ସମୀକ୍ଷା ବ୍ୟୁରୋ
ବାଲୁଗାଁ : ବାଲୁଗାଁ ରେଳଷ୍ଟେସନରେ ଟିକଟ ଦଲାଲଙ୍କ ଦୌରାତ୍ମ୍ୟ ବଢିବାରେ ଲାଗିଛି। ବିଗତ 10 ବର୍ଷ ଧରି ଦଲାଲଙ୍କ ଦୌରାତ୍ମ୍ୟର ଶିକାର ହେଉଛନ୍ତି ରେଳଯାତ୍ରୀ। ବାଲୁଗାଁ ନିକଟସ୍ଥ ଚିଲିକା ନୌସେନା ବେସ୍ର ବିଭିନ୍ନ ଅଧିକାରୀ ଏହି ସମସ୍ୟା ଦ୍ବାରା ସର୍ବାଧିକ ପ୍ରଭାବିତ ହେଉଛନ୍ତି। ବିନା ଦଲାଲରେ ତତ୍କାଳ ଟିକେଟ ହାସଲ କରିବା ଆପାତତଃ ଅସମ୍ଭବ। ଏହା ପରେ ଦଲାଲଙ୍କ ଗୁଣ୍ଡାଗର୍ଦ୍ଦିରେ ମଧ୍ୟ ସାଧାରଣ ଲୋକ ହନ୍ତସନ୍ତ। ଏହାକୁ ନେଇ ସାଧାରଣରେ ଅନେକ ଥର ଅଭିଯୋଗ ଆସିଛି, ମାତ୍ର ରେଳବାଇ ଅଧିକାରୀ ଏବଂ ଦଲାଲଙ୍କ ମଧୁଚନ୍ଦ୍ରିକା କାରଣରୁ ଏହି ଘଟଣା ସମ୍ମୁଖକୁ ଆସିନଥାଏ ବୋଲି ଜନସାଧାରଣଙ୍କ ପକ୍ଷରୁ ମତପ୍ରକାଶ ପାଇଛି। ଏପରି ଏକ ଘଟଣା ଆଜି ପୁଣିଥରେ ଦେଖିବାକୁ ମିଳିଛି।
ଉଲ୍ଲେଖଯୋଗ୍ୟ ଯେ, ସମୀକ୍ଷା ପ୍ରତିନିଧି ସୁନୀଲ କୁମାର ଭୋଳ ଟିକେଟ କାଉଣ୍ଟର ଧାଡିରେ ରହି ଟିକଟ କାଟିବାକୁ ଅପେକ୍ଷା କରିଥିଲେ। ଏହି ସମୟରେ ଦଲାଲ ମାନେ ଧାଡି ଭାଙ୍ଗି ଜୋରଜବରଦସ୍ତ ଟିକଟ କାଟିବାର ପ୍ରୟାସ କରିଥିଲେ। ଧାଡିରେ ଥିବା ଲୋକ ଏହାକୁ ବିରୋଧ କରିଥିଲେ ମଧ୍ୟ ଦଲାଲ ମାନେ କାହା କଥାକୁ ଭୃକ୍ଷେପ ନକରି ଟିକଟ କରିବାରେ ବ୍ୟସ୍ତ ରହିଥିଲେ। ଧାଡିରେ ରହିଥିବା ଭାରତୀୟ ସେନାର ଜଣେ ଯବାନ ରହିଥିଲେ ମଧ୍ୟ ତାଙ୍କୁ ଟିକଟ କାଟିବାର ସୁଯୋଗ ଦେଇନଥିଲେ ଦଲାଲ। ଦଲାଲଙ୍କ ଦୌରାତ୍ମ୍ୟ ସହ୍ୟ କରିନପାରି ଆମ ପ୍ରତିନିଧି ଏହାର ବିରୋଧ କରିବାରୁ ଦଲାଲଙ୍କ ସହିତ ତାଙ୍କର ବଚସା ହୋଇଥିଲା। ଏହି ବଚସା ସମୟରେ ରେଳବାଇ ଅଧିକାରୀ ନିଦାବିଷ୍ଣୁ ପାଲଟି ଯାଇଥିଲେ। ଟିକଟ କାଉଣ୍ଟରରେ ରହିଥିବା ରେଳବାଇ ଅଧିକାରୀ ନୀରବ ରହିବାରୁ ଶ୍ରୀ ଭୋଳ ଜିଆର୍ପି ନିକଟରେ ଅଭିଯୋଗ କରିଥିଲେ। ଅଭିଯୋଗ ପରେ ରେଳବାଇ ପୁଲିସ୍ ତୁରନ୍ତ କାର୍ଯ୍ୟାନୁଷ୍ଠାନ ପୂର୍ବକ ଜିଆର୍ପି ଯବାନଙ୍କୁ ମୁତୟନ କରିଥିଲେ। ଏହା ସହିତ ଭବିଷ୍ୟତରେ ଏପରି ଘଟଣାକୁ ଏଡାଇବା ନିମନ୍ତେ ଟିକଟ କାଉଣ୍ଟର ସମ୍ମୁଖରେ ଦୁଇ ଜଣ ଜିଆର୍ପି ପୁଲିସ ମୁତୟନ ନେଇ ପ୍ରତିଶ୍ରୁତି ଦେଇଥିଲେ।
