କନ୍ଦର୍ପ ବେହେରା
ରେଢାଖୋଲ : ରେଢାଖୋଲରେ ଜମିବାଡି ବିବାଦକୁ କେନ୍ଦ୍ରକରି କକା ଓ ପୁତୁରାଙ୍କ ମଧ୍ୟରେ ଗଣ୍ଡଗୋଳ ଘଟି 3 ଜଣ ଆହତ ହୋଇଛନ୍ତି । ଜମିବାଡି ବିବାଦକୁ ନେଇ ରେଢାଖୋଲ ଥାନା ପୋଡାବଲଣ୍ଡା ଗ୍ରାମରେ ରବିବାର ସକାଳ 9ଟା ସମୟରେ ଏହି ଘଟଣା ଘଟିଛି ।
ଉଲ୍ଳେଖଯୋଗ୍ୟ ଯେ, ପୋଡାବଲଣ୍ଡା ଗ୍ରାମର ମୁରଲୀ ବେହେରା (48) ଏବଂ ତାଙ୍କ ପୁଅ ହରେଶ ବେହେରା (18) ନିଜ ଘର ବାହାରେ ସିମେଣ୍ଟ କାନ୍ଥ ଦେବା ପାଇଁ ଡିହ ଖୋଳୁଥିବା ସମୟରେ ପଡୋଶୀ ବିକାଶ ଚନ୍ଦ୍ର ବେହେରାଙ୍କ ସହିତ ଯୁକ୍ତିତର୍କ ହୋଇଥିଲା । ଉଭୟଙ୍କ ମଧ୍ୟରେ ଯୁକ୍ତିତର୍କ ହେବା ପରେ ପରସ୍ପର ଉପରକୁ ଆକ୍ରମଣ କରିଥିଲେ । ଉଭୟ ପକ୍ଷ ପରସ୍ପରକୁ ଟାଙ୍ଗିଆରେ ଆକ୍ରମଣ କରିଥିଲେ । ଆହତ ମୁରଲୀ ବେହେରାଙ୍କୁ ରେଢାଖୋଲ ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ବିକାଶ ବେହେରାଙ୍କୁ ବୁର୍ଲ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଏହି ଆକ୍ରମଣ ଘଟଣାକୁ ନେଇ କୌଣସି ମାମଲା ରୁଜୁ କରାଯାଇନଥିବା ଜଣାପଡିଛି ।
