ରମେଶ ମହାନ୍ତି
ଜଗତସିଂହପୁର: ଜଗତସିଂହପୁର ଜିଲ୍ଲା କୃଷି କାର୍ଯ୍ୟ ନିର୍ଦ୍ଧାରଣ କମିଟି ବୈଠକ ଆଜି ଜିଲ୍ଲାପାଳଙ୍କ କାର୍ଯ୍ୟାଳୟର ସଦ୍ଭାବନା ସଭାଗୃହଠାରେ ଅନୁଷ୍ଠିତ ହୋଇଯାଇଛି। ଏହି ବୈଠକରେ ଜିଲ୍ଲାପାଳ ସରୋଜ କୁମାର ମିଶ୍ର ଅଧ୍ୟକ୍ଷତା କରି କହିଲେ ଜଗତସିଂହପୁର ଏକ କୃଷି ପ୍ରଧାନ ଜିଲ୍ଲା। ଆଗାମୀ ରବି ଋତୁରେ ଜିଲ୍ଲାର ୯୯,୫୦୦ ହେକ୍ଟର ଜମିରେ ରବିଚାଷ କରାଯିବ। ଜିଲ୍ଲାରେ ଅଧିକ ଡାଲି ଜାତୀୟ ଫସଲ, ତୈଳବୀଜ ଓ ପନିପରିବା ଚାଷ ପାଇଁ ଉନ୍ନତ ମାନର ବିହନ, ସାର ଓ କୀଟନାଶକ ଔଷଧ ଚାଷୀମାନଙ୍କୁ ଯୋଗାଇ ଦେବାକୁ କୃଷି ଅଧିକାରୀମାନଙ୍କୁ ପରାମର୍ଶ ଦେଇଥିଲେ। ବାସୁମତି ଭଳି ବାସନା ଧାନ ଚାଷ ନିମନ୍ତେ ଚାଷୀଙ୍କୁ ପ୍ରୋତ୍ସାହିତ କରିବାକୁ ଜିଲ୍ଲାପାଳ ଗୁରୁତ୍ୱାରୋପ କରିଥିଲେ। ରାସାୟନିକ ସାର ବ୍ୟତୀତ ଜୈବୀକ ସାର ବ୍ୟବହାର କରିବାକୁ ଜିଲ୍ଲାପାଳ ପରାମର୍ଶ ଦେଇଥିଲେ। ପ୍ରତ୍ୟେକ ବ୍ଲକରେ ଅନ୍ୟୁନ ଗୋଟିଏ ଗୋଟିଏ ଯାଗାରେ ବାସୁମତି ଧାନଚାଷ କରାଗଲେ, ଚାଷୀମାନେ ଅଧିକ ଲାଭବାନ ହୋଇ ପାରିବେ। ବୈଠକରେ ଯୋଗଦେଇ ଜିଲ୍ଲା ମୁଖ୍ୟ କୃଷି ଅଧକାରୀ ରବି ନାରାୟଣ ମହାପାତ୍ର ଖରିଫ୍ ଋତୁର ସଫଳତା ସଂପର୍କରେ ଅବଗତ କରାଇଥିଲେ।
ରବି ଫସଲ ପାଇଁ ଜଳସେଚନ ଏବଂ ମାଟିର ଆଦ୍ରତାକୁ ଦୃଷ୍ଟିରେ ରଖି ୧୫୭୦ ହେକ୍ଟର ଜମିରେ ଧାନଚାଷ, ମକା ୧୧୦ ହେକ୍ଟର, ମୁଗ ପାଇଁ ୪୬,୪୪୦ ହେକ୍ଟର, ବିରି ପାଇଁ ୧୫,୨୧୦ ହେକ୍ଟର, କୋଳଥ ୧୯୦୫ ହେକ୍ଟର ଚାଷ କରାଯିବା ପାଇଁ ଲକ୍ଷ୍ୟ ରଖାଯାଇଛି। ଜିଲ୍ଲାରେ ମୋଟ ଡାଲି ଜାତୀୟ ଫସଲ ପାଇଁ ୬୪,୦୨୫ ହେକ୍ଟର, ତୈଳବୀଜ ପାଇଁ ୩୩୬୦ ହେକ୍ଟର, ପନିପରିବା ପାଇଁ ୨୬,୫୨୫ ହେକ୍ଟର, ମସଲା ଜାତୀୟ ଚାଷ ପାଇଁ ୩୧୧୦ ହେକ୍ଟର ଓ ଆଖୁ ଚାଷ ପାଇଁ ୮୦୦ ହେକ୍ଟର ଚାଷ କରାଯିବା ପାଇଁ ଲକ୍ଷ୍ୟ ରଖାଯାଇଛି। ତୈଳବୀଜ ମଧ୍ୟରେ ବାଦାମ ପାଇଁ୨୪୦୦ ହେକ୍ଟର, ସୋରିଷ ପାଇଁ ୬୮୦ ହେକ୍ଟର, ସୂର୍ଯ୍ୟମୂଖୀ ଚାଷ ପାଇଁ ୨୧୦ ହେକ୍ଟର, ପନିପରିବା ମଧ୍ୟରେ ଆଳୁପାଇଁ ୭୩୦ ହେକ୍ଟର, ପିଆଜ ପାଇଁ ୨୪୦ ହେକ୍ଟର, ମସଲା ଜାତୀୟ ଯଥା ଲଙ୍କା ପାଇଁ ୨୪୦୦ ହେକ୍ଟର, ରସୁଣ ଚାଷ ପାଇଁ ୧ ୮୦ ହେକ୍ଟର, ଧନିଆ ପାଇଁ ୫୩୦ ହେକ୍ଟର ଚାଷ ହେବାର ଲକ୍ଷ ଧାର୍ଯ୍ୟ ରହିଛି।
