ବଲିଉଡ୍ ଅଭିନେତ୍ରୀ ଶ୍ରଦ୍ଧା କପୁର ଆଜି ୩୨ ବର୍ଷରେ ପଦାର୍ପଣ କରିଛନ୍ତି। ସେ ୧୯୮୭ ମାର୍ଚ୍ଚ ୩ରେ ମୁମ୍ବାଇଠାରେ ଜନ୍ମଗ୍ରହଣ କରିଥିଲେ। ବଲିଉଡ୍ର ବ୍ୟାଡ଼ମ୍ୟାନ୍ ଶକ୍ତିକପୁର୍ଙ୍କ ତନୟା ଶ୍ରଦ୍ଧା ବଲିଉଡ୍ରେ ନିଜର ଏକ ସ୍ଵତନ୍ତ୍ର ପରିଚିତି ସୃଷ୍ଟି କରିଛନ୍ତି । ୨୦୧୦ର ’ତିନି ପତି’ ଫିଲ୍ମରେ ଅଭିନୟ କରିଥିଲେ ମଧ୍ୟ ୨୦୧୧ରେ ଆସିଥିବା ‘ଲଭ୍ କା ଦ ଏଣ୍ଡ୍’ରେ ସେ ସମସ୍ତଙ୍କ ଦୃଷ୍ଟି ଆକର୍ଷଣ କରିପାରିଥିଲେ । ୨୦୧୩ରେ ବଲିଉଡ୍ରେ ମୁକ୍ତିଲାଭ କରିଥିବା ‘ଆଶିକି ୨’ରେ ଆରୋହି ଚରିତ୍ରରେ ସେ ରାତାରାତି ଷ୍ଟାର୍ ପାଲଟିଯାଇଥିଲେ । ଏହି ଫିଲ୍ମ ପାଇଁ ଶ୍ରଦ୍ଧା ଫିଲ୍ମଫେୟାର୍ ଶ୍ରେଷ୍ଠ ଅଭିନେତ୍ରୀର ପୁରସ୍କାର ହାତେଇଥିଲେ । ପରବର୍ତ୍ତୀ ସମୟରେ ‘ହାଇଦର୍’, ‘ଏକ୍ ଭିଲେନ୍’, ‘ଏବିସିଡ଼ି-୨’, ‘ଓକେ ଜାନୁ’, ‘ବାଗୀ’, ’ସ୍ତ୍ରୀ’, ‘ବତୀ ଗୁଲ୍ ମିଟ୍ଟର ଚାଲୁ’ ଆଦି ଫିଲ୍ମରେ ନଜର ଆସି ବେଶ୍ ସଫଳତା ସାଉଁଟିଛନ୍ତି । ଶ୍ରଦ୍ଧା ଏବେ ବାହୁବଲୀ ଫେମ୍ ପ୍ରଭାସଙ୍କ ସହ ‘ସାହୋ’ର ଶୁଟିଂରେ ବ୍ୟସ୍ତ ଅଛନ୍ତି । ତାଙ୍କ ଜନ୍ମଦିବସ ଅବସରରେ ସାହୋ’ ଫିଲ୍ମର ଏକ ଟିଜର୍ ରିଲିଜ୍ କରାଯାଇଛି । ସାହୋ ବ୍ୟତୀତ, ଷ୍ଟ୍ରିଟ୍ ଡ୍ୟାନ୍ସର୍, ସାଇନା ନେହ୍ୱାଲ୍ଙ୍କ ଜୀବନୀ ଆଦି ଫିଲ୍ମରେ ସେ ନଜର ଆସିବେ । ତେବେ ବଲିଉଡ୍ ଷ୍ଟାର୍ମାନେ ସବୁବେଳେ ତାଙ୍କ ରିୟଲ୍ ଲାଇଫ୍ ଠାରୁ ରିଲ୍ ଲାଇଫ୍କୁ ନେଇ ବେଶ୍ ଚର୍ଚ୍ଚାରେ ରହିଥା’ନ୍ତି । ‘ଆଶିକି-୨’ର ଅଭିନେତା ଆଦିତ୍ୟ ରୟ କପୁର୍ଙ୍କ ସହ ତାଙ୍କ ସମ୍ପର୍କକୁ ନେଇ ଚର୍ଚ୍ଚାରେ ଥିବାବେଳେ ନିକଟରେ ସେ ଅଭିନେତା ନିର୍ଦ୍ଦେଶକ ଫରହାନ୍ ଅଖତର୍ଙ୍କ ସହ ତାଙ୍କ ସମ୍ପର୍କକୁ ନେଇ ବେଶ୍ ଚର୍ଚ୍ଚାରେ ରହିଥିଲେ । ତେବେ ଶ୍ରଦ୍ଧା ଦୁହିଁଙ୍କ ସହ ତାଙ୍କ ସମ୍ପର୍କକୁ ନେଇ ପୂରାପୂରି ନିରବ ରହିଛନ୍ତି ।
sraddhakapoor celebrates her 32 birthday celebration