ପାରାଦୀପ: ବଙ୍ଗୋପସାଗରର ଗଭୀର ଜଳରାଶି ମଧ୍ୟରେ ଏକ ବଡ଼ ଧରଣର ସାମୁଦ୍ରିକ ଦୁର୍ଘଟଣା ଟଳିଯାଇଛି। ପାରାଦୀପ ଉପକୂଳଠାରୁ ପ୍ରାୟ ୫୦ ସାମୁଦ୍ରିକ ମାଇଲ୍ ଦୂର ସମୁଦ୍ର ମଧ୍ୟରେ ଯାନ୍ତ୍ରିକ ତ୍ରୁଟି ଯୋଗୁଁ ବୁଡ଼ିଯିବାକୁ ବସିଥିବା ଏକ ବିଶାଳ ମାଲବାହୀ ଜାହାଜକୁ ସଫଳତାର ସହ ଉଦ୍ଧାର କରାଯାଇଛି। ପାରାଦୀପ ବନ୍ଦର କର୍ତ୍ତୃପକ୍ଷ ଏବଂ ଭାରତୀୟ ତଟରକ୍ଷୀ ବାହିନୀର ମିଳିତ ଓ ତ୍ୱରିତ ଉଦ୍ଧାର ଅଭିଯାନ ଫଳରେ ଜାହାଜଟି ସମୁଦ୍ର ଗର୍ଭରେ ଲୀନ ହେବାରୁ ରକ୍ଷା ପାଇବା ସହ ଏଥିରେ ଥିବା ସମସ୍ତ ୨୭ ଜଣ ନାବିକଙ୍କ ଜୀବନ ବଞ୍ଚିଯାଇଛି।
ମିଳିଥିବା ସୂଚନା ଅନୁଯାୟୀ, ‘ଏମ୍ଭି ବିଶ୍ୱ ଉଦୟ’ ନାମକ ଏହି ମାଲବାହୀ ଜାହାଜଟି ପଶ୍ଚିମବଙ୍ଗର ହଳଦିଆ ବନ୍ଦରରୁ ବାହାରି ଆଫ୍ରିକୀୟ ଦେଶ ମୋଜାମ୍ବିକ୍ ଅଭିମୁଖେ ଯାତ୍ରା କରୁଥିଲା। ତେବେ ପାରାଦୀପ ଉପକୂଳ ଅତିକ୍ରମ କରୁଥିବା ବେଳେ ଉପକୂଳଠାରୁ ପ୍ରାୟ ୫୦ ସାମୁଦ୍ରିକ ମାଇଲ୍ ଦୂର ଗଭୀର ସମୁଦ୍ରରେ ଜାହାଜଟିରେ ହଠାତ୍ ଗୁରୁତର ଯାନ୍ତ୍ରିକ ତ୍ରୁଟି ଦେଖାଦେଇଥିଲା। ବିଶେଷ କରି ଜାହାଜର ପ୍ରୋପେଲର୍ ଦଣ୍ଡ ଅଚଳ ହୋଇଯିବାରୁ ଜାହାଜଟି ଆଗକୁ ବଢ଼ିପାରିନଥିଲା ଏବଂ ଏହାର ଭିତରକୁ ଦ୍ରୁତ ଗତିରେ ସମୁଦ୍ରର ଲୁଣି ପାଣି ପଶିବା ଆରମ୍ଭ ହୋଇଥିଲା।
ଜାହାଜ ଭିତରେ ପାଣି ପଶିବା ଯୋଗୁଁ ଏହା ଧୀରେ ଧୀରେ ବୁଡ଼ିବା ଅବସ୍ଥାକୁ ଚାଲିଆସିଥିଲା ଏବଂ ଜାହାଜରେ ଥିବା ୨୭ ଜଣ ନାବିକଙ୍କ ଜୀବନ ପ୍ରତି ଘୋର ବିପଦ ସୃଷ୍ଟି ହୋଇଥିଲା। ଏହି ଜରୁରୀକାଳୀନ ପରିସ୍ଥିତି ସମ୍ପର୍କରେ ସୂଚନା ମିଳିବା ମାତ୍ରେ ପାରାଦୀପ ବନ୍ଦର କର୍ତ୍ତୃପକ୍ଷ ତୁରନ୍ତ ତତ୍ପରତା ପ୍ରକାଶ କରିଥିଲେ। ବନ୍ଦର କର୍ତ୍ତୃପକ୍ଷ ଭାରତୀୟ ତଟରକ୍ଷୀ ବାହିନୀ ସହ ସମନ୍ୱୟ ରକ୍ଷା କରି ଘଟଣାସ୍ଥଳକୁ ଉଦ୍ଧାରକାରୀ ଦଳ ପଠାଇଥିଲେ। ଉଭୟ ସଂସ୍ଥାର ମିଳିତ ପ୍ରଚେଷ୍ଟା ଓ ସାହସିକତା ବଳରେ ପ୍ରତିକୂଳ ପରିସ୍ଥିତି ସତ୍ତ୍ୱେ ଜାହାଜଟିକୁ ନିୟନ୍ତ୍ରଣକୁ ଅଣାଯାଇଥିଲା।
ବନ୍ଦର କର୍ତ୍ତୃପକ୍ଷ ଓ ତଟରକ୍ଷୀ ବାହିନୀର ଏହି ସମୟୋଚିତ ପଦକ୍ଷେପ ଯୋଗୁଁ ମାଲବାହୀ ଜାହାଜଟି ଏକ ନିଶ୍ଚିତ ସଲିଳ ସମାଧିରୁ ବର୍ତ୍ତିଯାଇଛି। ଏଥିସହ ଜାହାଜରେ ଥିବା ସମସ୍ତ ୨୭ ଜଣ ନାବିକଙ୍କୁ ମଧ୍ୟ ବିପଦମୁକ୍ତ ଭାବେ ସୁରକ୍ଷିତ ଉଦ୍ଧାର କରାଯାଇଛି। ଏହି ସଫଳ ଉଦ୍ଧାର କାର୍ଯ୍ୟ ଫଳରେ ସମୁଦ୍ର ମଧ୍ୟରେ ଏକ ବଡ଼ ଧରଣର ଧନଜୀବନ ହାନିକୁ ରୋକାଯାଇପାରିଛି।


