ରାଜଧାନୀରେ ଅଟୋ ଚାଳକଙ୍କୁ ୪୭ ହଜାର ଟଙ୍କାର ଜରିମାନା । ନୂଆ ମୋଟର ଯାନ ଆକ୍ଟ ଲାଗୁ ହେବା ପରେ ସାରା ଦେଶରେ ଟ୍ରାଫିକ ପୋଲିସ ଆକ୍ସନ ମୋଡରେ ରହିଛି । ଓଡିଶାରେ ମଧ୍ୟ ଏହି ନୂଆ ନିୟମ କଡାକଡି ଭାବେ ପାଳନ କରାଯାଉଛି । ଆଜି ଏହି ଚେକିଂ ସମୟରେ ପୋଲିସ ଜାଲରେ ପଡିଛନ୍ତି ଜଣେ ଅଟୋ ଚାଳକ । ଆଜି ଦିନବେଳେ ରାଜଧାନୀର ଆଚାର୍ଯ୍ୟ ବିହାର ଅଂଚଳରେ ଚେକିଂ ଚାଲୁଥିଲା । ଏହି ସମୟରେ ଜଣେ ଅଟୋ ଚାଳକ ପୋଲିସକୁ ଦେଖି ଘାବରାଇ ଯାଇଥିଲେ । ପରେ ପୋଲିସ ହାତରେ ଧରା ପଡିଥିଲ। ପ୍ରଥମେ ଟ୍ରାଫିକ ନିୟମ ଭାଙ୍ଗିଥିବାରୁ ତାଙ୍କୁ ୫ହଜାର ଟଙ୍କା ଫାଇନ ପକାଯାଇଥିଲା । ପରେ ଅଟୋର କାଗଜ ପତ୍ର, ରେଜିଷ୍ଟ୍ରେସନ, ଇନ୍ସୁରାନ୍ସ ଆଦି ଠିକ ନଥିବା ପୋଲିସକୁ ଜାଣିବାକୁ ମିଳିଥିଲା । ଫଳରେ ନୂଆ ସଂଶୋଧିତ ମୋଟର ଯାନ ଆଇନ ଅନୁସାରେ ତାଙ୍କୁ ଆହୁରି ଆରଟିଓ ପକ୍ଷରୁ ସର୍ବମୋଟ ୪୭ ହଜାର ୫୦୦ ଟଙ୍କା ଫାଇନ ଲଗାଯାଇଥିଲା । ସର୍ବମୋଟ ୮ଟି ନିୟମ ଭାଙ୍ଗିଥିବାର ଅଭିଯୋଗ ରହିଛି ଏହି ଅଟୋଚାଳକଙ୍କ ଉପରେ । ଏପରି ଭାବେ ଅଟୋ ଚାଳକଙ୍କୁ ମୋଟ ୪୭ ହଜାର ୫୦୦ ଟଙ୍କାର ଫାଇନ ଦେବାକୁ ପଡିବ । ଗଣେଶ ପୂଜା ଓ ନୂଆଖାଇଁ ପାଇଁ ଜରିମାନା ଆଦାୟ ବନ୍ଦ ରହିଥିବା ବେଳେ ଆଜି ପୁଣି କମିଶନରେଟ ପୋଲିସ ଜୋରଦାର ଚେକିଂ ଆରମ୍ଭ କରିଛି । ହେଲମେଟ୍ ସମେତ ଡ୍ରାଇଭିଂ ଲାଇସେନ୍ସ, ରେଜିଷ୍ଟ୍ରେସନ, ଇନ୍ସୁରାନ୍ସ ଆଦି ଚେକିଂ କରାଯାଉଛି ।
