ନୂଆଦିଲ୍ଲୀ: ଆପ୍ ଷ୍ଟୋର୍ରୁ ହଟିଲା ଚାଇନିଜ୍ ଆପ୍ ଟିକ୍ଟକ୍। ଟିକ୍ ଟକ୍ ଆପ୍କୁ ଉଭୟ ଆପଲ୍ ଆପ୍ ଷ୍ଟୋର ଓ ଗୁଗଲ୍ ପ୍ଲେ ଷ୍ଟୋରରୁ ହଟାଇ ଦିଆଯାଇଛି।
ଗତକାଲି ଟିକ୍ଟକ୍ ସମେତ 59ଟି ଚୀନ୍ ଆପ୍କୁ ଭାରତ ସରକାରଙ୍କ ପକ୍ଷରୁ ନିଷିଦ୍ଧ ଘୋଷଣା କରାଯାଇଥିଲା। ଏହି ଆପ୍ ଦ୍ୱାରା ଦେଶର ସୁରକ୍ଷା ପ୍ରତି ବିପଦ ସୃଷ୍ଟି ହେଉଥିବା ଜଣାପଡ଼ିଥିଲା। ଆଣ୍ଡ୍ରଏଡ୍ ଓ ଆଇଓଏସ୍ରେ ବ୍ୟବହୃତ ଏହି ଆପ୍ଗୁଡ଼ିକ ଦ୍ୱାରା ଦେଶ ବାହାରକୁ ତଥ୍ୟ ଯାଉଥିବା ମଧ୍ୟ ସୂଚନା ପ୍ରଯୁକ୍ତି ମନ୍ତ୍ରାଳୟ ନିକଟରେ ଏକାଧିକ ଅଭିଯୋଗ ହୋଇଥିଲା। ଏହାପରେ କେନ୍ଦ୍ର ସରକାରଙ୍କ ପକ୍ଷରୁ ଟିକ୍ଟକ୍ ଆପ୍କୁ ନିଷିଦ୍ଧ ଘୋଷଣା କରାଯାଇଥିଲା।
ଗଲଓ୍ବାନ୍ ଭ୍ୟାଲିରେ ଭାରତ ଚୀନ ମଧ୍ୟରେ ସଂଘର୍ଷ ପରଠାରୁ ଦୁଇ ଦେଶ ମଧ୍ୟରେ ସମ୍ପର୍କ ତିକ୍ତ ହେବାରେ ଲାଗିଛି। ଦେଶ ସାରା ଚୀନ ସାମଗ୍ରୀ ବର୍ଜନ ସହିତ ଚୀନ ଜିନିଷ ଭଙ୍ଗାରୁଜା କରାଯାଉଥିବାର ଦେଖାଯାଉଛି। ତେବେ ଏହି ଆପ୍ଗୁଡ଼ିକ ଭାରତର ତଥ୍ୟ ଚୋରାଉଥିବା ଖବର ଆସିବା ପରେ ଅନେକ ଭାରତୀୟ ଏହି ଆପ୍ଗୁଡ଼ିକୁ ନିଜ ମୋବାଇଲ୍ରୁ ଅନ୍ଇନ୍ଷ୍ଟଲ୍ କରିଦେଇଥିଲେ। (ଏଜେନ୍ସି)
