ଦୁଷ୍ମନ୍ତ ପଣ୍ଡା
କଳାହାଣ୍ଡି : ମହାମାରୀ କରୋନା ଭୂତାଣୁ ସଂକ୍ରମଣରୁ ରକ୍ଷା ପାଇବା ପାଇଁ ସମଗ୍ର ଭାରତବର୍ଷ ଲକ୍ଡାଉନ ଘୋଷଣା କରାଯାଇଥିବା ବେଳେ ଓଡିଶାରେ ବର୍ତମାନ ତୃତୀୟ ଆକ୍ରାନ୍ତ ଚିହ୍ନଟ ହୋଇଥିବା ଜଣାପଡିଛି । ଏହି ଅବସରରେ କଳାହାଣ୍ଡି ଜିଲ୍ଲାପ୍ରଶାସନ ବ୍ୟାପକ ସଚେତନତା ମୂଳକ ପଦକ୍ଷେପ ଗ୍ରହଣ କରିଥିବା ବେଳେ କଳାହାଣ୍ଡି ପୋଲିସ ପ୍ରଶାସନ ପକ୍ଷରୁ ନିୟମକୁ କଡାକଡି ଭାବେ ପାଳନ କରାଯିବାକୁ ସମଗ୍ର ଅଂଚଳରେ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି । ଅତ୍ୟାବଶ୍ୟକୀୟ ସାମଗ୍ରୀ ଦୋକାନ ଇତ୍ୟାଦି ଖୋଲା ରହିବାକୁ ଅନୁମତି ଥିବା ବେଳେ ସାମାଜିକ ଦୂରତ୍ୱ ବଜାୟ ରଖାଯାଇ ଗ୍ରାହକ ମାନଙ୍କୁ ଜିନିଷ ପତ୍ର ଯୋଗାଇ ଦେବାର ବ୍ୟବସ୍ଥା କରାଯାଇଛି । ପ୍ରାୟ ସମସ୍ତ ଗ୍ରୋସରୀ ଦୋକାନ ଗୁଡିକ ତଥା ଔଷଧ ଦୋକାନ ଗୁଡିକ ସମେତ କ୍ଷୀର, ଅଣ୍ଡା ତଥା ପନିପରିବା ଦୋକାନ ଗୁଡିକ ଖୋଲାରହଛି । ନିତାନ୍ତ ଅତ୍ୟାବଶ୍ୟକ ନଥିଲେ କାହାରିକୁ ମଧ୍ୟ ବାହାରକୁ ବାହାରିବାର ନିୟମ ନାହିଁ । ଜୁନାଗଡ, ଧର୍ମଗଡ, କେସିଙ୍ଗା, ଭବାନୀପାଟଣା ଭଲି ସହରାଂଚଳ ମାନଙ୍କରେ ପୋଲିସ ପକ୍ଷରୁ ବ୍ୟାପକ ତନଖି କରାଯିବା ସହିତ ସମସ୍ତ ଗ୍ରାମାଂଚଳରେ ଲକଡାଉନ ପାଳନ କରିବା ସହିତ ନିୟମ ଉଲ୍ଲଂଘନକାରୀଙ୍କୁ ଗିରଫ କରାଯାଇ କୋର୍ଟ ଚାଲାଣ କରୁଥିବା ପ୍ରକାଶ ।
ଅଦ୍ୟାବଧି ଲକଡାଉନ ନିୟମ ଉଲ୍ଲଂଘନ ଅଭିଯୋଗରେ ପୋଲିସ ପକ୍ଷରୁ ୩୭ଟି କେଶ ରୁଜୁ କରାଯିବା ସହିତ ୩୪ ଗୋଟି ଗାଡି ସିଜ କରାଯାଇ ମୋଟ ୫୫ ଜଣ ନିୟମ ଖିଲାପକାରୀଙ୍କୁ ଗିରଫ କରାଯାଇଥିବା କଳାହାଣ୍ଡି ଏସ ପି ବାତୁଲା ଗଙ୍ଗାଧର ଙ୍କ ସୂତ୍ରରୁ ପ୍ରକାଶ । ସେହିପରି ଲକଡାଉନ ନିୟମ ଉଲ୍ଲଂଘନ କରି ଧର୍ମଗଡ ବ୍ଲକ ଅଧିନସ୍ଥ ବେହେରା ଗ୍ରାମରେ ନିଜ ନୂତନ ବାସଗୃହ ପ୍ରବେଶ କରି ଭୋଜିଭାତ କରୁଥିବା ବେଳେ କୋକସରା ପୋଲିସ ଧର୍ମଗଡ ବ୍ଲକ ଅଧ୍ୟକ୍ଷ ବଳରାମ ପୂଝାରୀଙ୍କୁ କେଶ ନଂ.