ସିଏସଏମ୍ ଟେକ୍ ର ସଫଳତା: ଉଦୀୟମାନ ଅର୍ଥନୀତିମାନଙ୍କ ପାଇଁ ଡିଜିଟାଲ୍ ପବ୍ଲିକ୍ ଇନଫ୍ରାଷ୍ଟ୍ରକ୍ଚର (DPI) ସମାଧାନ ପ୍ରଦାନ କରୁଥିବା ଅଗ୍ରଣୀ ଗଭ୍ଟେକ୍ କମ୍ପାନି ସିଏସଏମ୍ ଟେକ୍ନୋଲୋଜିଜ୍ ଲିମିଟେଡ୍ (NSE: CSM | BSE: 544806) ମାଲାୱିର ପବ୍ଲିକ୍ ପ୍ରାଇଭେଟ୍ ପାର୍ଟନରଶିପ୍ କମିଶନ୍ (PPPC) ଠାରୁ ଏକ ଗୁରୁତ୍ୱପୂର୍ଣ୍ଣ ଆନ୍ତର୍ଜାତିକ କାର୍ଯ୍ୟାଦେଶ ହାସଲ କରିଛି।
କମ୍ପାନିର କେନିଆସ୍ଥିତ ସମ୍ପୂର୍ଣ୍ଣ ମାଲିକାନାଭୁକ୍ତ ସହଯୋଗୀ ସଂସ୍ଥା ସିଏସଏମ୍ ଟେକ୍ ଲିମିଟେଡ୍ ମାଧ୍ୟମରେ ଏହି କାର୍ଯ୍ୟ ମିଳିଛି। ଏହି ପ୍ରକଳ୍ପ ଅଧୀନରେ ଡିଜିଟାଲ୍ ମାଲାୱି ଆକ୍ସେଲେରେସନ୍ ପ୍ରକଳ୍ପ (DMAP) ପାଇଁ ଏକ ଇଲେକ୍ଟ୍ରୋନିକ୍ ଅକ୍ସନିଂ ପ୍ଲାଟଫର୍ମ (EAP) ର ଡିଜାଇନ୍, ବିକାଶ ଏବଂ କମିଶନିଂ କରାଯିବ।
ଇଣ୍ଟରନ୍ୟାସନାଲ୍ ଡେଭେଲପମେଣ୍ଟ ଆସୋସିଏସନ୍ (IDA) ମାଧ୍ୟମରେ ବିଶ୍ୱ ବ୍ୟାଙ୍କ ପୋଷିତ ଏହି ପ୍ରକଳ୍ପର ମୂଲ୍ୟ 3.208 କୋଟି ଟଙ୍କା (INR 32.08 million)। ଏହା ସିଏସଏମ୍ ଟେକ୍ନୋଲୋଜିଜ୍ର ବିଶ୍ୱସ୍ତରୀୟ ଉପସ୍ଥିତିକୁ ଆହୁରି ସୁଦୃଢ଼ କରିବା ସହ ବିକାଶଶୀଳ ଦେଶଗୁଡ଼ିକରେ ଡିପିଆଇ କ୍ଷେତ୍ରରେ ଭାରତର ବଢ଼ୁଥିବା ଅବଦାନକୁ ପୁଣିଥରେ ପ୍ରତିଷ୍ଠିତ କରିଛି।
