ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଗଂଜାମ ଜିଲ୍ଲାରେ ଲକ୍ଡ଼ାଉନ୍ ଚାଲିଥିବାବେଳେ କେବଳ ତେଜରାତି, ପନିପରିବା, ମାଛ, ମାଂସ ଦୋକାନ ସକାଳ ୬ ରୁ ଦିନ ୧ଟା ପର୍ଯ୍ୟନ୍ତ ଖୋଲିବାକୁ ଅନୁମତି ଅଛି । କିନ୍ତୁ କିଛି ଅନାବଶ୍ୟକ ଦୋକାନଗୁଡ଼ିକ ଏହି ସମୟରେ ଖୋଲି ଲକ୍ଡ଼ାଉନ୍ ନିୟମକୁ ଖୁଲମ୍ଖୁଲା ଉଲ୍ଲଂଗନ କରୁଛନ୍ତି । ଆଜି ପ୍ରଶାସନ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ କରାଯାଇଥିଲା । ଏହି ସମୟରେ ବଡ଼ବଜାର, ଆସିକା ରୋଡ଼୍, ଗିରି ମାର୍କେଟ, ଗୋଷାଣିନୂଆଗାଁ ଅଂଚଳରେ ବିିଭିନ୍ନ ପ୍ରକାର ଦୋକାନଗୁଡ଼ିକ ଖୋଲାଯାଇଥିବା ଦେଖିବାକୁ ମିଳିଥିଲା । କିଛି ଦୋକାନ ସାମାଜିକ ଦୂରତାକୁ ମାନୁନଥିଲେ । ଫଳରେ ୧୮ ଗୋଟି ଦୋକାନକୁ କୋଭିଡ଼୍-୧୯ କଟକଣା ଉଲ୍ଲଂଘନରେ ପ୍ରଶାସନ ପକ୍ଷରୁ ସିଲ୍ କରାଯାଇଛି ।
ଏହା ସହ ବ୍ରହ୍ମପୁର ପୋଲିସ୍ ପକ୍ଷରୁ ୨୯୭ ମାସ୍କ ପିନ୍ଧିନଥିବା ବ୍ୟକ୍ତିଙ୍କଠାରୁ ୫୯ ହଜାର ୪୦୦ ଟଙ୍କା ଜୋରିମାନା, ଗାଡ଼ି ସମ୍ବନ୍ଧୀୟ ୨୨୩ ଜଣଙ୍କଠାରୁ ୧ ଲକ୍ଷ ୧୧ହଜାର ୫୦୦ ଟଙ୍କା ଜୋରିମାନା ଆଦାୟ ହୋଇଛି । ସେହିପରି ଛତ୍ରପୁର ପୋଲିସ୍ ଜିଲ୍ଲା ପକ୍ଷରୁ ମାସ୍କ ପିନ୍ଧିନଥିବା ଅମାନିଆଙ୍କଠାରୁ ୧ଲକ୍ଷ ୨ ହଜାର ଟଙ୍କା ଜୋରିମାନା, ରାତ୍ରୀକାଳୀନ କର୍ଫୁ ଉଲ୍ଲଂଘନରେ ୧୦୦୦ ଟଙ୍କା, କୋଭିଡ଼୍ ନିୟମ ଉଲ୍ଲଂଘନ ବାବଦରେ ଏଫ୍ଆଇଆର୍ ରୁଜୁ ହୋଇ ୨ ଜଣକୁ ଗିରଫ କରାଯାଇଛି ।
