପରିଣତ କରିବା ହିଁ ଏହି ନିଷ୍ପତ୍ତିର ମୂଳ ଲକ୍ଷ୍ୟ ବୋଲି ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏ କହିଛନ୍ତି।
ରାଜ୍ୟର ସମସ୍ତ ଚିନି କଳଗୁଡ଼ିକୁ ଚାଷୀଙ୍କଠାରୁ ନୂତନ ଦର ଅର୍ଥାତ୍ କ୍ୱିଣ୍ଟାଲପିଚ୍ଛା ୪୨୫ ଟଙ୍କାରେ ଆଖୁ କ୍ରୟ କରିବା ପାଇଁ କଡ଼ା ନିର୍ଦ୍ଦେଶ ଦିଆଯାଇଛି। ଏହି ବର୍ଦ୍ଧିତ ମୂଲ୍ୟ ଚଳିତ ୨୦୨୫-୨୬ କ୍ରସିଂ ସିଜିନ୍ (ପେଡ଼ାଇବା ଋତୁ) ଠାରୁ କାର୍ଯ୍ୟକାରୀ ହେବ। ବର୍ତ୍ତମାନ ଛତିଶଗଡ଼ରେ ମୋଟ ୪ଟି ସମବାୟ ଚିନି କଳ କାର୍ଯ୍ୟ କରୁଛି। ରାଜ୍ୟରେ ପ୍ରତିବର୍ଷ ପ୍ରାୟ ୧୮.୬ ଲକ୍ଷରୁ ୨୦.୪ ଲକ୍ଷ ଟନ୍ ଆଖୁ ଉତ୍ପାଦିତ ହୋଇଥାଏ, ଯାହାଦ୍ୱାରା ରାଜ୍ୟର ବହୁସଂଖ୍ୟକ ଆଖୁ ଚାଷୀ ଏହି ନୂତନ ନିଷ୍ପତ୍ତି ଦ୍ୱାରା ସିଧାସଳଖ ଉପକୃତ ହେବେ।