ଗଞ୍ଜାମ: ଗଞ୍ଜାମ ଜିଲ୍ଲାରେ ପ୍ରକୋପ ସୃଷ୍ଟି କରିଛି ଘୋଡ଼ାହାଡ଼ ନଦୀର ବନ୍ୟାଜଳ। ନଦୀର ଉପରମୁଣ୍ଡ ଗଜପତି ଜିଲ୍ଲାରେ ହୋଇଥିବା ପ୍ରବଳ ବର୍ଷା ଯାହାକି ତଳମୁଣ୍ଡରେ ଭୟବହତା ବୃଦ୍ଧି କରିଛି। ଆଜି ଅପରାହ୍ନ ପ୍ରାୟ ୩ଟା ସମୟରେ ପାଟପୁର-ପଳାଶପୁର ବ୍ରିଜ ଉପରେ ଚାରି ଫୁଟ ଉଚ୍ଚରେ ବନ୍ୟାଜଳ ପ୍ରବାହିତ ହେବା ଫଳରେ ଆସିକା-ପାଟପୁର-ଦିଗପହଣ୍ଡିକୁ ସଂଯୋଗ କରୁଥିବା ତିନି ଶହ ଛବିଶ ନମ୍ବର ଜାତୀୟ ରାଜପଥରେ ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇପଡ଼ିଛି। ପରିସ୍ଥିତିର ଗମ୍ଭୀରତାକୁ ଦୃଷ୍ଟିରେ ରଖି ପାଟପୁର ପୋଲିସ ଟିମ୍ ପୋଲର ଉଭୟ ପାର୍ଶ୍ୱରେ ଅସ୍ଥାୟୀ ବାରିକେଟ୍ ନିର୍ମାଣ କରି କୌଣସି ବ୍ୟକ୍ତି କିମ୍ବା ଯାନବାହନକୁ ଯିବାକୁ ଦେଉନାହାନ୍ତି।
ସେହିପରି ପୁରୁଣା ମଳାଭଞ୍ଜା ଓ ଖୋଲଡିକୁ ସଂଯୋଗ କରୁଥିବା ବ୍ରିଜ ତଳେ ପନ୍ଦର ଫୁଟ ଉଚ୍ଚରେ ପାଣି ପ୍ରବାହିତ ହେବା ଫଳରେ ସେଠାକାର ଅସ୍ଥାୟୀ ଆପ୍ରୋଚ୍ ରୋଡ୍ ସମ୍ପୂର୍ଣ୍ଣ ଭାସି ଯାଇଛି ଏବଂ ଯାତାୟାତ ସମ୍ପୂର୍ଣ୍ଣ ଠପ୍ ହୋଇଯାଇଛି। ଘୁଷୁରୀ ନାଳର ବନ୍ୟାଜଳ ଗାଁ ଭିତରକୁ ପଶିଯିବାରୁ ସାଧାରଣ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି ଏବଂ ଗ୍ରାମବାସୀମାନେ ଜଳବନ୍ଦୀ ଅବସ୍ଥାରେ ରହିଛନ୍ତି। ଅନ୍ୟପକ୍ଷରେ, ଗୌତମୀ ନିକଟ କଲରାପଦର ପଞ୍ଚାୟତର ଦ୍ୱିତୀୟ ଧର୍ମପୁର ଗ୍ରାମର ସମସ୍ତ ଚାଷଜମି ଜଳମଗ୍ନ ହୋଇ ବ୍ୟାପକ କ୍ଷୟକ୍ଷତି ଘଟିଛି। ଗାଁ ଭିତରେ ପାଣି ପଶିଯିବାରୁ ଲୋକେ ନାହିଁନଥିବା ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି। ସେହିପରି ସାନଖେମୁଣ୍ଡି ବ୍ଲକର ପଥରପୁଞ୍ଜି ଏବଂ ଜଲମରା ଗାଁରେ ମଧ୍ୟ ବନ୍ୟାଜଳ ପ୍ରବେଶ କରି ବହୁ କ୍ଷୟକ୍ଷତି ଘଟାଇଛି।