ସୀତାରାମ ଅଗ୍ରଓ୍ବାଲ
ବାଣପୁର: ଲକ୍ଡାଉନ୍ ପାଇଁ ବାଣପୁରରେ ଫସି ରହିଥିବା ଆନ୍ଧ୍ର ପ୍ରଦେଶରେ ଦୁଇ ଫୁଲ ବିକାଳୀଙ୍କ ପରିବାର ଆଜି ନିଜ ରାଜ୍ୟକୁ ଫେରିଛନ୍ତି। ଏହି ପରିବାରରେ ଶିଶୁଙ୍କ ସମେତ ୨୭ ଜଣ ସଦସ୍ୟ ରହିଥିଲେ। ସ୍ଥାନୀୟ ସାମ୍ବାଦିକ ସଂଘ ଚିଲିକା ରିପୋଟର୍ସ ଆସୋସିଏସନ୍ ଏବଂ ପ୍ରଶାସନର ସହଯୋଗ ଯୋଗୁଁ ଏହି ପରିବାର ନିଜ ରାଜ୍ୟକୁ ଫେରି ପାରିଛନ୍ତି। ଅପରପକ୍ଷରେ ନିକଟସ୍ଥ ନଚ୍ଛିପୁର ଇଟାଭାଟିରେ କାର୍ଯ୍ୟରତ ଥିବା ଝାଡଖଣ୍ଡ ରାଞ୍ଚିର ୭ ଜଣ ଶ୍ରମିକ ମଧ୍ୟ ପ୍ରଶାସନ ସହଯୋଗରେ ନିଜ ରାଜ୍ୟକୁ ଫେରିଛନ୍ତି।
ସୂଚନାଯୋଗ୍ୟ, ଆନ୍ଧ୍ରପ୍ରଦେଶର ନେଲୁର ଜିଲ୍ଲା ଟେକିଲିମଣ୍ଡଳମ ଥାନା ଅନ୍ତର୍ଗତ ମୋପୁର କ୍ରସ ରୋଡ ଅଞ୍ଚଳର ପ୍ଲାଷ୍ଟିକ ଫୁଲ ବିକାଳୀମାନେ ପଞ୍ଚୁଦୋଳ ଓ ଲୋକମହୋତ୍ସବରେ ବ୍ୟବସାୟ କରିବାକୁ ବାଣପୁରକୁ ଆସିଥିଲେ। ମାତ୍ର କରୋନା ମୁକାବିଲା ପାଇଁ ଭାରତ ସରକାର ଲକ୍ ଡାଉନ୍ ଜାରି କରିବା ପରେ ଆନ୍ଧ୍ର ପ୍ରଦେଶରୁ ବାଣପୁର ଆସିଥିବା ପାଖାପାଖି ୨୭ ଜଣ ବାଣପୁର ଫସି ଯାଇଥିଲେ। ନିଜ ରାଜ୍ୟକୁ ଫେରିବା ପାଇଁ ସାହାଯ୍ୟ କରିବାକୁ କାର୍ଯ୍ୟନିର୍ବାହୀ ଅଧିକାରୀ ଓ ତହସିଲଦାର ଓ ସାମ୍ବାଦିକମାନଙ୍କୁ ଆକୁଳ ନିବେଦନ କରି ଆସୁଥିଲେ। ଏହି ପରିବାରର ସମସ୍ୟାକୁ ନେଇ ଚିଲିକା ରିପୋର୍ଟସ୍ ଆସୋସିଏସନ୍ ଓ କାର୍ଯ୍ୟନିର୍ବାହୀ ଅଧିକାରୀ ସନ୍ତୋଷ ନିଆାଲ୍ ପ୍ରଶାସନିକ ସ୍ତରରେ ଜନଜାତି କଲ୍ୟାଣ ବିଭାଗ ଓ ଶ୍ରମ ଅଧିକାରୀଙ୍କ ଯୋଗାଯୋଗ କରି ୨୭ ଜଣ ସଦସ୍ୟଙ୍କୁ ସେମାନଙ୍କ ନିଜ ପ୍ରଦେଶ ଫେରିବା ପାଇଁ ଅନୁମତି ପତ୍ର ସଂଗ୍ରହ କରିଥିଲେ। ଆଜି ସନ୍ଧ୍ୟାରେ ଏକ ସ୍ବତନ୍ତ୍ରା ବସ୍ ଯୋଗେ ସରକାରୀ ନୀତି ନିୟମ ଅନୁଯାୟୀ ଏହି ଫୁଲ ବିକାଳୀମାନେ ନିଜ ରାଜ୍ୟକୁ ପ୍ରତ୍ୟାବର୍ତ୍ତନ କରିଛନ୍ତି।ଏହି ପରିବାରର ମୁଖ୍ୟ ମୁଡ ଗୋବିନ୍ଦା ତହସିଲ୍ଦାର୍ ଓ ବିଜ୍ଞାପିତ କାର୍ଯ୍ୟନିର୍ବାହୀ ଅଧିକାରୀ ଓ ସାମ୍ବାଦିକ ମାନଙ୍କୁ କୃତଜ୍ଞତା ଜଣାଇଛନ୍ତି।