ଭୁବନେଶ୍ୱର: ଓଡ଼ିଆ ସାହିତ୍ୟ, ଆଧ୍ୟାତ୍ମିକ ଚେତନା ଓ ଶ୍ରୀଜଗନ୍ନାଥ ସଂସ୍କୃତିର ପ୍ରଚାର ପ୍ରସାର ଉଦ୍ଦେଶ୍ୟରେ ଓଡ଼ିଶା ସାହିତ୍ୟ ଏକାଡେମୀ ଓ ଶ୍ରୀଜଗନ୍ନାଥ ଲୀଳାକ୍ଷେତ୍ର ଟ୍ରଷ୍ଟ, କଙ୍କଣଶିଖରୀ, ଚିଲିକାଙ୍କ ମିଳିତ ଆନୁକୂଲ୍ୟରେ ୪୩ତମ ଶ୍ରୀଜଗନ୍ନାଥ କଥା ଲହରୀ ବୁଦ୍ଧ ମନ୍ଦିର ସଭାଗୃହ, ୟୁନିଟ୍-୯, ଭୁବନେଶ୍ୱରଠାରେ ଅନୁଷ୍ଠିତ ହୋଇଥିଲା। ଏଥରର ଆଲୋଚନାର ଶୀର୍ଷକ ଥିଲା ‘ପଞ୍ଚସଖା ଓ ଶ୍ରୀଜଗନ୍ନାଥ’। ଏଥିରେ ପଞ୍ଚସଖାଙ୍କ ସାହିତ୍ୟିକ ଅବଦାନ, ଆଧ୍ୟାତ୍ମିକ ଦର୍ଶନ ଓ ଓଡ଼ିଆ ସଂସ୍କୃତିରେ ସେମାନଙ୍କ ଭୂମିକା ଉପରେ ଆଲୋଚନା ହୋଇଥିଲା।
କାର୍ଯ୍ୟକ୍ରମର ପ୍ରାରମ୍ଭରେ ମହାପ୍ରଭୁ ଶ୍ରୀଜଗନ୍ନାଥଙ୍କ ଉଦ୍ଦେଶ୍ୟରେ ସମୂହ ସ୍ତୁତିଗାନ କରାଯାଇ ସଭାର ଶୁଭାରମ୍ଭ ହୋଇଥିଲା। ଏହାଦ୍ୱାରା ସମଗ୍ର ପରିବେଶ ଭକ୍ତିମୟ ଓ ଆଧ୍ୟାତ୍ମିକ ହୋଇଉଠିଥିଲା।
କାର୍ଯ୍ୟକ୍ରମର ଉଦ୍ଘାଟକ ଭାବେ ପଦ୍ମଶ୍ରୀ ଡ. ପ୍ରିୟମ୍ବଦା ହେଜମାଦୀ ମହାନ୍ତି, ଶ୍ରୀଜଗନ୍ନାଥ ଲୀଳାକ୍ଷେତ୍ର ଟ୍ରଷ୍ଟର ଟ୍ରଷ୍ଟି ଯୋଗଦେଇଥିଲେ। ସଭାର ମୁଖ୍ୟବକ୍ତା ପଣ୍ଡିତ ଚରଣ ପାର୍ଥସାରଥୀ ମହାନ୍ତି ପଞ୍ଚସଖାଙ୍କ ସାହିତ୍ୟରେ ନିହିତ ଜଗନ୍ନାଥ ତତ୍ତ୍ୱ, ଭକ୍ତି, ଜ୍ଞାନ ଓ ମାନବିକ ମୂଲ୍ୟବୋଧ ସମ୍ପର୍କରେ ଗଭୀର ଆଲୋଚନା କରିଥିଲେ।
ସେ କହିଥିଲେ ଯେ, ପଞ୍ଚସଖାଙ୍କ ସାହିତ୍ୟ ଓଡ଼ିଆ ଜାତିର ଆଧ୍ୟାତ୍ମିକ ଚେତନା ଓ ସାଂସ୍କୃତିକ ଆତ୍ମପରିଚୟର ଏକ ଅମୂଲ୍ୟ ସମ୍ପଦ। ସେମାନେ ସାଧାରଣ ଓଡ଼ିଆ ଭାଷାରେ ଗଭୀର ଦାର୍ଶନିକ ତତ୍ତ୍ୱକୁ ପ୍ରକାଶ କରି ଧର୍ମ ଓ ଜ୍ଞାନକୁ ଜନସାଧାରଣଙ୍କ ନିକଟରେ ପହଞ୍ଚାଇଥିଲେ। ଜଗନ୍ନାଥ ଦାସଙ୍କ ଓଡ଼ିଆ ଭାଗବତ ଓଡ଼ିଆ ଜନଜୀବନରେ ଭକ୍ତି, ନୀତି ଓ ଆଧ୍ୟାତ୍ମିକ ଶିକ୍ଷାର ଏକ ମହାନ ମାଧ୍ୟମ ହୋଇଛି। ବଳରାମ ଦାସଙ୍କ ଲକ୍ଷ୍ମୀ ପୁରାଣରେ ସାମାଜିକ ସମାନତା, ନାରୀର ସ୍ୱାଭିମାନ ଓ ଜାତିଭେଦ ବିରୋଧୀ ଚେତନାର