ଇସ୍ରାଏଲ୍ ଉପରେ ରକେଟ ମାଡ ହେବାର ଏକ ଘଣ୍ଟା ମଧ୍ୟରେ ପ୍ରତିଆକ୍ରମଣ କରିଛି ଇସ୍ରାଏଲ୍। ରକେଟ୍ ମାଡ ନେଇ ହମାସକୁ ଦୋଷ ଦେବା ସହିତ ଇସ୍ରାଏଲ୍ ଗାଜା ଉପରେ ତୁରନ୍ତ ଆକ୍ରମଣ ଆରମ୍ଭ କରିଥିଲା। ଇସ୍ରାଏଲୀ ସାମରିକ ବଳ (ଆଇଡିଏଫ୍) ସୂଚନା ଅନୁଯାୟୀ ଏହି ଆକ୍ରମଣରେ ହମାସ ତରଫରୁ ଇସ୍ରାଏଲୀ ସାମରିକ ମୁଖ୍ୟ କାର୍ଯ୍ୟାଳୟକୁ ଟାର୍ଗେଟ୍ କରାଯାଇଥିଲା। ହମାସ ପକ୍ଷରୁ କରାଯାଇଥିବା ଏହି ଆକ୍ରମଣରେ ୭ ଜଣ ଲୋକ ଆହତ ହୋଇଥିଲେ। ଏହାର ପ୍ରତିବାଦରେ ଏକ ଘଣ୍ଟା ମଧ୍ୟରେ ୧୨ଟି ରକେଟ ମାଡ କରାଯାଇଥିଲା। ଏହି ଆକ୍ରମଣ ସମୟରେ ଆମେରିକାରେ ଥିବା ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ କହିଛନ୍ତି ଏପରି ଆକ୍ରମଣକୁ ଇସ୍ରାଏଲ କଦାପି ବରଦାସ୍ତ କରିବ ନାହିଁ। ଏହାପରେ ନିଜର ଗସ୍ତକୁ କାଣ୍ଟଛାଣ୍ଟ କରିବା ସହିତ ଟ୍ରମ୍ପକୁ ଭେଟିବା ପରେ ଇସ୍ରାଏଲ୍ ଫେରି ଆସିବା ନେଇ ସୂଚନା ଦେଇଛନ୍ତି ନେତନ୍ୟାହୁ। କୌଣସି ପାଲେଷ୍ଟାଇନ୍ ଆତଙ୍କୀ ସଙ୍ଗଠନ ଏନେଇ ନିଜକୁ ଦାୟୀ କରିନାହାନ୍ତି। ଆସନ୍ତା ୯ ତାରିଖରେ ଇସ୍ରାଏଲ୍ର ସାଧାରଣ ନିର୍ବାଚନ ଅନୁଷ୍ଠିତ ହେବାକୁ ଯାଉଛି।