ପ୍ରସ୍ତାବିତ ଇଲେକ୍ଟ୍ରୋନିକ୍ ଅକ୍ସନିଂ ପ୍ଲାଟଫର୍ମ ଏକ ସୁରକ୍ଷିତ, ପାରଦର୍ଶୀ ଏବଂ ସମ୍ପୂର୍ଣ୍ଣ ଅଡିଟଯୋଗ୍ୟ ଡିଜିଟାଲ୍ ବ୍ୟବସ୍ଥା ସୃଷ୍ଟି କରିବ। ଏହା ପାରମ୍ପରିକ କାଗଜ ଭିତ୍ତିକ ଓ ମାନୁଆଲ୍ ନିଲାମ ପ୍ରକ୍ରିୟାକୁ ବଦଳାଇ ସ୍ୱୟଂଚାଳିତ ୱର୍କଫ୍ଲୋ ମାଧ୍ୟମରେ ପରିଚାଳିତ ହେବ। ଏହି ପ୍ଲାଟଫର୍ମରେ ଅନଲାଇନ୍ ବିଡ୍ ଦାଖଲ, ବାସ୍ତବ ସମୟରେ ମୂଲ୍ୟାୟନ, ବିଡରମାନଙ୍କର ପରିଚୟ ଗୋପନୀୟତା, ସ୍ୱୟଂଚାଳିତ ର୍ୟାଙ୍କିଂ ଏବଂ ଫଳାଫଳର ଇଲେକ୍ଟ୍ରୋନିକ୍ ପ୍ରକାଶନ ଭଳି ସୁବିଧା ରହିବ। ଫଳସ୍ୱରୂପ ସରକାରୀ କ୍ରୟ ପ୍ରକ୍ରିୟାରେ ପାରଦର୍ଶିତା, କାର୍ଯ୍ୟଦକ୍ଷତା ଏବଂ ଜବାବଦେହିତା ବୃଦ୍ଧି ପାଇବ।
ଏହି 12 ମାସିଆ କାର୍ଯ୍ୟାଦେଶଟି ଡିଜିଟାଲ୍ ମାଲାୱି ଆକ୍ସେଲେରେସନ୍ ପ୍ରକଳ୍ପର ଏକ ଅଂଶ। ବିଶ୍ୱ ବ୍ୟାଙ୍କ ସମର୍ଥିତ ଇନକ୍ଲୁସିଭ୍ ଡିଜିଟାଲାଇଜେସନ୍ ଇନ୍ ଇଷ୍ଟର୍ଣ୍ଣ ଆଣ୍ଡ୍ ସଦର୍ଣ୍ଣ ଆଫ୍ରିକା (IDEA) କାର୍ଯ୍ୟକ୍ରମ ଅଧୀନରେ ଏହା ଏକ ଛଅ ବର୍ଷୀୟ ପଦକ୍ଷେପ। ପ୍ରକଳ୍ପର ଲକ୍ଷ୍ୟ ହେଉଛି ମାଲାୱିରେ ଡିଜିଟାଲ୍ ସଂଯୋଗ ବିସ୍ତାର କରିବା, ବ୍ରଡବ୍ୟାଣ୍ଡ ସେବାର ପାରଦର୍ଶୀ କ୍ରୟକୁ ସୁନିଶ୍ଚିତ କରିବା ଏବଂ ଦେଶର 75 ଲକ୍ଷରୁ ଅଧିକ ବ୍ରଡବ୍ୟାଣ୍ଡ ଉପଭୋକ୍ତାଙ୍କୁ ଉପକୃତ କରିବା।
ଏଥିସହ 2,000 ସ୍କୁଲ୍ ଏବଂ 500 ସରକାରୀ କାର୍ଯ୍ୟାଳୟ ସମେତ 2,500 ସରକାରୀ ସଂସ୍ଥାକୁ ସଂଯୋଗ କରାଯିବ। ସେବା ପ୍ରଦାନ କ୍ଷେତ୍ରରେ 50 ଲକ୍ଷ ସଫଳ ଡିଜିଟାଲ୍ ପ୍ରମାଣୀକରଣ ସୁନିଶ୍ଚିତ କରିବା ସହ ମୁଣ୍ଡ ପିଛା ଜାତୀୟ ଆୟ (GNI) ଅନୁପାତରେ ଡାଟା ମୂଲ୍ୟକୁ 9.4 ପ୍ରତିଶତରୁ 4 ପ୍ରତିଶତକୁ ହ୍ରାସ କରିବା ମଧ୍ୟ ଏହି ପ୍ରକଳ୍ପର ଲକ୍ଷ୍ୟ।
