ନୂଆଦିଲ୍ଲୀ : ମୋରାଟୋରିୟମ୍ ଉପରେ ସୁଧ ଛାଡ ପ୍ରସଙ୍ଗକୁ ନେଇ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗ୍ରହଣ କରିଛନ୍ତି ସର୍ବୋଚ୍ଚ ନ୍ୟାୟାଳୟ । ମୋରାଟୋରିୟମର ସୁଧଛାଡ ପାଇଁ ସରକାର ଆରବିଆଇ ପଛରେ ଲୁଚି ପାରିବେ ନାହିଁ ବୋଲି ସର୍ବୋଚ୍ଚ କୋର୍ଟ ସ୍ପଷ୍ଟ କରିଛନ୍ତି । ଜଷ୍ଟିସ ଅଶୋକ ଭୂଷଣ, ଆର ସୁଭାଷ ରେଡ୍ଡି ଓ ଏମ୍ ଆର ଶାହାଙ୍କ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରିଥିଲେ । ଲକଡାଉନ କେନ୍ଦ୍ର ସରକାରଙ୍କ ପକ୍ଷରୁ ଲାଗୁ କରାଯାଇଥିଲା ତେଣୁ ଏହାର ଦାୟିତ୍ୱ ମଧ୍ୟ ସରକାର ନିଜ ଉପରକୁ ନେବା ଉଚିତ ବୋଲି କହିବା ସହିତ କେନ୍ଦ୍ର ସରକାରଙ୍କ ଉପରେ ଦାୟିତ୍ୱ ଲଦିଛନ୍ତି ସର୍ବୋଚ୍ଚ କୋର୍ଟ ।
ବିପର୍ଯ୍ୟୟ ପରିଚାଳନା ଆଇନ ଅନୁଯାୟୀ ଏହା କେନ୍ଦ୍ର ସରକାରଙ୍କ ପରିସରରେ ରହିଥିଲେ ମଧ୍ୟ କେନ୍ଦ୍ର ସରକାର ଏହାକୁ ନେଇ କୌଣସି ଘୋଷଣା କରିନାହାନ୍ତି । ଋଣ ଉପରେ ସୁଧ ଛାଡ କରିବା ନିଷ୍ପତ୍ତି ସରକାରଙ୍କର ତେଣୁ ସରକାର ସମସ୍ତ ଦାୟିତ୍ୱ ଆରବିଆଇକୁ ଦେଇ ଖସି ଯାଇ ପାରିବେ ନାହିଁ ବୋଲି କୋର୍ଟ କହିଛନ୍ତି । ପୂର୍ବରୁ ଏହି ପ୍ରସଙ୍ଗରେ ଜୁନ୍ 17 ତାରିଖରେ ସର୍ବୋଚ୍ଚ କୋଟ୍ ବିଚାର ବିମର୍ଶ ପାଇଁ 2 ମାସ ସମୟ ଦେଇଥିଲେ । ପ୍ରାୟ 70 ଦିନ ପରେ ଏହି ପ୍ରସଙ୍ଗରେ ବିଚାର କରାଯାଇଛି । କିନ୍ତୁ ସରକାର ଓ ରିଜର୍ଭ ବ୍ୟାଙ୍କ ଏହି ସମ୍ବନ୍ଧରେ କୌଣସି ଉତ୍ତର ରଖିନଥିବାରୁ ସର୍ବୋଚ୍ଚ କୋର୍ଟ ଅସନ୍ତୁଷ୍ଟ ଜାହିର କରି କଡା ଟିପ୍ପଣୀ ଦେଇଛନ୍ତି । ଆସନ୍ତା ଅଗଷ୍ଟ 31 ତାରିଖରେ ମୋରାଟୋରିୟମ୍ ଅବଧି ଶେଷ ହେବାକୁ ଯାଉଛି । ଏହି ସମୟ ମଧ୍ୟରେ ଯଦି ସରକାର ସୁଧରେ ରିହାତି ନେଇ କୌଣସି ପ୍ରକାରର ନିଷ୍ପତ୍ତି ନେବେ ନାହିଁ । ତେବେ ସେପ୍ଟେମ୍ବର 1 ତାରିଖରେ ସର୍ବୋଚ୍ଚ କୋର୍ଟ କିଛି ତାଙ୍କର ଆଦେଶ ଦେବେ ବୋଲି ସୂଚନା ରହିଛି ।
ତେବେ ଏହି ପ୍ରସଙ୍ଗରେ ଜବାବ ଦାଖଲ ଲାଗି କୋର୍ଟଙ୍କୁ ଏକ ସପ୍ତାହ ସମୟ ମାଗିଥିବା ବେଳେ କୋର୍ଟ ତାହା ମଞ୍ଜୁର କରିଛନ୍ତି। ସରକାର ବିପର୍ଯ୍ୟୟ ପରିଚାଳନା ଅଧିନିୟମ ନେଇ ନିଜର ନୀତି ସ୍ପଷ୍ଟ କରନ୍ତୁ ବୋଲି ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ କୋର୍ଟ ।
