ବଣ୍ଡା (ୟୁପି): ବର୍ତ୍ତମାନର ବିଜ୍ଞାନ ଯୁଗରେ ମଧ୍ୟ ଲୋକେ ଅନ୍ଧବିଶ୍ବାସର ଶିକାର ହୋଇ ନିଜ ଜୀବନକୁ କ୍ଷତି ପହଞ୍ଚାଇବାକୁ ମଧ୍ୟ ପ୍ରୟାସ କରୁଛନ୍ତି। ଉତ୍ତରପ୍ରଦେଶର ଦୁଇଟି ପୃଥକ ପୃଥକ ଘଟଣାରେ ଦୁଇଜଣ ବ୍ୟକ୍ତି କିପରି ଅନ୍ଧବିଶ୍ବାସର ବଶବର୍ତ୍ତୀ ହୋଇ ନିଜ ଶରୀରର କ୍ଷତି ପହଞ୍ଚାଉଛନ୍ତି ଜାଣିଲେ ଆଶ୍ଚର୍ଯ୍ୟ ହେବେ। ବାବେରୁ ଅଞ୍ଚଳର ଭାଟି ଗ୍ରାମରେ ଥିବା ଏକ ମନ୍ଦିରରେ ଜଣେ ୨୨ ବର୍ଷୀୟ ଯୁବକ ନିଜର ଜିଭ କାଟି ଦେବୀଙ୍କୁ ଅର୍ପଣ କରିଥିବା ବେଳେ ଆଉ ଜଣେ ବ୍ୟକ୍ତି ଶିବ ମନ୍ଦିରରେ ନିଜର ଗଳା କାଟି ବଳି ଦେବାକୁ ଉଦ୍ୟମ କରୁଛନ୍ତି।
ପୋଲିସ ସୂଚନା ଅନୁଯାୟୀ, ଆତ୍ମା ରାମ ନାମକ ଜଣେ ଯୁବକ ଗତକାଲି ନବରାତ୍ରୀ ମନ୍ଦିରରେ ପହଞ୍ଚି ଜିଭ କାଟି ଦେବୀଙ୍କୁ ଅର୍ପଣ କରିଥିଲେ। ପରବର୍ତ୍ତୀ ସମୟରେ ତାଙ୍କ ପାଟିରୁ ରକ୍ତସ୍ରାବ ହେବାରୁ ସ୍ଥାନୀୟ ଲୋକେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଇଥିଲେ। ବର୍ତ୍ତମାନ ତାଙ୍କ ସ୍ୱାସ୍ଥ୍ୟ ଅବସ୍ଥା ସ୍ଥିର ଅଛି ବୋଲି ପୋଲିସ କହିଛି।
ସେହିପରି ଅନ୍ୟ ଏକ ଘଟଣାରେ ହମିରପୁର ଜିଲ୍ଲାର କୁରାରା ଅଞ୍ଚଳର ଏକ ଶିବ ମନ୍ଦିରରେ ଜଣେ ୪୯ ବର୍ଷୀୟ ପୁରୁଷ ନିଜକୁ ବଳି ଦେବା ପାଇଁ ଉଦ୍ୟମ କରିଥିଲେ। ଶନିବାର ରାତିରେ କୋଟେଶ୍ୱର ମନ୍ଦିରରେ ଛୁରୀ ସାହାଯ୍ୟରେ ରୁକ୍ମଣୀ ମିଶ୍ର ତାଙ୍କ ଗଳା କାଟିବାକୁ ଚେଷ୍ଟା କରିଥିଲେ। ସେ ଗୁରୁତର ଆହତ ହୋଇ ତୁରନ୍ତ ଡାକ୍ତରଖାନାରେ ଭର୍ତ୍ତି ହୋଇଥିଲେ।ବର୍ତ୍ତମାନ ତାଙ୍କ ଅବସ୍ଥା ସ୍ଥିର ଥିବା କୁହାଯାଉଛି। (ଏଜେନ୍ସି)
