JioAirFiber: ଏୟାରଫାଇବର ଆରମ୍ଭ ହେବା ପରଠାରୁ ଜିଓର ହୋମ ବ୍ରଡବ୍ୟାଣ୍ଡ ବ୍ୟବସାୟ ଦ୍ରୁତ ଗତିରେ ବୃଦ୍ଧିପାଉଥିବା ପ୍ରମୁଖ ବିଶ୍ଳେଷକ ସଂସ୍ଥା ବିଏନପି ପରିବାସର ଏକ ରିପୋର୍ଟ ଏବଂ ଭାରତୀୟ ଦୂରସଞ୍ଚାର ନିୟାମକ ପ୍ରାଧିକରଣର ସଦ୍ୟତମ ଉପଭୋକ୍ତା ତଥ୍ୟରୁ ଜଣାପଡିଛି। ଏହାର ବହୁଳ ଆଦୃତି କମ୍ପାନୀର ବ୍ୟବସାୟ ଅଭିବୃଦ୍ଧିର ଏକ ପ୍ରମୁଖ ଉପାଦାନ ଭାବରେ ଉଭା ହୋଇଛି। ବିଶ୍ଳେଷକଙ୍କ ଅନୁସାରେ, ଏହି ଦୃଢ଼ ଉପଭୋକ୍ତା ଅଭିବୃଦ୍ଧି ଏକ ସମ୍ଭାବ୍ୟ ଆଇପିଓ ପୂର୍ବରୁ ଜିଓର ବ୍ୟବସାୟ ପ୍ରୋଫାଇଲ୍ ଏବଂ ମୂଲ୍ୟାଙ୍କନରେ ସହାୟକ ହୋଇପାରେ।
ଡିସେମ୍ବର ୨୦୨୫ ପାଇଁ ଟ୍ରାଇ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଜିଓ ଏହି ଗୋଟିଏ ମାସରେ ପ୍ରାୟ ୮.୭ ଲକ୍ଷ ବ୍ରଡବ୍ୟାଣ୍ଡ ଗ୍ରାହକ ଯୋଡିଛି, ଯାହା ଏହାର ନିକଟତମ ପ୍ରତିଦ୍ୱନ୍ଦ୍ୱୀ, ଏୟାରଟେଲ ଅପେକ୍ଷା ପ୍ରାୟ ଦୁଇଗୁଣ ଅଧିକ ରହିଛି। ଏହି ଅଭିବୃଦ୍ଧି ପଛରେ ପ୍ରମୁଖ କାରଣ ରହିଛି ସାରା ଦେଶରେ ଏୟାରଫାଇବର ଏବଂ ଫିକ୍ସଡ୍ ୱାୟାରଲେସ୍ ଆକ୍ସେସ୍ (ଏଫଡବ୍ଲୁଏ) ସେବାର ଦ୍ରୁତ ପ୍ରସାର ଏବଂ ଆଦୃତି।
ଜିଓ ୱାୟାରଲେସ୍ କ୍ଷେତ୍ରରେ ଏକ ନମ୍ବର ସେବା ପ୍ରଦାନକାରୀ ହେବା ସହିତ ଫିକ୍ସଡ୍ ୱାୟାରଲେସ୍ କ୍ଷେତ୍ରରେ ମଧ୍ୟ ଏହାର ନେତୃତ୍ୱ ସ୍ଥାନକୁ ଆହୁରି ମଜବୁତ କରିଛି। ଗତ ଛଅ ମାସରେ, ଜିଓ ଏହି ବର୍ଗରେ ୭୯ ପ୍ରତିଶତ ବଜାର ଅଂଶ ହାସଲ କରିଛି ଏବଂ ଏହାର ପ୍ରତିଯୋଗୀଙ୍କ ତୁଳନାରେ ଚାରି ଗୁଣରୁ ଅଧିକ ଗ୍ରାହକ ଯୋଡିଛି। ଜିଓ ଦେଶର ୱାୟାରଲାଇନ ବ୍ରଡବ୍ୟାଣ୍ଡ (ଏଫଟିଟିଏଚ) ରେ ମଧ୍ୟ ଏହାର ଲୋକପ୍ରିୟ ଜିଓଫାଇବର ସହିତ ସବୁଠାରୁ ବଡ ସେବା ପ୍ରଦାନକାରୀ ରହିଛି ଏବଂ ଏହି କ୍ଷେତ୍ରରେ ଏହାର ଏକ କୋଟି ୩୮ ଲକ୍ଷରୁ ଅଧିକ ଗ୍ରାହକ ରହିଛନ୍ତି।
ବିଏନପି ପରିବାସ ରିପୋର୍ଟ ଅନୁଯାୟୀ, ଏୟାରଫାଇବର ଆରମ୍ଭ ହେବା ପରଠାରୁ ଜିଓର ହୋମ୍ ବ୍ରଡବ୍ୟାଣ୍ଡ ଗ୍ରାହକ ଆଧାରରେ ଦ୍ରୁତ ଅଭିବୃଦ୍ଧି ଘଟିଛି। ହୋମ୍ ବ୍ରଡବ୍ୟାଣ୍ଡ ଏବେ ଜିଓ ପାଇଁ ଏକ ପ୍ରମୁଖ ଅଭିବୃଦ୍ଧି ଇଞ୍ଜିନ୍ ପାଲଟିଛି। ବିଶ୍ଳେଷକମାନଙ୍କ ଅନୁଯାୟୀ ଗ୍ରାମାଞ୍ଚଳ ଏବଂ ସହରାଞ୍ଚଳ ଉଭୟରେ ହାଇ-ସ୍ପିଡ୍ ସଂଯୋଗ ପାଇଁ ବଢ଼ୁଥିବା ଚାହିଦା ମଧ୍ୟରେ ଏହି ଏୟାରଫାଇବର କ୍ଷେତ୍ର ଦୀର୍ଘକାଳୀନ ଭାବରେ ଜିଓର ରାଜସ୍ୱ ଏବଂ ନଗଦ ଆୟକୁ ମଜବୁତ କରିବ। ବିଶାଳ ଗ୍ରାହକ ଆଧାର, ସମ୍ପ୍ରସାରଣ ହୋଇପାରୁଥିବା ଏୟାରଫାଇବର ମଡେଲ୍ ଏବଂ ସ୍ଥିର ନଗଦ ପ୍ରବାହ ସମ୍ଭାବନା ଜିଓକୁ ଏହାର ଆଗାମୀ ଆଇପିଓର ପୂର୍ବରୁ ଏକ ଦୃଢ଼ ସ୍ଥିତିରେ ରଖିଛି।