ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଗତ ଅଗଷ୍ଟ ମାସ ୧୫ ତାରିଖରେ କରୋନା ମହାମାରୀ ସମୟରେ ସାଧାରଣ ଲୋକଙ୍କ ସେବା ନିମନ୍ତେ ଏକ ଆପ୍ ସହାୟ ଜାରୀ କରାଯାଇଥିଲା। ଏହି ଆପ୍ ଜରିଆରେ ସାଧାରଣ ଲୋକ ନିଃଶୁଳ୍କ ଡ଼ାକ୍ତରୀ ପରାମର୍ଶ, ଔଷଧ ବିତରଣ, ଆମ୍ବୁଲାନସ ସେବା ସହ ମହାପ୍ରୟାଣ ଗାଡ଼ିର ବ୍ୟବସ୍ଥା କରାଯାଇଛି। ଆଙ୍କୁଲି ଗ୍ରାମର ୩୮ ନଂ ୱାର୍ଡ଼ର ଅକ୍ଷୟ ପଟ୍ଟନାୟକଙ୍କ ଟାଟା କୋଭିଡ଼୍ ହସ୍ପିଟାଲ୍ରେ ମୃତ୍ୟୁ ଘଟିଥିଲା। ମୃତଙ୍କ ପରିବାର ଲୋକ ଏହି ଆପ୍ରେ ମହାପ୍ରୟାଣ ଟିମ୍ ସହ ଯୋଗାଯୋଗ କରିଥିଲେ। ସଂଗେ ସଂଗେ ଏହି ଟିମ୍ ଟାଟା କୋଭିଡ଼୍ ହସ୍ପିଟାଲ୍ରେ ପହଞ୍ଚିଥିଲେ। ସେଠାରେ ପହଞ୍ଚି ଜାଣିବାକୁ ପାଇଲେ ଯେ ବହୁତ ଅର୍ଥ ଖର୍ଚ୍ଚ ହୋଇଥିଲେ ମଧ୍ୟ ଶବ ଦାହ ପାଇଁ କର୍ମଚାରୀର ଅଭାବ ରହିଛି। ତେଣୁ ସହାୟ ମହାପ୍ରୟାଣ ଟିମ୍ର ସଦସ୍ୟ ଏନ୍. ରାଜେନ୍ଦ୍ର କୁମାର, କିରଣ କୁମାର ସାହୁ, ମଧୁସୂଦନ ସାହୁ, ଶିବଶଙ୍କର ନାୟକ, ତୁମ୍ବେଶ୍ୱର ନାୟକ, ରବିନ୍ କୁମାର ସାହୁ, ସନ୍ତୋଷ ବେହେରା ପ୍ରମୁଖ ଶ୍ମଶାନରେ ଉପସ୍ଥିତ ରହି ଦାହ କରିଥିଲେ। ସହାୟ ଆପ୍ର ସଂଯୋଜକ ଶିବପ୍ରସାଦ ପାତ୍ର ସଂଯୋଜନା କରିଥିଲେ। କାର୍ଯ୍ୟକର୍ତ୍ତାଙ୍କ ଏହି ସେବାକୁ ଜିଲ୍ଲା ସଭାପତି ବିଭୂତି ଜେନା ଭୂୟଶୀ ପ୍ରଶଂସା କରିଛନ୍ତି।