ଶକ୍ତିଶାଳୀ ବାର୍ତ୍ତା ରହିଛି। ପଞ୍ଚସଖାଙ୍କ ଦର୍ଶନ ଭକ୍ତି ସହିତ ଜ୍ଞାନ, ଧର୍ମ ସହିତ ମାନବିକତା ଏବଂ ଆଧ୍ୟାତ୍ମିକତା ସହିତ ସାମାଜିକ ଦାୟିତ୍ୱର ସମନ୍ୱୟ ଶିଖାଏ ବୋଲି ସେ ମତପ୍ରକାଶ କରିଥିଲେ। ନୂତନ ପିଢ଼ିଙ୍କ ମଧ୍ୟରେ ପଞ୍ଚସଖାଙ୍କ ସାହିତ୍ୟ ଓ ଶ୍ରୀଜଗନ୍ନାଥ ତତ୍ତ୍ୱର ପ୍ରଚାର ପ୍ରସାର ଆଜିର ସମୟର ଏକ ଗୁରୁତ୍ୱପୂର୍ଣ୍ଣ ଆବଶ୍ୟକତା ବୋଲି ସେ ଉଲ୍ଲେଖ କରିଥିଲେ।
ମୁଖ୍ୟ ଅତିଥି ଡ. ଦେବେନ୍ଦ୍ରନାଥ ମାନସିଂହ ଏବଂ ସଭାମୁଖ୍ୟ ଡ. ରବିନାରାୟଣ ସାମନ୍ତ ଓଡ଼ିଆ ସାହିତ୍ୟ ଓ ଜଗନ୍ନାଥ ସଂସ୍କୃତିର ପରମ୍ପରାକୁ ନୂତନ ପିଢ଼ି ନିକଟରେ ପହଞ୍ଚାଇବାର ଆବଶ୍ୟକତା ଉପରେ ମତପ୍ରକାଶ କରିଥିଲେ। ପଣ୍ଡିତ ଦେବେନ୍ଦ୍ର ଦାଶ ମଧ୍ୟ ଆଲୋଚନାରେ ଯୋଗଦେଇଥିଲେ।
କାର୍ଯ୍ୟକ୍ରମର ଆବାହକ ତଥା ଓଡ଼ିଶା ସାହିତ୍ୟ ଏକାଡେମୀର ଉପସଚିବ ସଞ୍ଜୟ ଛୁଆଳସିଂହ ଏପରି ସାହିତ୍ୟିକ ଓ ସାଂସ୍କୃତିକ ଆୟୋଜନର ଗୁରୁତ୍ୱ ଉପରେ ମତ ରଖିଥିଲେ। ଶ୍ରୀଜଗନ୍ନାଥ କଥା ଲହରୀର ସମ୍ପାଦକ ଇଂ. ଦେବପ୍ରସାଦ ଦାଶ କାର୍ଯ୍ୟକ୍ରମର ଆୟୋଜନରେ ସହଯୋଗ କରିଥିଲେ।
ଏହି ଅବସରରେ ଶ୍ରୀମାନ ନାରଣ ବେହେରା ଓ ତାଙ୍କ ସାଥୀମାନେ ଓଡ଼ିଶୀ ସଙ୍ଗୀତ ପରିବେଷଣ କରିଥିଲେ। ସଙ୍ଗୀତ ପରିବେଷଣ ସଭାରେ ଆଧ୍ୟାତ୍ମିକ ଓ ସାଂସ୍କୃତିକ ମାଧୁର୍ଯ୍ୟ ଭରିଦେଇଥିଲା।
ସଭାର ଶେଷରେ ମହାପ୍ରଭୁ ଶ୍ରୀଜଗନ୍ନାଥଙ୍କ ସାୟନ ଆଳତି କରାଯାଇଥିଲା। ଡ. ଅଭୟ ନାୟକ ମହାପ୍ରଭୁଙ୍କୁ ବିଧିବଦ୍ଧ ଭାବେ ସ୍ୱସ୍ଥାନକୁ ବିଜେ କରାଇଥିଲେ। ଭକ୍ତି ଓ ଶ୍ରଦ୍ଧାପୂର୍ଣ୍ଣ ପରିବେଶରେ କାର୍ଯ୍ୟକ୍ରମର ପରିସମାପ୍ତି ହୋଇଥିଲା।
ଏହି ଆୟୋଜନ ପଞ୍ଚସଖାଙ୍କ ଅମୂଲ୍ୟ ସାହିତ୍ୟ ସମ୍ପଦ ଓ ଶ୍ରୀଜଗନ୍ନାଥ ସଂସ୍କୃତିର ମାନବିକ ବାର୍ତ୍ତାକୁ ସମାଜରେ ପ୍ରସାର କରିବା ସହ ଓଡ଼ିଆ ଭାଷା, ସାହିତ୍ୟ ଓ ଐତିହ୍ୟର ସୁରକ୍ଷା ପାଇଁ ସାମୂହିକ ପ୍ରୟାସର ଆବଶ୍ୟକତାକୁ ପୁନର୍ବାର ଉଜ୍ଜ୍ୱଳ କରିଥିଲା।