ନୂଆଦିଲ୍ଲୀ: ପୁଡୁଚେରୀରେ ଖେଳାଯାଇଥିବା ତୃତୀୟ ଦିନିକିଆରେ ଭାରତ ଅଷ୍ଟ୍ରେଲିଆକୁ ୪୯ ରନରେ ପରାସ୍ତ କରିଛି। ପରାଜୟ ସତ୍ତ୍ୱେ ଅଷ୍ଟ୍ରେଲିଆ ୨-୧ରେ ସିରିଜ ଜିତିଛି। କାରଣ ଅଷ୍ଟ୍ରେଲିଆ ପ୍ରଥମ ଦୁଇଟି ଦିନିକିଆ ଜିତିଥିଲା। ଏହି ସିରିଜ୍ ଭାରତ ଏ ଏବଂ ଅଷ୍ଟ୍ରେଲିଆ ଏ ମଧ୍ୟରେ ଖେଳାଯାଇଥିଲା।
ତୃତୀୟ ଅଣଆନୁଷ୍ଠାନିକ ଦିନିକିଆରେ ଭାରତ ଏ ୪୭.୩ ଓଭରରେ ୨୭୫ ରନରେ ଅଲଆଉଟ୍ ହୋଇଯାଇଥିଲା। ଭାରତ ଏ ପାଇଁ ପ୍ରିୟାଂଶ ଆର୍ଯ୍ୟ ୪୫ ବଲରୁ ୪୯, ପ୍ରଭସିମରନ ସିଂହ ୩୪ ବଲରୁ ୩୯, ଅଧିନାୟକ ଋତୁରାଜ ଗାୟକୱାଡ ୩୩ ଏବଂ ଶେଷରେ ସୂର୍ଯ୍ୟାଂଶ ଶେଡଗେ ୬୦ ବଲରୁ ୬୬ ଏବଂ ନିପ୍ରଜ ନିଗମ ୪୪ ବଲରୁ ୪୦ ରନ କରିଥିଲେ।
୨୭୬ ରନର ପିଛା କରି ଅଷ୍ଟ୍ରେଲିଆ ୨୭ତମ ଓଭରରେ ୨ ୱିକେଟ ହରାଇ ୧୪୦ ରନ କରିଥିଲା। ମନେ ହେଉଥିଲା ଯେ, ସେମାନେ କ୍ଲିନ୍ ସୁଇପ୍ କରିବେ। କିନ୍ତୁ ଭାରତୀୟ ବୋଲରମାନେ ମ୍ୟାଚ୍ ଓଲଟାଇ ଦେଇଥିଲେ। ଅଷ୍ଟ୍ରେଲିଆକୁ ୪୬.୨ ଓଭରରେ ୨୨୬ ରନ୍ ରେ ଅଲଆଉଟ୍ କରି ଦେଇଥିଲେ। ଭାରତ ୪୯ ରନ୍ ରେ ବିଜୟୀ ହୋଇଥିଲା।
ଜୋଶ୍ ଫିଲିପ୍ସ ଏବଂ ଲିଆମ୍ ସ୍କଟ୍ ଅଷ୍ଟ୍ରେଲିଆ ପାଇଁ ମଜବୁତ ଆରମ୍ଭ ଦେଇଥିଲେ। ସେମାନେ ପ୍ରଥମ ୱିକେଟ୍ ପାଇଁ ୮୨ ରନ୍ ର ପ୍ରାରମ୍ଭିକ ଭାଗୀଦାରି କରିଥିଲେ। ସ୍କଟ୍ ୨୬ ରନ୍ କରି ଆଉଟ୍ ହୋଇଥିଲେ, ଯେତେବେଳେ ଫିଲିପ୍ସ ୪୮ ବଲ୍ ରେ ୫୬ ରନ୍ କରିଥିଲେ। ତା’ପରେ ଲାଚଲାନ୍ ଶ’ ୩୧ ରନ୍ କରି ବିଦାୟ ନେଇଥିଲେ। ନାଥନ୍ ମ୍ୟାକସ୍ୱିନି ୫୮ ବଲ୍ ରେ ୩୯ ରନ୍ କରିଥିଲେ।
ନିଖିଲ ଚୌଧୁରୀ ୨୯ ରନ୍ କରି ରନ ଆଉଟ୍ ହୋଇଥିଲେ। ମିଚେଲ୍ ଓୱେନ୍ ୨୦ ରନ୍ କରି ଗୁର୍ଜପନୀତ ସିଂହଙ୍କ ଦ୍ୱାରା ଆଉଟ୍ ହୋଇଥିଲେ। ୱିଲ୍ ସଦରଲାଣ୍ଡ ୭ ରନ୍, ବେନ୍ ଦ୍ୱାରଶୁଇସ୍ ୫ ରନ୍ ଏବଂ ଟଡ୍ ମର୍ଫି ୬ ରନ୍ କରିଥିଲେ।
ଅଷ୍ଟ୍ରେଲିଆ ଗୋଟିଏ ସମୟରେ ୧୭୭ ରନ୍ ରେ ୩ ୱିକେଟ୍ ହରାଇ ଏକ ଦୃଢ଼ ସ୍ଥିତିରେ ଦେଖାଯାଉଥିଲା, କିନ୍ତୁ ସେମାନେ ପରବର୍ତ୍ତୀ ୭ ୱିକେଟ୍ ମାତ୍ର ୪୯ ରନ୍ ରେ ହରାଇ ଦେଇଥିଲେ। ଭାରତ ପକ୍ଷରୁ ଯଶ ଠାକୁର ଏବଂ ନିଶାନ୍ତ ସିନ୍ଧୁ ଦୁଇଟି ଲେଖାଏଁ ୱିକେଟ୍ ନେଇଥିବା ବେଳେ ଗୁରଜପନୀତ ସିଂହ ୫୬ ରନ୍ ଦେଇ ୩ଟି ୱିକେଟ୍ ନେଇଥିଲେ।