ଦେଶରେ ଜନଗଣନାକୁ ନେଇ ଅପେକ୍ଷାର ଅନ୍ତ ଘଟିଛି। ୨୦୨୭ ଜନଗଣନା ପାଇଁ ସରକାର ତାରିଖ ଘୋଷଣା କରିଛନ୍ତି। ଆସନ୍ତା ୨୦୨୭ ଜାନୁଆରୀ ୨୫ରୁ ଫେବୃଆରୀ ୨୮ ମଧ୍ୟରେ ଦେଶର ଅଧିକାଂଶ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଜନଗଣନା କରାଯିବ। ଏନେଇ ଜନଗଣନା କମିଶନରଙ୍କ ପକ୍ଷରୁ ସରକାରୀ ବିଜ୍ଞପ୍ତି ଜାରି ହୋଇଛି। ତେବେ ଏଥର ଜନଗଣନା ପ୍ରକ୍ରିୟାରେ କିଛି ରାଜ୍ୟ ଓ ଅଞ୍ଚଳକୁ ଅଲଗା ରଖାଯାଇଛି। ତୁଷାରପାତ ଏବଂ ନିର୍ବାଚନଜନିତ ପରିସ୍ଥିତିକୁ ଦୃଷ୍ଟିରେ ରଖି ସେଠାରେ ଜନଗଣନାର ତାରିଖ ପରବର୍ତ୍ତୀ ସମୟରେ ଘୋଷଣା କରାଯିବ।
୧ ମାର୍ଚ୍ଚ ୨୦୨୭କୁ ରହିବ ଜନଗଣନାର ସନ୍ଦର୍ଭ ତାରିଖ
ସରକାରୀ ବିଜ୍ଞପ୍ତି ଅନୁଯାୟୀ, ୨୦୨୭ ଜନଗଣନା ପାଇଁ ସନ୍ଦର୍ଭ ତାରିଖ ଭାବେ ୧ ମାର୍ଚ୍ଚ ୨୦୨୭କୁ ଧାର୍ଯ୍ୟ କରାଯାଇଛି। ଏହି ଦିନ ରାତି ୧୨ଟାକୁ ଆଧାର କରି ଜନସଂଖ୍ୟା ସମ୍ପର୍କିତ ତଥ୍ୟ ନିର୍ଦ୍ଧାରଣ କରାଯିବ। ଅର୍ଥାତ୍ ଜନଗଣନା ପ୍ରକ୍ରିୟାରେ ଏହି ନିର୍ଦ୍ଦିଷ୍ଟ ସମୟକୁ ଆଧାର କରି ଦେଶର ଜନସଂଖ୍ୟାର ହିସାବ ରଖାଯିବ।
ଭାରତର ଜନଗଣନା କମିଶନର ମୃତ୍ୟୁଞ୍ଜୟ କୁମାର ନାରାୟଣଙ୍କ ପକ୍ଷରୁ ଜାରି ବିଜ୍ଞପ୍ତିରେ ଏନେଇ ସ୍ପଷ୍ଟ କରାଯାଇଛି। ଦେଶର ଜନସଂଖ୍ୟା, ଜନସାଂଖ୍ୟିକ ଗଠନ ଏବଂ ବିଭିନ୍ନ ସାମାଜିକ ଓ ଆର୍ଥିକ ତଥ୍ୟ ସଂଗ୍ରହ କରିବାରେ ଏହି ଜନଗଣନା ଗୁରୁତ୍ୱପୂର୍ଣ୍ଣ ଭୂମିକା ନେବ।
ଏହି ରାଜ୍ୟଗୁଡ଼ିକରେ ହେବନି ଜନଗଣନା
ସରକାରଙ୍କ ଘୋଷଣା ଅନୁଯାୟୀ, ମଣିପୁରରେ ପରବର୍ତ୍ତୀ ଘୋଷଣା ପର୍ଯ୍ୟନ୍ତ ଜନଗଣନା ସ୍ଥଗିତ ରହିବ। ଏହାବ୍ୟତୀତ ଗୋଆ, ଉତ୍ତରପ୍ରଦେଶ, ପଞ୍ଜାବ ଓ ଉତ୍ତରାଖଣ୍ଡରେ ମଧ୍ୟ ନିର୍ଦ୍ଧାରିତ ସମୟରେ ଜନଗଣନା କରାଯିବ ନାହିଁ।
ସେହିପରି ଲଦାଖ, ହିମାଚଳପ୍ରଦେଶ ଏବଂ ଜମ୍ମୁ-କାଶ୍ମୀରର ତୁଷାରପାତ ପ୍ରଭାବିତ ଅଞ୍ଚଳକୁ ମଧ୍ୟ ଏହି ପର୍ଯ୍ୟାୟରୁ ବାଦ୍ ଦିଆଯାଇଛି। ଏହି ଅଞ୍ଚଳଗୁଡ଼ିକରେ ପାଣିପାଗ ଓ ଅନ୍ୟାନ୍ୟ ପରିସ୍ଥିତିକୁ ଦେଖି ଜନଗଣନାର ତାରିଖ ପୃଥକ ଭାବେ ଘୋଷଣା କରାଯିବ।
ଜନଗଣନା କେବଳ ଦେଶର ଲୋକସଂଖ୍ୟା ଜାଣିବାର ଏକ ପ୍ରକ୍ରିୟା ନୁହେଁ। ଏହା ଦେଶର ଯୋଜନା ପ୍ରସ୍ତୁତି, ସରକାରୀ ଯୋଜନାର କାର୍ଯ୍ୟକାରିତା, ଭିତ୍ତିଭୂମି ବିକାଶ ଏବଂ ସମ୍ବଳ ବଣ୍ଟନ ପାଇଁ ଏକ ଗୁରୁତ୍ୱପୂର୍ଣ୍ଣ ଆଧାର। ଜନଗଣନାରୁ ମିଳୁଥିବା ତଥ୍ୟକୁ ଆଧାର କରି ସରକାର ବିଭିନ୍ନ ଅଞ୍ଚଳର ଆବଶ୍ୟକତା ଅନୁସାରେ ଯୋଜନା ପ୍ରସ୍ତୁତ କରିଥାନ୍ତି।
ତେଣୁ ୨୦୨୭ ଜନଗଣନାର ତାରିଖ ଘୋଷଣା ପରେ ଏବେ ପରବର୍ତ୍ତୀ ପ୍ରକ୍ରିୟା ଉପରେ ସମସ୍ତଙ୍କ ନଜର ରହିଛି। କେଉଁ ରାଜ୍ୟରେ କେବେ ଜନଗଣନା ହେବ ଏବଂ ଏହାର ସମ୍ପୂର୍ଣ୍ଣ କାର୍ଯ୍ୟସୂଚୀ କିପରି ରହିବ, ସେନେଇ ଆଗାମୀ ଘୋଷଣାକୁ ଅପେକ୍ଷା କରାଯାଇଛି।