ଭୁବନେଶ୍ୱର, ରାଜଧାନୀର ୟୁନିଟ ୬ ସ୍ଥିତ ଡାକ୍ତର ମାନଙ୍କ ରହିବା ପାଇଁ ଥିବା କ୍ବାର୍ଟରର ଏକ ସୋଫା ଭିତରୁ ବାହାରିଲା ଏକ ସାପ। ଆଶ୍ଚର୍ଯ୍ୟ ହେବାର କିଛି ନାହିଁ। ଏକ ମୂଷାକୁ ଖାଇବା ପାଇଁ ସାପଟି ଘର ଭିତରକୁ ଆସି ସୋଫା ଭିତରେ ପଶିଯାଇଥିଲା। ହେଲେ କେହି ବି ଜାଣିପାରିଲେ ନାହିଁ। ସାପଟି ସୋଫା ଭିତରେ କେମିତି ପଶିଲା ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି।
ଘଟଣାଟି ଥିଲା ଏହିପରି। ସର୍ଜରୀ ସ୍ପେସିଆଲିଷ୍ଟ ଡାକ୍ତର ଭଗବାନ ସାହୁ ତାଙ୍କ ସୋଫା ରେ ପଡିଥିବା ଗଦି ତଳେ କଣ ଗୋଟିଏ ଚଳପ୍ରଚଳ କରୁଥିବା ଦେଖିଲେ। ମୂଷା ଭାବି ତାଙ୍କର ଘରୋଇ ସହାୟକ ବାଡ଼ିରେ ୨-୩ ପାହାର ସୋଫା ଉପରେ କଷି ଦେଲେ। ଭାବିଥିଲେ ଯେ ତଳ ପଟୁ କପଡା କୁ କାଟି ଉପର ପଟେ ଯାଇ ମୂଷା ଟି ପହଞ୍ଚିଲାଣି। ତେବେ ଉପରୁ ହାତ ମାରିବା ପରେ କପଡା ତଳେ କଣ ଗୋଟେ ସଲ ସଲ ହେବାରୁ ସନ୍ଦେହ କରି ଡାକ୍ତର ସାହୁ ସ୍ନେକ ହେଲ୍ପ ଲାଇନ ର ସମ୍ପାଦକ ଶୁଭେନ୍ଦୁ ମଲିଙ୍କ ଙ୍କୁ ଫୋନ କଲେ।
ଖବର ପାଇ ସ୍ନେକ ହେଲ୍ପ ଲାଇନ ସଦସ୍ୟ ଅରୁଣ ବରାଳ ଘଟଣା ସ୍ଥଳରେ ପହଞ୍ଚି, ସୋଫା ଟିକୁ ଅଳ୍ପ ଟିକେ କାଟି ତା ଭିତରେ କଣ ଅଛି ଦେଖିବା ପାଇଁ ଅନୁମତି ମାଗିଲେ । ଛୁରୀ ରେ ଅଳ୍ପ କାଟି ଭିତରକୁ ଦେଖିଲା ପରେ ଅରୁଣ ଏକ ସାପ ର ଦେହ କୁ ସ୍ପଷ୍ଟ ଦେଖି ପାରିଲେ । ସୋଫା କୁ ଆଉ ଟିକେ ଚିରି ସ୍ନେକ ହୁକ ସାହାଯ୍ୟରେ ସାପଟିକୁ ବାହାରକୁ ଧୀରେ ଧୀରେ ଭିଡି ଆଣିବା ପରେ ଏକ ୫ ଫୁଟ ଲମ୍ବାର ଢ଼ମଣା ସାପ ର ମୃତ ଦେହ ବାହାରିଥିଲା। ମୂଷା ଭାବିକି ଯେଉଁ ପାହାର ଆଗରୁ ବସିଥିଲା, ସେଇ ପାହାର ଦ୍ୱାରା ହିଁ ସାପ ଟିର ମୃତ୍ୟୁ ହୋଇଯାଇଥିଲା।
ତେବେ ଏଇ ଘଟଣା ଟି ସ୍ଥାନୀୟ ଅଞ୍ଚଳରେ ଚର୍ଚ୍ଚାର କାରଣ ପାଲଟି ଥିଲା । କେମିତି ସେ ଜାଗାକୁ ସାପ ଟି ଗଲା ପ୍ରଶ୍ନ ର ଉତ୍ତର ଦେଇ ସ୍ନେକ ହେଲ୍ପ ଲାଇନ ର ସମ୍ପାଦକ ଶୁଭେନ୍ଦୁ ମଲ୍ଲିକ କୁହନ୍ତି “ଆଗରୁ ସେଇ ସୋଫା ଟିକି ତଳ ପଟୁ ମୂଷା ନିଶ୍ଚୟ କାଟିଛି । ମୂଷା ଯେଉଁ ବାଟ ଟି ଫିଟେଇଥିଲା ସେଇ ବାଟେ ସାପ ଟି ପଶିଥିଲା ନିଶ୍ଚୟ । ତେବେ ମୂଷା ଖସି ପଳେଇବାକୁ ସକ୍ଷମ ହେଇଥିବା ବେଳେ ସାପ ଟି ଦୁର୍ଭାଗ୍ୟବଶତଃ ମୃତ୍ୟୁ ବରଣ କରିଛି।