୬୫ ଧାରା ୨୬୯,୨୭୦,୨୭୧,୧୮୮ ଆଇପିସି ରେ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି । ଜିଲ୍ଲାର ଧର୍ମଗଡ ଥାନା ଅନ୍ତର୍ଗତ ସନ୍ଧିକୁଲିହାରୀ ରାସ୍ତାରେ ଛତିଶଗଡ ସୀମା, ଆମପାଣି ଘାଟି ଉପରେ ସୀମା, ବିଶ୍ୱନାଥପୁର ଥାନା ଅଂଚଳରେ ରାୟଗଡା ସୀମା, ମ.ରାମପୁର ଥାନା ଅଧିନରେ ଥିବା ଫୁଲବାଣୀ ସୀମା, ସଦରଥାନା ଅଧିନସ୍ଥ ଖରିଆର ରାସ୍ତା ସୀମା, କେସିଙ୍ଗା ଥାନା ଅଧିନସ୍ଥ ବଲାଙ୍ଗୀର ସୀମା ସବୁ ସଂପୂର୍ଣ୍ଣ ସିଲ କରିଦିଆଯାଇଛି ।
ଲକ୍ଡାଉନ୍କୁ ତିନିଦିନ ଅତିକ୍ରାନ୍ତ ହେବା ପରେ ଅତ୍ୟାବଶ୍ୟକୀୟ ସାମଗ୍ରୀ ଯୋଗାଣରେ ଅସୁବିଧାକୁ ଏଡାଇ ଦିଆଯାଇନପାରେ । ସମଗ୍ର କଳାହାଣ୍ଡି ଜିଲ୍ଲା ଚିନି ପାଇଁ ନାଗପୁର ଉପରେ, ଆଳୁପାଇଁ କଲିକତା ଉପରେ ଏବଂ ପିଆଜ ପାଇଁ ନାଗପୁର ତଥା ରାୟପୁର ଉପରେ ନିର୍ଭର କରୁଥିବା ବେଳେ ସେସବୁ ସାମଗ୍ରୀ ଅଭାବଜନିତ ଦରବୃଦ୍ଧି ହେଉଥିବା ଅଭିଯୋଗ ହେଉଛି । ଜୁନାଗଡ ସହରାଂଚଳରେ ଆଳୁ ଓ ପିଆଜ ୪୦ଟଙ୍କା ଥିବା ବେଳେ ଚିନି ୫୦ ଟଙ୍କା ହୋଇଯାଇଥିବା ଜଣାପଡିଛି । ଜୁନାଗଡ, କୋକସରା, ଜୟପାଟଣା ଆଦି ବିଭିନ୍ନ ଗ୍ରାମାଂଚଳରେ ଆଳୁ ୯୦ ଟଙ୍କା, ପିଆଜ ୮୫ଟଙ୍କା ଏବଂ ଚିନି ୧୨୦ ଟଙ୍କାରେ ବିଗତ ଦୁଇରୁ ତିନି ଦିନରେ ବିକ୍ରି ହୋଇଥିବା ବିଭିନ୍ନ ସ୍ତରରୁ ଜଣାପଡିଛି । ଏଭଲି ଅବସ୍ଥା ଯଦିଓ ଆଗକୁ ହୁଏ ତେବେ ଆଗାମୀ ଦିନରେ ପରିସ୍ଥିତି ଆହୁରି ଗମ୍ଭୀର ହେବାର ସମ୍ଭାବନାକୁ ଏଡାଇ ଦିଆଯାଇନପାରେ । ୪୩୬୩ ଜଣ ଦାଦନ ଘରକୁ ଫେରିଥିବା ଏବଂ ୯୪୦ ଗ୍ରାମର ୩୯୧୬ ଜଣଙ୍କ ସ୍କ୍ରିନିଂ କରାଯାଇଥିବା ପ୍ରଶାସନ ତରଫରୁ ପ୍ରକାଶ । କଳାହାଣ୍ଡି ଜିଲ୍ଲାର ୩୧୦ଟି ଗ୍ରାମପଂଚାୟତରେ ଅସ୍ଥାୟୀ ଆଇସୋଲେସନ ଗୃହରେ ୧୮୯୦୫ଟି ବେଡର ବ୍ୟବସ୍ଥା କରିବା ପାଇଁ ପ୍ରଶାସନ ତରଫରୁ ନିର୍ଦ୍ଦେଶ ଥିବା ବେଳେ କେତେକ ସ୍ଥାନକୁ ଆବଶ୍ୟକୀୟ ସାମଗ୍ରୀ ଯୋଗାଇ ଦିଆଯାଇନଥିବା ହେତୁ ସାଧାରଣରେ ଅସନ୍ତୋଷ ପ୍ରକାଶ ପାଇବାରେ ଲାଗିଛି ।
