ସୀତାରାମ ଅଗ୍ରଓ୍ବାଲ
ବାଲୁଗାଁ : ଆଜି ମଧ୍ୟାହ୍ନ ରେ ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଲୁଗାଁ ରେଳ ଷ୍ଟେସନ ରେ ଘଟିଛି ଏକ ଅଭାବନୀୟ ଘଟଣା । ଜଣେ ଯାତ୍ରୀ ଟ୍ରେନରେ ଚଢ଼ୁଥିବାବେଳେ ଅସାବଧାନତା ବଶତଃ ଖସିପଡ଼ି ହରାଇଛନ୍ତି ଗୋଟେ ହାତ। ସୂଚନା ମୁତାବକ ଗଞ୍ଜାମ ଜିଲ୍ଲା ପୋଲସରା ଅଞ୍ଚଳର ପ୍ରଫୁଲ ସାହୁ(35) ସୁରତରେ କାମ କରିବାକୁ ଯିବାପାଇଁ ଆଜି ପୁରୀ-ଗାନ୍ଧୀଧାମ ଏକ୍ସପ୍ରେସ ରେ ଟିକେଟ କରିଥିଲେ। ତାଙ୍କ ଟିକେଟ ଖୋର୍ଦ୍ଧା ରୁ ସୁରତ ଯାଏଁ ଥିଲା। ହେଲେ ବାଲୁଗାଁ ଷ୍ଟେସନରୁ ଗାନ୍ଧୀଧାମ ଏକ୍ସପ୍ରେସରେ ତାଙ୍କ ଆସବାବପତ୍ର ସହ ଚଢିବା ସମୟରେ ଅସାବଧାନତା ବଶତଃ ଟ୍ରେନ ରୁ ଖସି ପଡ଼ିଥିଲେ ଫଳରେ ଟ୍ରେନ ଚକାତଳେ ଚାପିହୋଇ ତାଙ୍କ ବାମ ହାତଟି ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ବାଲୁଗାଁ ରେଳ ସୁରକ୍ଷା ବଳ ପ୍ରଫୁଲ୍ଲଙ୍କୁ ଟ୍ରାକ ରୁ ଉଦ୍ଧାର କରି ବାଲୁଗାଁ ଅଗ୍ନିଶମ ଅଧିକାରୀ ନିତ୍ୟାନନ୍ଦ ଜେନାଙ୍କୁ ଖବର ଦେଇଥିଲେ। ପରବର୍ତ୍ତୀ ସମୟରେ ବାଲୁଗାଁ ଅଗ୍ନିଶମ ବିଭାଗ ଗୁରୁତର ଅବସ୍ଥାରେ ପ୍ରଫୁଲ ଙ୍କୁ ଉଦ୍ଧାର କରି ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଛନ୍ତି। ହେଲେ ବର୍ତ୍ତମାନ ଡାକ୍ତର ତାଙ୍କୁ ବ୍ରହ୍ମପୁର ବଡ଼ ମେଡିକାଲ କୁ ସ୍ଥାନାନ୍ତରିତ କରିଥିବାର ସୂଚନା ମିଳିଛି।
