ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ପୁଣି ଖାକିରେ ଲାଗିଛି କଳାଦାଗ। ସାରଙ୍ଗଗଡ଼ ଥାନରେ କାର୍ଯ୍ୟକରୁଥିବା ଜନୈକ ମହିଳା ଏସ୍ଆଇ ଖଲିକୋଟ ଥାନା ଏସ୍ଆଇଙ୍କ ବିରୋଧରେ ଆଣିଲେ ଦୁଷ୍କର୍ମ ଅଭିଯୋଗ। ବିବାହର ପ୍ରତିଶ୍ରୁତି ଦେଇ ତାଙ୍କ ସହ ବାରମ୍ବାର ଦୁଷ୍କର୍ମ କରାଯାଉଥିବା ନେଇ ଆଜି ଭୁବନେଶ୍ୱରେ ଡ଼ିଜିଙ୍କୁ ଭେଟି ମହିଳା ଏସ୍ଆଇ ଜଣକ ଅଭିଯୋଗ କରିଛନ୍ତି। ପୁରୁଷ ଏସ୍ଆଇ ବର୍ତ୍ତମାନ ଫେରାର୍ ହୋଇଯାଇଥିବାବେଳେ ଘଟଣାଟି ବର୍ତ୍ତମାନ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି।
ଘଟଣାରୁ ପ୍ରକାଶ ଯେ ଖଲିକୋଟ ଥାନାରେ କାର୍ଯ୍ୟରତ ଥିବା ପୁରୁଷ ଏସ୍ଆଇ ଜଣଙ୍କ ସହ ସାରଙ୍ଗଗଡ଼ ଥାନାରେ ଥିବା ମହିଳା ଏସ୍ଆଇଙ୍କ ଗତ ତିନିବର୍ଷ ହେଲା ପ୍ରେମସଂପର୍କ ଥିଲା। ତାଙ୍କୁ ବିବାହର ପ୍ରତିଶ୍ରୁତି ଦେଇ ବାରମ୍ବାର ଦୁଷ୍କର୍ମ କରିଆସୁଥିଲେ ମଧ୍ୟ ବିବାହ କରିବାକୁ ଅମଙ୍ଗ ହେଉଥିଲେ। କିନ୍ତୁ ମହିଳା ଏସ୍ଆଇ ଜଣଙ୍କ ବାରମ୍ବାର ଜିଦ୍ କରିବାରୁ ସଂପୃକ୍ତ ଏସ୍ଆଇ ତାଙ୍କ ସହ ଏକ ମିଛ ବିବାହ କରିଥିଲେ। କିନ୍ତୁ ପରେ ତାଙ୍କୁ ଧୋକା ଦେଇ ଚାଲିଯାଇଥିଲେ। ଫଳରେ ମହିଳା ଏସ୍ଆଇ ଜଣକ କିଛି ମାସ ତଳେ ତାଙ୍କ ନାମରେ ଉପରିସ୍ଥ ଅଧିକାରୀଙ୍କୁ ଅଭିଯୋଗ କରିଥିଲେ ମଧ୍ୟ ପୋଲିସ୍ ତାଙ୍କୁ ଗିରଫ କରିନଥିଲା। ଫଳରେ ସେ ଘଟଣାର ସୁଯୋଗ ନେଇ କେଉଁଆଡ଼େ ଫେରାର୍ ହୋଇଯାଇଥିଲେ।
ନ୍ୟାୟ ପାଇବାରେ ହତାଶ ହୋଇ ମହିଳା ଏସ୍ଆଇ ଜଣକ ଆଜି ଭୁବନେଶ୍ୱରରେ ପହଞ୍ଚି ଡ଼ିଜିଙ୍କୁ ଅଭିଯୋଗ କରିବା ପରେ ପୁରା ଘଟଣା ଲୋକଲୋଚନକୁ ଆସିପାରିଛି। ତେବେ ଏଠାରେ ଗୋଟିଏ କଥା ସ୍ପଷ୍ଟ ଯେ ସାଧାରଣ ଜନତାଙ୍କୁ ପୋଲିସ୍ ସୁରକ୍ଷା ଦେଉଥିବାବେଳେ ଖୋଦ୍ ସହକର୍ମୀ ଏସ୍ଆଇ ନିଜେ ଅସୁରକ୍ଷିତ ରହିବା ତେବେ ପୋଲିସ୍ ଉପରେ ଲୋକଙ୍କ ଭରଷା ତୁଟିଯିବ। ଏହି ଘଟଣା ପରେ ଗଂଜାମ ଏସ୍ପି ବ୍ରିଜେଶ ରାୟ ତାଙ୍କ ପ୍ରତିକ୍ରିୟାରେ କହିଛନ୍ତି। ଥାନା ଇନସ୍ପେକ୍ଟର ଘଟଣାର ତଦନ୍ତ କରୁଛନ୍ତି। ଘଟଣାର ପ୍ରକୃତ ଅନୁସନ୍ଧାନ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
