ଲକ୍ଷ୍ନୌ: ଚଳିତ ବର୍ଷ ଏପ୍ରିଲ ୧ ତାରିଖରୁ ଉତ୍ତରପ୍ରଦେଶରେ ନୂତନ ଅବକାରୀ ନୀତି ଲାଗୁ ହେବା ସହିତ ମଦ ମୂଲ୍ୟରେ ବୃଦ୍ଧି ଘଟିବ। ଶନିବାର ଦିନ ଉତ୍ତରପ୍ରଦେଶ କ୍ୟାବିନେଟ ଦ୍ୱାରା ନୂତନ ଅବକାରୀ ନୀତି ୨୦୨୩-୨୪ ଅନୁମୋଦନ ହୋଇଛି। ସରକାର ଦେଇଥିବା ବିବୃତ୍ତି ଅନୁଯାୟୀ ବିଦେଶୀ ମଦ, ବିୟର, ଭାଙ୍ଗ ଏବଂ ମଡେଲ ଦୋକାନଗୁଡ଼ିକର ଖୁଚୁରା ଦୋକାନ ପାଇଁ ଲାଇସେନ୍ସ ଶୁଳ୍କ ୧୦% ବୃଦ୍ଧି କରାଯାଇଛି। ନୂତନ ଅବକାରୀ ନୀତିରେ ସରକାର ମଡେଲ ଦୋକାନଗୁଡିକରେ କ୍ୟାଣ୍ଟିନ୍ ସୁବିଧା ଚଳାଇବା ପାଇଁ ବର୍ତ୍ତମାନର ୨ ଲକ୍ଷରୁ ୩ ଲକ୍ଷ ଟଙ୍କାକୁ ବୃଦ୍ଧି କରିଛନ୍ତି।
ନୂତନ ନୀତି ସହିତ ସରକାର ବିଦେଶୀ ମଦ, ବିୟର, ମଦ ଗୋଦାମ ଲାଇସେନ୍ସ ପାଇଁ ଶୁଳ୍କ ଏବଂ ସୁରକ୍ଷା ଜମା ବୃଦ୍ଧି କରିଛନ୍ତି। ମାଷ୍ଟର ଗୋଦାମର ପଞ୍ଜୀକରଣ ଏବଂ ନବୀକରଣ ଶୁଳ୍କ ମଧ୍ୟ ବୃଦ୍ଧି କରାଯାଇଛି। ଉତ୍ତରପ୍ରଦେଶର ଲିକୋର ବିକ୍ରେତା କଲ୍ୟାଣ ସଂଘର ଦେବଶ ଜୟସ୍ଵାଲ କହିଛନ୍ତି, “ଲାଇସେନ୍ସ ଫି ବୃଦ୍ଧି ଏବଂ ଗୋଡାଉନ୍ ଲାଇସେନ୍ସ ସହିତ କ୍ୟାଣ୍ଟିନ ସୁବିଧା ଚଳାଇବା ପାଇଁ ଦେୟ ବୃଦ୍ଧି ହେତୁ ଶେଷରେ ମଦ ଦର ମଧ୍ୟ ବୃଦ୍ଧି ପାଇବ। ମୂଲ୍ୟ କେତେ ବଢିବ ସେ ସମ୍ପର୍କରେ ମନ୍ତବ୍ୟ ଏତେ ଶୀଘ୍ର ଦିଆଯାଇପାରିବ ନାହିଁ।
ନୂତନ ନୀତିରେ ଦେଶୀ ମଦ ର ସର୍ବନିମ୍ନ ଗ୍ୟାରେଣ୍ଟି କୋଟା ମଧ୍ୟ ୧୦ ପ୍ରତିଶତ ବୃଦ୍ଧି କରାଯାଇଛି। ଏହାର କାର୍ଯ୍ୟକାରିତା ସହିତ, ଦେଶୀ ମଦ ବିକ୍ରେତାମାନଙ୍କୁ ୨୦୨୨-୨୩ ମସିହାରେ ୫୮.୩୨ କୋଟି ବଲ୍କ ଲିଟର ବଦଳରେ ୬୪.୧୫ କୋଟିରେ କିଣିବାକୁ ପଡିବ। ମଦ ବିକ୍ରୟ ସମୟକୁ ସକାଳ ୧୦ ଟାରୁ ରାତି ୧୧ ଟା ପର୍ଯ୍ୟନ୍ତ ବୃଦ୍ଧି କରିବା ସତ୍ତ୍ୱେ ସରକାର ବର୍ତ୍ତମାନର ବିକ୍ରୟ ସମୟ ପରିବର୍ତ୍ତନ କରି ନାହାଁନ୍ତି। ତେବେ ‘ବିଶେଷ ଉତ୍ସବରେ’ ବିକ୍ରୟ ସମୟ ବଢାଇବାକୁ ସରକାର ଏକ ବ୍ୟବସ୍ଥା ଆଣିଛନ୍ତି।