ସମୀକ୍ଷାବ୍ୟୁରୋ
ବାଣପୁର, ୨୭/୧୨: ବାଣପୁର ନୂଆଗାଁଠାରେ ୪୦ବସ୍ତା ଧାନ ପୋଡ଼ି ଯାଇଥିବାର ସୂଚନା ମିଳିଛି। ବାଣପୁର ଏନଏସି ୬ନଂ ୱାର୍ଡ ନୂଆଗାଁର ବାସିନ୍ଦା ଶଙ୍କର ପ୍ରଧାନଙ୍କର ଗୁରୁବାର ରାତିରେ ୪୦ବସ୍ତା ଧାନ ପୋଡ଼ି ନଷ୍ଟ ହୋଇଯାଇଛି। ଗୁରୁବାର ଦିନ ଧାନ ଅମଳ କରି ଶଙ୍କର ୪୦ ବସ୍ତା ଧାନ ସଂଗ୍ରହ କରିଥିଲେ। ସନ୍ଧ୍ୟାରେ ଝିପିଝିପି ବର୍ଷା କାରଣରୁ ଅମଳ ଧାନକୁ ଘରକୁ ନେବା ସମ୍ଭବପର ନ ହେବାରୁ ସମସ୍ତ ଧାନକୁ ବିଲରେ ଥିବା ଖଳାରେ ରଖିଥିଲେ। ତେବେ ରାତି ୯ ଘଟିକା ସମୟରେ ଏହି ସମସ୍ତ ଧାନ ବସ୍ତାରେ ନିଆଁ ଲାଗିଯାଇଥିଲା। ନିଆଁ ଲାଗିବାର ଖବର ପାଇ ବାଣପୁର ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲ, ମାତ୍ର ସେତେବେଳକୁ ସମସ୍ତ ଧାନ ପୋଡ଼ି ପାଉଁଶ ହୋଇଯାଇଥିଲା। କେହି ଦୁର୍ବୃତ୍ତ ଏପରି କାର୍ଯ୍ୟ କରିଥିବାର ସନ୍ଦେହ ହୋଇଛି। ଧାନ ବସ୍ତାରେ ନିଆଁ ଲାଗିବା ନେଇ ଶଙ୍କର ବାଣପୁର ଥାନରେ ଅଭିଯୋଗ କରିବେ ବୋଲି ସୂଚନା ରହିଛି।
ରିପୋର୍ଟର: ସୀତାରାମ ଅଗ୍ରୱାଲ
