ନୂଆଦିଲ୍ଲୀ : ଦେଶରେ ମୁସଲମାନ୍ ହେବା ଆଜିର ସମୟରେ ବଡ ଅପରାଧ ବୋଲି ଆପ୍ ବିଧାୟକ ଅମାନତଉଲ୍ଲା ଖାନ୍ ମତ ଦେଇଛନ୍ତି । ଶନିବାର ସୋସିଆଲ ମିଡିଆ ସାଇଟ୍ ଟ୍ବିଟ୍ଟର ଜରିଆରେ ଅମାନତଉଲ୍ଲା ଖାନ୍ ଏହି ବିବାଦୀୟ ମତ ଦେଇଛନ୍ତି । ନିଲମ୍ବିତ ଆପ୍ କର୍ପୋରେଟର୍ ତାହିର ହୁସେନ୍ଙ୍କ ଉଦାହରଣ ଦେଇ ଅମାନତଉଲ୍ଲା ଏଡି ବୟାନ ଦେଇଛନ୍ତି । ଜଣେ ମୁସଲମାନ୍ ହୋଇଥିବାରୁ ତାହିର ହୁସେନଙ୍କୁ ଦଣ୍ଡ ଭୋଗିବାକୁ ପଡୁଛି । ଦେଶରେ ମୁସଲମାନ ହେବା ସବୁଠାରୁ ବଡ ଅପରାଧ ଏବଂ ଭବିଷ୍ୟତରେ ସରକାର ଏହା ମଧ୍ୟ ପ୍ରମାଣ କରିଦେବେକି ଦିଲ୍ଲୀ ହିଂସାକାଣ୍ଡ ତାହିର ହୁସେନ୍ କରାଇଛନ୍ତି । ତାହିର ହୁସେନ୍ଙ୍କୁ 7 ଦିନିଆ ପୋଲିସ୍ ରିମାଣ୍ଡରେ ପଠାଯିବା ପରେ ଅମାନତଉଲ୍ଲା ଏହି ମତ ଦେଇଛନ୍ତି । ଅମାନତଉଲ୍ଲାଙ୍କ ଏହି ମନ୍ତବ୍ୟକୁ ନେଇ ବିଜେପି ବିଧାୟକ ବିଧାୟକ ବିଜେନ୍ଦ୍ର ଗୁପ୍ତା ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ ଟ୍ବିଟ୍ କରିଛନ୍ତି । ଆପ୍ ଦଳର ମୁସଲିମ୍ ତୁଷ୍ଟୀକରଣ ନୀତିକୁ ଧନ୍ୟବାଦ । ମୁଁ କେଜ୍ରିଓ୍ବାଲଙ୍କୁ ପ୍ରଶ୍ନ କରିବାକୁ ଚାହୁଁଛି କି ସେ ତାଙ୍କ ବିଧାୟକଙ୍କ ମତରେ ସହମତି ପ୍ରକାଶ କରୁଛନ୍ତି କି ନାହିଁ ବୋଲି ଗୁପ୍ତା ଟ୍ବିଟ୍ କରିଛନ୍ତି । (ଏଜେନ୍ସି)
