ଭୁବନେଶ୍ୱର: ରାଜଧାନୀରେ ପୁଣିଥରେ ଅପରାଧୀଙ୍କ ଆତଙ୍କ ଦେଖିବାକୁ ମିଳିଛି। ଏୟାରଫିଲ୍ଡ ଥାନା ଅନ୍ତର୍ଗତ ପଲାସପଲ୍ଲୀ ଲେନ୍-୧୩ରେ ଘଟିଥିବା ଏକ ବର୍ବରକାଣ୍ଡରେ ପରିବାର ଉପରେ ମାରଣାସ୍ତ୍ରରେ ଆକ୍ରମଣ କରାଯିବା ସହ ବୋମାମାଡ଼ ହୋଇଛି। ଏହି ସଂଘବଦ୍ଧ ଆକ୍ରମଣରେ ଶ୍ରୀଧର ମହାରଣାଙ୍କ ପରିବାରର ୪ ଜଣ ସଦସ୍ୟ ଗୁରୁତର ଭାବେ ଆହତ ହୋଇଛନ୍ତି। ମିଳିଥିବା ସୂଚନା ମୁତାବକ, କୁକୁଟେଶ୍ୱର ଅଞ୍ଚଳରୁ ପ୍ରାୟ ୧୨ ଜଣ ଦୁର୍ବୃତ୍ତ ହାତରେ ଖଣ୍ଡା ଓ ବିଭିନ୍ନ ମାରଣାସ୍ତ୍ର ଧରି ହଠାତ୍ ଶ୍ରୀଧର ମହାରଣାଙ୍କ ବାସଭବନରେ ପଶିଥିଲେ। କୌଣସି ପୂର୍ବ ଶତ୍ରୁତା କିମ୍ବା ବ୍ୟକ୍ତିଗତ ବିବାଦକୁ କେନ୍ଦ୍ର କରି ଏହି ଜଘନ୍ୟକାଣ୍ଡ ଘଟିଥିବା ସନ୍ଦେହ କରାଯାଉଛି। ଘର ଭିତରେ ପଶି ଦୁର୍ବୃତ୍ତମାନେ ଅତି ନିର୍ମମ ଭାବେ ପରିବାର ଲୋକଙ୍କୁ ଆକ୍ରମଣ କରିବା ସହ ଭୟର ବାତାବରଣ ସୃଷ୍ଟି କରିବା ପାଇଁ ବୋମାମାଡ଼ କରିଥିଲେ। ଏହି ଭୟଙ୍କର ଆକ୍ରମଣରେ ପରିବାରର ଚାରି ଜଣ ଗୁରୁତର ଭାବେ ଆହତ ହୋଇଥିବା ବେଳେ ସେମାନଙ୍କ ମଧ୍ୟରୁ ଦୁଇ ଜଣଙ୍କ ଅବସ୍ଥା ଅତି ସଙ୍କଟଜନକ ରହିଛି। ଆହତମାନଙ୍କୁ ତୁରନ୍ତ ଉଦ୍ଧାର କରାଯାଇ ଚିକିତ୍ସା ନିମନ୍ତେ ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି। ଘଟଣାସ୍ଥଳରେ ଆକ୍ରମଣକାରୀମାନେ ବ୍ୟାପକ ଭୟ ଓ ଆତଙ୍କ ସୃଷ୍ଟି କରିବା ପରେ ଘଟଣାସ୍ଥଳରୁ ଫେରାର ହୋଇଯାଇଛନ୍ତି। ଖବର ପାଇବା ପରେ ଏୟାରଫିଲ୍ଡ ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ପ୍ରକ୍ରିୟା ଆରମ୍ଭ କରିଛି। ଫେରାର ଅଭିଯୁକ୍ତମାନଙ୍କୁ ଧରିବା ପାଇଁ ପୁଲିସ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଛି। ଏହି ହୃଦୟବିଦାରକ ଘଟଣା ପରେ ସମଗ୍ର ପଲାସପଲ୍ଲୀ ଓ ଆଖପାଖ ଅଞ୍ଚଳରେ ଗଭୀର ଚାଞ୍ଚଲ୍ୟ ସହ କୋକୁଆ ଭୟ ଖେଳିଯାଇଛି।
