ଭୁବନେଶ୍ବର : ଲକ୍ଡାଉନ୍ କାରଣରୁ ବିଭିନ୍ନ ରାଜ୍ୟର ପ୍ରବାସୀ ଶ୍ରମିକ ମାନେ ବିଭିନ୍ନ ସ୍ଥାନରେ ଫସି ରହିଛନ୍ତି । ସରକାରଙ୍କ ପକ୍ଷରୁ ବିଭିନ୍ନ ଯୋଜନାର ଘୋଷଣା କରାଯାଉଥିଲେ ମଧ୍ୟ ଏହା ସେମାନଙ୍କ ନିକଟରେ ଅପହଞ୍ଚ । ଏପରି ସ୍ଥିତିରେ ଭୁବନେଶ୍ବରରେ ଫସି ରହିଥିବା ପ୍ରବାସୀ ଶ୍ରମିକଙ୍କୁ ସହାୟତାର ହାତ ବଢାଇଛନ୍ତି ଭାରତୀୟ ସେନାର ଲେଫ୍ଟନାଣ୍ଟ କଲୋନେଲ୍ କପିଲ୍ ଜୋହରୀ । ଖଣ୍ଡଗିରିରେ ଫସି ରହିଥିବା ମରାଠୀ ଶ୍ରମିକଙ୍କୁ ରାସନ୍ ପ୍ୟାକେଟ ପ୍ରଦାନ କରିଛନ୍ତି ଶ୍ରୀ ଜୋହରି । ଡିଫେନ୍ସ ସିକ୍ୟୁରିଟି କର୍ପସ୍ ଏବଂ ଓଏମ୍ୟୁ ଡିଆରଡିଓ ଏହି ମହତ କାର୍ଯ୍ୟରେ ଜୋହରୀଙ୍କ ସହାୟତା କରିଥିଲେ ।
ଏହା ବ୍ୟତିତ ବୁଲା ପଶୁପକ୍ଷୀଙ୍କ ଖାଦ୍ୟପେୟର ବ୍ୟବସ୍ଥା ମଧ୍ୟ କରିଛନ୍ତି ଜୋହରୀ । ୟୁନିଟ୍-1 ସ୍ଥିତ ଗୋଶାଳାରେ ଗାଇଙ୍କ ଖାଦ୍ୟ ପ୍ରଦାନ କରିଥିବା ବେଳେ ଶିଖରଚଣ୍ଡୀ ମନ୍ଦିର ପରିସରରେ ବୁଲୁଥିବା ପଶୁପକ୍ଷୀଙ୍କୁ ମଧ୍ୟ ଖାଦ୍ୟ ପ୍ରଦାନ କରିଥିଲେ । ଭୀମଟାଙ୍ଗିରେ ରହିଥିବା ଅନ୍ୟ ଏକ ଗୋଶାଳା ପରିସର ଭ୍ରମଣ କରିବା ସହିତ ଚାରା ଏବଂ ଖାଦ୍ୟ ପଦାର୍ଥ ପ୍ରଦାନ କରିଥିଲେ ।