ଏହି କାର୍ଯ୍ୟ ଅଧୀନରେ ସିଏସଏମ୍ ଟେକ୍ ଲିମିଟେଡ୍ ପ୍ରକଳ୍ପର ସମ୍ପୂର୍ଣ୍ଣ ଚକ୍ର ପରିଚାଳନା କରିବ। ଏଥିରେ ବ୍ୟବସାୟିକ ଆବଶ୍ୟକତା ନିରୂପଣ, ପ୍ଲାଟଫର୍ମ ସ୍ଥାପତ୍ୟ ଓ ବିକାଶ, ସିଷ୍ଟମ୍ ଇଣ୍ଟିଗ୍ରେସନ୍, ସାଇବର ସୁରକ୍ଷା ମଜବୁତୀକରଣ, ପେନେଟ୍ରେସନ୍ ଟେଷ୍ଟିଂ, ପାଇଲଟ୍ ପ୍ରୟୋଗ, ପ୍ରଡକ୍ସନ୍ ରୋଲଆଉଟ୍, ବ୍ୟବହାରକାରୀ ପ୍ରଶିକ୍ଷଣ, ଜ୍ଞାନ ହସ୍ତାନ୍ତର ଓ ପ୍ରକଳ୍ପ ପରବର୍ତ୍ତୀ ୱାରେଣ୍ଟି ସହାୟତା ସାମିଲ ରହିଛି।
ଏହି ସଫଳତା ଉପରେ ପ୍ରତିକ୍ରିୟା ଦେଇ ସିଏସଏମ୍ ଟେକ୍ନୋଲୋଜିଜ୍ ଲିମିଟେଡ୍ର ପରିଚାଳନା ନିର୍ଦ୍ଦେଶକ ଓ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ପ୍ରିୟଦର୍ଶୀ ପାଣି କହିଛନ୍ତି:
“ଏହି କାର୍ଯ୍ୟାଦେଶ ଭାରତର ଡିପିଆଇ କ୍ଷମତା ଉପରେ ବିଶ୍ୱ ସମୁଦାୟର ବଢ଼ୁଥିବା ବିଶ୍ୱାସର ପ୍ରତିଫଳନ। ମାଲାୱି ସରକାର ଓ ବିଶ୍ୱ ବ୍ୟାଙ୍କ ସହ ମିଶି ପାରଦର୍ଶୀ ଏବଂ ପ୍ରଯୁକ୍ତି ଆଧାରିତ ନିଲାମ ବ୍ୟବସ୍ଥା ଗଠନରେ ଆମେ ଗର୍ବିତ। ଆମର ବିଶ୍ୱାସ ଯେ, ଭରସାଯୋଗ୍ୟ ଡିଜିଟାଲ୍ ପ୍ଲାଟଫର୍ମ ଦାୟିତ୍ୱବାନ୍ ସଂସ୍ଥା ଏବଂ ସାମାବେଶୀ ଅର୍ଥନୀତି ଗଢ଼ି ତୋଳିବାରେ ଗୁରୁତ୍ୱପୂର୍ଣ୍ଣ। ଏହି ପ୍ରକଳ୍ପ ବିଶ୍ୱସ୍ତରରେ ଲୋକହିତକର ଏବଂ ମିଶନ୍-କ୍ରିଟିକାଲ୍ ଗଭ୍ଟେକ୍ ସମାଧାନ ପ୍ରଦାନ ପ୍ରତି ଆମର ପ୍ରତିବଦ୍ଧତାକୁ ଆହୁରି ମଜବୁତ କରିବ।”
