ନୂଆଦିଲ୍ଲୀ, ବାରମ୍ବାର ବୈଠକ ବସୁଛି, ଘଣ୍ଟା ଘଣ୍ଟା ଆଲୋଚନା ହେଉଛି, ହେଲେ ସମାଧାନ ହୋଇପାରୁ ନାହିଁ। ସରକାର କୃଷି ବିଲ ପ୍ରତ୍ୟାହାର କରିବା ପାଇଁ ରାଜି ନାହାଁନ୍ତି, ସେପଟେ ଚାଷି ସଂଗଠନ ବିଲ ପ୍ରତ୍ୟାହାର ନାହିଁ ତ ଆନ୍ଦୋଳନ ପ୍ରତ୍ୟାହାର ନାହିଁ ଜିଦରେ ଅଛନ୍ତି। ଫଳରେ ଦୀର୍ଘଦିନ ଧରି ଚାଲିଥିବା ଚାଷି ଆନ୍ଦୋଳନ ବଢିବାରେ ଲାଗିଛି।
ସୋମବାର ଦିନ ମଧ୍ୟ ଚାଷୀ ସଂଗଠନ ସହିତ କେନ୍ଦ୍ର ସରକାରଙ୍କ ପ୍ରତିନିଧୀଙ୍କ ସହିତ ଦୀର୍ଘ ସମୟ ଧରି ଆଲୋଚନା ହେବା। ନୂଆଦିଲ୍ଲୀର ବିଜ୍ଞାନ ଭବନରେ ଆୟୋଜିତ ଏହି ବୈଠକରେ ଦେଶର 41ଟ ଚାଷୀ ସଂଗଠନର ପ୍ରତିନିଧି ଯୋଗଦେଇଥିଲେ।
ସେହିପରି ସରକାରଙ୍କ ତରଫରୁ କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର, ରେଳବାଇ, ବାଣିଜ୍ୟ ଏବଂ ଶିଳ୍ପ ଏବଂ ଉପଭୋକ୍ତା ବ୍ୟାପାର ମନ୍ତ୍ରୀ, ଖାଦ୍ୟ ଏବଂ ଜନସାଧାରଣ ବଣ୍ଟନ ମନ୍ତ୍ରୀ ପୀୟୁଷ ଗୋୟାଲ ଏବଂ କେନ୍ଦ୍ର ବାଣିଜ୍ୟ ଓ ଶିଳ୍ପ ମନ୍ତ୍ରୀ ସୋମ ପ୍ରକାଶଙ୍କ ସହିତ ଆଲୋଚନା ହୋଇଥିଲା। ହେଲେ କୌଣସି ସୁଫଳ ମିଳି ନ ଥିଲା।
ଏହି ବୈଠକ ପ୍ରାରମ୍ଭରେ ମୃତ ଚାଷୀଙ୍କ ପାଇଁ ସମସ୍ତେ ଏକ ମିନିଟ ପାଇଁ ନିରବ ପ୍ରାର୍ଥନା କରିିଥିଲେ। ଏହାପରେ ଚାଷୀ ନେତାଙ୍କୁ ବୁଝାଇବା ପାଇଁ ତିନି ମନ୍ତ୍ରୀ ଲାଗିପଡି ଥିଲେ। ହେଲେ ଚାଷୀ ନେତା ସେମାନଙ୍କ ଭାଷଣକୁ ଶୁଣିବା ମୁଡରେ ନ ଥିଲେ। ଫଳରେ ପୁଣିଥରେ ସେହି ବୈଠକ ବିଫଳ ହେଲା ବୋଲି ଚାଷୀ ନେତାମାନେ କହିଥିଲେ।
ସେପଟେ କୃଷିମନ୍ତ୍ରୀ କହିଛନ୍ତି ଯେ ଆଲୋଚନା ଠିକଠାକ୍ ଚାଲିଛି। ପୁଣିଥରେ ଚାଷୀମାନଙ୍କ ସହିତ ଆସନ୍ତା 8 ତାରିଖରେ ବୈଠକ ବସିବ। ସେହି ବୈଠକରେ ଏକ ନିସ୍କର୍ଷ ବାହାରିବ ବୋଲି ଆଶା କରାଯାଉଛି। ବର୍ତ୍ତମାନ କେନ୍ଦ୍ର ସରକାର ଏବଂ ଚାଷୀଙ୍କ ମଧ୍ୟରେ ସାତ ଥର ଆଲୋଚନା ହୋଇସାରିଲାଣି। ତଥାପି କୈଣସି ସମାଧାନ ହୋଇପାରୁ ନାହିଁ।