ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଗଂଜାମରେ ଆଜି ୭୧ ଜଣ ସଂକ୍ରମିତ ଚିହ୍ନଟ ହୋଇଥିବାବେଳେ ୪ ଜଣଙ୍କ ମୃତ୍ୟୁ ଘଟିଛି। ଗତ ଚାରିଦିନ ମଧ୍ୟରେ ୧୩ ଜଣଙ୍କ ମୁଣ୍ଡ ନେଲାଣି କରୋନା। କେବେ ଏହି ମୃତ୍ୟୁରେ ବ୍ରେକ୍ ଲାଗିବ ତାହା ଜଣାପଡ଼ୁନି। ମାତ୍ର ୭୨୯ ଜଣ ଆକ୍ଟଭ୍ କେସରେ ୪ ଜଣଙ୍କ ମୃତ୍ୟୁ ଘଟିଛି। ମୃତକ ମଧ୍ୟରେ ଜଣେ ୬୨ ବର୍ଷୀୟ ବୃଦ୍ଧ, ଜଣେ ୬୦ ବର୍ଷୀୟ ବୃଦ୍ଧ, ଜଣେ ୫୫ ବର୍ଷୀୟ ବୃଦ୍ଧ ଏବଂ ଜଣେ ୬୫ ବର୍ଷୀୟ ବୃଦ୍ଧଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି। ଏଭଳି ମୃତ୍ୟୁର ମୁଖ୍ୟ କାରଣ ହେଉଛି ଲୋକମାନେ ଲକ୍ଷଣ ପ୍ରକାଶ ପାଇବାର ବହୁ ଦିନ ପରେ ପରୀକ୍ଷା କରି ଚିକିତ୍ସା କରିବା। ଫଳରେ ରୋଗ ଦେହରେ ବଢ଼ିଯାଇ ଅକାଳରେ ମୃତ୍ୟୁ ଘଟୁଛି।
ଏହାକୁ ଦୃଷ୍ଟିରେ ରଖି ପ୍ରଶାସନ ଗତ ୮ ତାରିଖଠାରୁ ସାରା ଜିଲ୍ଲାରେ “ଅକ୍ସିଜେନ୍ ଚେକିଂ କେମ୍ପନିଂ” ଆରମ୍ଭ କରିଛି। ୮ ତାରିଖ ଦିନ ସମୁଦାୟ ୧ଲକ୍ଷ ୧୭ହଜାର ୫୬୦ ଜଣ ଲୋକଙ୍କ ସ୍କିନିଂ ସହ ଅକ୍ସିଜେନ୍ ଲେବଲ ଯାଞ୍ଚ କରାଯାଇଥିଲା। ସେଥିମଧ୍ୟରୁ ୪୩ ଜଣଙ୍କ ଶରୀରରେ କମ୍ ଅକ୍ସିଜେନ ସ୍ତର ଥିବା ଜଣାପଡ଼ିବା ପରେ ସେମାନଙ୍କୁ ଚିକିତ୍ସା ସୁବିଧା ଯୋଗାଇ ଦେବାକୁ ନିଷ୍ପତ୍ତି ହୋଇଛି। ଏହି ଅକ୍ସିଜେନ୍ ଯାଞ୍ଚ ଫଳରେ ଅତିଶୀଘ୍ର ଲକ୍ଷଣ ରୋଗୀଙ୍କୁ ଚିହ୍ନଟ କରି ଚିକିତ୍ସା କରାଯାଇପାରିବ। ଯାହାଫଳରେ ମୃତ୍ୟୁସଂଖ୍ୟାରେ ହ୍ରାସ ହେବ ବୋଲି ଅନୁମାନ କରାଯାଉଛି।
ଆଜି ସଂକ୍ରମିତ ମଧ୍ୟରେ ୫୬ ଜଣ ସ୍ଥାନୀୟ ସଂକମ୍ରିତ, ୩ ଜଣଙ୍କ ଟ୍ରାଭେଲ୍ ହିଷ୍ଟ୍ରି ଏବଂ ୧୨ ଜଣ କରୋନା ଯୋଦ୍ଧା ରହିଛନ୍ତି। ବେଲଗୁଣ୍ଠା, ଧରାକୋଟ, ଦିଗପହଣ୍ଡି, ଜଗନ୍ନାଥପ୍ରସାଦ, କୁକୁଡ଼ାଖଣ୍ଡି, ପାତ୍ରପୁର, ଶେରଗଡ଼ ବ୍ଲକ୍ରେ ମଧ୍ୟ ସଂକ୍ରମଶ ଆଜି ଶୂନ ରହିଛି। ଆସିକା ବ୍ଲକ୍ରୁ ୧, ବେଗୁନିଆପଡ଼ାରୁ ୬, ବ୍ରହ୍ମପୁର ମହାନଗରନିଗମରୁ ୯, ଭଂଜନଗରରୁ ୭, ବୁଗୁଡ଼ାରୁ ୪, ଛତ୍ରପୁରରୁ ୬, ଚିକିଟିରୁ ୧, ଗଂଜାମରୁ ୩, ହିଂଜିଳିକାଟୁରୁ ୧, କବିସୂର୍ଯ୍ୟନଗରରୁ ୧, ଖଲିକୋଟରୁ ୨, ପୋଲସରାରୁ ୬, ପୁରୁଷୋତ୍ତମପୁରରୁ ୧, ରଙ୍ଗେଇଲୁଣ୍ଡାରୁ ୩, ସାନଖେମୁଣ୍ଡିରୁ ୨, ସୋରଡ଼ାରୁ ୨, ଅନ୍ୟାନ୍ୟ ୧ ରହିଛନ୍ତି। ସମୁଦାୟ ସଂକ୍ରମିତ ସଂଖ୍ୟା ୧୮୮୮୩ ହୋଇଥିବାବେଳେ ଆଜି ୯୮ ଜଣ ସୁସ୍ଥ ହେବା ପରେ ସୁସ୍ଥ ସଂଖ୍ୟା ୧୮୦୩୧କୁ ବୃଦ୍ଧି ପାଇଛି। ବର୍ତ୍ତମାନ ୬୩୧ ଜଣ ଚିକିତ୍ସିତ ହେଉଥିବାବେଳେ ୨୧୩ ଜଣଙ୍କ ମୁଣ୍ଡ ନେଲାଣି କରୋନା।