ଏହି ନୂତନ ଆନ୍ତର୍ଜାତିକ କାର୍ଯ୍ୟାଦେଶ ସିଏସଏମ୍ ଟେକ୍ନୋଲୋଜିଜ୍ର ସରକାରୀ ପ୍ରଶାସନ, ଖଣି, କୃଷି, ସ୍ୱାସ୍ଥ୍ୟ, ନାଗରିକ ସେବା, ଡିଜିଟାଲ୍ ବାଣିଜ୍ୟ, କର ବ୍ୟବସ୍ଥା, ସାଧାରଣ ଅର୍ଥ ପରିଚାଳନା ଏବଂ ଭିତ୍ତିଭୂମି ଶାସନ କ୍ଷେତ୍ରରେ ମିଶନ୍-କ୍ରିଟିକାଲ୍ ଡିଜିଟାଲ୍ ପ୍ଲାଟଫର୍ମ ବିକାଶ ଓ କାର୍ଯ୍ୟକାରୀକରଣର ଦକ୍ଷତାକୁ ଆହୁରି ସୁଦୃଢ଼ କରିଛି।
ଭାରତ, ଆଫ୍ରିକା, ମଧ୍ୟପ୍ରାଚ୍ୟ ଓ ଉତ୍ତର ଆମେରିକାରେ ସଫଳ କାର୍ଯ୍ୟାନ୍ୱୟନ ସହ ସିଏସଏମ୍ ଟେକ୍ନୋଲୋଜିଜ୍ ବିଶ୍ୱସ୍ତରୀୟ ଶ୍ରେଷ୍ଠ ପ୍ରଚଳନା ଅନୁରୂପ ସୁରକ୍ଷିତ, ବିସ୍ତାରଯୋଗ୍ୟ ଏବଂ ନାଗରିକ-କେନ୍ଦ୍ରିକ ଡିଜିଟାଲ୍ ପରିବେଶ ଗଠନରେ ବିଭିନ୍ନ ସରକାରଙ୍କୁ ସହଯୋଗ କରିଆସୁଛି।
ସିଏସଏମ୍ ଟେକ୍ନୋଲୋଜିଜ୍ ଲିମିଟେଡ୍ ବିଷୟରେ
ସିଏସଏମ୍ ଟେକ୍ନୋଲୋଜିଜ୍ ଲିମିଟେଡ୍ ହେଉଛି ଭୁବନେଶ୍ୱରସ୍ଥିତ ଏକ ବହୁରାଷ୍ଟ୍ରୀୟ ଗଭ୍ଟେକ୍ କମ୍ପାନି। କମ୍ପାନି ଡିଜିଟାଲ୍ ପବ୍ଲିକ୍ ଇନଫ୍ରାଷ୍ଟ୍ରକ୍ଚର, ଇ-ଗଭର୍ନାନ୍ସ, କୃତ୍ରିମ ବୁଦ୍ଧିମତ୍ତା (AI), କ୍ଲାଉଡ୍, ସାଇବର ସୁରକ୍ଷା, GIS, ସ୍ମାର୍ଟ ସିଟି, ଖଣି, କୃଷି, ୟୁଟିଲିଟି ଏବଂ ଏଣ୍ଟରପ୍ରାଇଜ୍ ଡିଜିଟାଲ୍ ଟ୍ରାନ୍ସଫର୍ମେସନ୍ କ୍ଷେତ୍ରରେ କାର୍ଯ୍ୟ କରେ। 14ଟି ଦେଶର 20ଟି ସହରରେ କାର୍ଯ୍ୟରତ ଏହି ସଂସ୍ଥା ଶାସନ ବ୍ୟବସ୍ଥା, କାର୍ଯ୍ୟଦକ୍ଷତା ଓ ନାଗରିକ ସେବାର ଫଳାଫଳରେ ଉନ୍ନତି ଆଣିବା ପାଇଁ ସରକାର ଓ ଉଦ୍ୟୋଗ ସଂସ୍ଥାଗୁଡ଼ିକ ସହ କାମ କରୁଛି।