ହାଇଦ୍ରାବାଦ ରାଜୀବ ଗାନ୍ଧୀ ଇଣ୍ଟରନ୍ୟାସନାଲ କ୍ରିକେଟ ଷ୍ଟାଡିୟମରେ ଚାଲିଥିବା ଭାରତ-ଅଷ୍ଟ୍ରେଲିଆ ପ୍ରଥମ ଦିନିକିଆରେ ଭାରତୀୟ ଦଳ ବିଜୟ ଲାଭ କରିଛି। ଉକ୍ତ ୫ମ୍ୟାଚ ବିଶିଷ୍ଠ ଦିନିକିଆ ଶୃଙ୍ଖଳକୁ ଘରୋଇ ଦଳ ୧-୦ ରେ ଆଗୁଆ କରିନେଇଛି । ପୂର୍ବରୁ ଭ୍ରମଣକାରୀ ଦଳ ଟସ ଜିତି ପ୍ରଥମେ ବ୍ୟାଟିଂ କରିବାର ନିଷ୍ପତି ନେଇଥିଲା। କିନ୍ତୁ ଅଧିନାୟକ ଫିଞ୍ଚଙ୍କ ନିଷ୍ପତି ଅନୁସାରେ ଦଳ ପ୍ରଥମ ବ୍ୟାଟିଂର ଲାଭ ନେଇପାରିନଥିଲା। ଅଷ୍ଟ୍ରେଲିଆ ଦଳ କେବଳ ୭ ୱିକେଟ ହରାଇ ୨୩୬ରନ କରିବାରେ ସକ୍ଷମ ହୋଇଥିଲା। ୨୩୭ରନର ଏକ ଛୋଟ ସ୍କୋରକୁ ପିଛା କରିବାକୁଯାଇ ଭାରତୀୟ ଦଳ ତାର ପ୍ରାରମ୍ଭିକ ୱିକେଟ ଶିଖର ଧୱନଙ୍କୁ ଶସ୍ତାରେ ହରେଇ ଅଡୁଆରେ ପଡିଥିଲା, କିନ୍ତୁ ଅଧିନାୟକ କୋହଲୀ ଆଉ ରୋହିତଙ୍କ ଯୋଡି ପିଚରେ କିଛି ସମୟ ପାଇଁ ଜମିରହି ଦଳୀୟ ସ୍କୋରକୁ ୮୦ ରନରେ ପହଞ୍ଚାଇଥିବା ବେଳେ ଜାମ୍ପାଙ୍କ ଦ୍ଵାରା କୋହଲୀ ୪୪ରନ କରି ଏଲବିଡବ୍ଲୁ ଆଉଟ ହୋଇ ପାବିଲିଅନ ଫେରିଥିଲେ। ତାପରେ ଦଳୀୟ ସ୍କୋର ୯୯ ରନ ଥିବାବେଳେ ରୋହିତ ଏବଂ ରାୟୁଡୁ ଆଉଟ ହୋଇ ସମସ୍ୟାରେ ପଡ଼ିଥିବାବେଳେ, ଧୋନୀ ଏବଂ କେଦାର ଯାଦବଙ୍କ ଯୋଡି ଖେଳ ଶେଷ ପର୍ଯନ୍ତ ରହି ଦଳକୁ ଜିତେଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ। ଧୋନୀ ୭୨ବଲରେ ୫୯ରନ ଏବଂ କେଦାର ୮୭ ବଲରେ ୮୧ରନ କରି ନଟଆଉଟ ରହିଥିଲେ। ଅଷ୍ଟ୍ରେଲିଆ ପକ୍ଷରୁ ଏନ ନିଲେ ଏବଂ ଏ ଜାମ୍ପା ୨-୨ ୱିକେଟ ନେଇଥିଲେ। ଏହି ମ୍ୟାଚରେ ମହମ୍ମଦ ସମିଙ୍କୁ ସ୍ଵୀଗୀ ଅଫ ଦି ପ୍ଲେୟାର, କୁଲଦୀପ ଯାଦବଙ୍କୁ ଜନା ବ୍ୟାଙ୍କେବଲ ଅଫ ପ୍ଲେୟାର ଏବଂ କେଦାର ଯାଦବଙ୍କୁ ମ୍ୟାନ ଅଫ ଦି ମ୍ୟାଚ ରୂପେ ପୁରଷ୍କୃତ କରାଗଲା।