ଏହାଛଡା ଚଳିତ ରବିଋତୁରେ ୪୭,୭୭୯ ହେକ୍ଟର ଜମିରେ ଜଳ ସେଚନ ସୁବିଧା କରାଯିବା ସହିତ ୩୬୬୯ ମେଟ୍ରିକ୍ ଟ୍ରନ ସାର ପ୍ରୟୋଗ ନିମନ୍ତେ ବ୍ୟବସ୍ଥା କରାଯିବ। ଫସଲର ସୁରକ୍ଷା ଓ ଅଧିକ ଅମଳ ନିମନ୍ତେ ୪୬,୧୫୦ ହେକ୍ଟର ଜମିରେ କୀଟନାଶକ ପ୍ରୟୋଗ ଓ ଅନ୍ୟାନ୍ୟ ଆବଶ୍ୟକୀୟ ବ୍ୟବସ୍ଥା ଗ୍ରହଣ କରାଯିବ ବୋଲି ବୈଠକରେ ଆଲୋଚନା କରାଯାଇଥିଲା। ଜିଲ୍ଲାର ଚାଷୀମାନଙ୍କୁ ପ୍ରଶିକ୍ଷଣ ପ୍ରଦାନ କରାଯିବା ସହିତ ଉଦ୍ୟାନକୃଷି ବିଭାଗ ପକ୍ଷରୁ ହାଇବ୍ରିଡ୍ ପନିପରିବା, ଅମୃତଭଣ୍ଡା, ପିଆଜ, ଆଳୁ, ଛତୁ ଚାଷ ନିମନ୍ତେ ପ୍ରୋତ୍ସାହନ ଯୋଗାଇ ଦିଆଯାଉଛି ବୋଲି ସହକାରୀ ନିର୍ଦ୍ଦେଶକ ଉଦ୍ୟାନ କୃଷି ଅଧିକାରୀ ସୂଚନା ଦେଇଥିଲେ।
ଏହା ବ୍ୟତୀତ ମାଗଣା ଭେଜିଟେବୁଲ ମିନିକିଟ୍, ନଡିଆ ଚାରା ବଣ୍ଟନ କରାଯିବାର କାର୍ଯ୍ୟକ୍ରମ ରହିଛି। ବୈଠକରେ ଯୋଗଦେଇ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ସରୋଜକାନ୍ତ ମହାନ୍ତି ଡାଲି ଓ ତୈଳବୀଜ ଫସଲକୁ ପ୍ରାଧାନ୍ୟ ଦେବା ସହିତ ସରକାରଙ୍କ ଦ୍ୱାରା କରାଯାଉଥିବା ବିଭିନ୍ନ କୃଷି ଯୋଜନା ଓ ପ୍ରୋତ୍ସାହନ ସଂପର୍କରେ ଚାଷୀମାନଙ୍କୁ ସଚେତନ କରିବାକୁ ପରାମର୍ଶ ଦେଇଥିଲେ। ବୈଠକରେ ପ୍ରଧାନମନ୍ତ୍ରୀ ଫସଲ ବୀମା ଯୋଜନା, ଭାଗଚାଷୀଙ୍କୁ ଋଣ ପ୍ରଦାନ ନିମନ୍ତେ ବଳରାମ ଯୋଜନା, ଫାର୍ମ ମେକାନାଇଜେସନ୍, ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନା, ଜଳନିଧି, ସୈାର ଜଳନିଧି, ଫାର୍ମପଣ୍ଡ, ରାଷ୍ଟ୍ରିୟ କୃଷି ବିକାଶ ଯୋଜନା, ଜାତୀୟ ଖାଦ୍ୟ ସୁରକ୍ଷା ମିଶନ୍, ଆତ୍ମା ବିଷୟରେ ଆଲୋଚନା ହୋଇଥିଲା।
ଏହି ବୈଠକରେ ଜିଲ୍ଲା ସମବାୟ ନିବନ୍ଧକ, ଡିଡିଏମ୍, ନାବାର୍ଡ ବିଶ୍ୱଭୁଷଣ ମହାନ୍ତି,ଏଲ୍.ଡି.ଏମ୍ ସତୀଶ ପାତ୍ର, ଜଳସେଚନ ଓ ଉଠାଜଳ ସେଚନ ନିର୍ବାହୀ ଯନ୍ତ୍ରୀ, କୃଷି ବିଜ୍ଞାନ କେନ୍ଦ୍ରର ବୈଜ୍ଞାନିକ, ଜିଲ୍ଲା କୃଷି ଅଧିକାରୀ, ବ୍ଲକ କୃଷି
ଅଧିକାରୀ ସମେତ ବିଭିନ୍ନ ବ୍ୟାଙ୍କର କର୍ମକର୍ତ୍ତାମାନେ ଉପସ୍ଥିତ ଥିଲେ।
