ସୀତାରାମ ଅଗ୍ରୱାଲ
ବାଣପୁର: ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ପୋଲିସକୁ ମିଳିଛି ବଡ଼ ସଫଳତା। ବାଇକ୍ ଲୁଟେରା ଗ୍ୟାଙ୍ଗର ପର୍ଦ୍ଦାଫାଶ୍ କରି ୨୦ ଟି ବାଇକ୍ ଜବତ ସହ ୨ ଅଭିଯୁକ୍ତଙ୍କୁ ଗିରଫ କରିଛି ବାଣପୁର ପୋଲିସ। ଏ ନେଇ ଆଜି ମଧ୍ୟାହ୍ନରେ ଖୋର୍ଦ୍ଧା ଜିଲ୍ଲା ଆରକ୍ଷୀ ଅଧିକ୍ଷକ ଅଜେୟ ପ୍ରତାପ ସ୍ୱାଇଁ ନାଚୁଣୀ ଫାଣ୍ଡି ପରିସରରେ ଏକ ସାମ୍ବାଦିକ ସମ୍ମିଳନୀ ଡାକି ସୂଚନା ଦେଇଛନ୍ତି।
ସୂଚନା ମୁତାବକ ଗତକାଲି ସଂଧ୍ୟାରେ ନାଚୁଣୀ ଫାଣ୍ଡି ଏ.ଏସ.ଆଇ ହାଡିବନ୍ଧୁ ନାୟକ ଏବଂ ସି.ଏସ.ଆଇ ଜ୍ୟୋତ୍ସ୍ନାରାଣୀ ଖୁଣ୍ଟିଆ ପାଟ୍ରୋଲିଂ କରୁଥିବା ସମୟରେ ସନ୍ଦେହଜନକ ଭାବେ ନାଲି ରଙ୍ଗର ହିରୋ ହଣ୍ଡା ବାଇକ ସହ ଜଣେ ଯୁବକଙ୍କୁ ଅଟକ ରଖି ବାଇକର କାଗଜପତ୍ର ମାଗିଥିଲେ। ଯୁବକ ଜଣକ ହେଲେ ବାଣପୁର ଥାନା କୁଲେଇ ଗ୍ରାମର ୨୯ ବର୍ଷୀୟ ସନ୍ତୋଷ ଜଗଦ୍ଦେବ। ପରବର୍ତ୍ତୀ ସମୟରେ ଯୁବକ ଜଣକ ବାଇକର କାଗଜପତ୍ର ଦେବାକୁ ଅସମର୍ଥ ହେବାରୁ ପୋଲିସର ସନ୍ଦେହ ବଢିଥିଲା ଏବଂ ପଚରାଉଚୁରା ବେଳେ ସେ ଉକ୍ତ ବାଇକକୁ ଭୁବନେଶ୍ୱର ଜୟଦେବ ନଗର ଅଞ୍ଚଳରୁ ଚୋରି କରିଥିବାର ସ୍ୱୀକାର କରିବା ସହ ଏକାଧିକ ବାଇକ ଚୋରିରେ ସମ୍ପୃକ୍ତ ଥାଇ ଚୋରା ବାଇକଗୁଡିକୁ ନିଜ ଘର ପଛପଟେ ରଖିଛନ୍ତି ବୋଲି କହିଥିଲେ।
ଏହି ପରିପ୍ରେକ୍ଷୀରେ ବାଣପୁର ପୋଲିସ କେସ ନମ୍ବର ୩୯୫/୨୦ ରେ ମାମଲା ରୁଜ୍ଜୁ କରି ତଦନ୍ତ ଜାରି ରଖିଥିଲା। ତଦନ୍ତ ସମୟରେ ଜଣାପଡିଥଲା ଯେ ସନ୍ତୋଷ ଭୁବନେଶ୍ୱର, ଜଙ୍କିଆ ଏବଂ ଖୋର୍ଦ୍ଧା ଅଞ୍ଚଳରୁ ବିଭିନ୍ନ ବାଇକ ଚୋରି କରି ମାନସିଂହପୁର, ଦୀକ୍ଷୀତପଡ଼ା ଏବଂ ଗୋତପଲ୍ଲୀ ଅଞ୍ଚଳରେ କମ ମୂଲ୍ୟରେ ବିକ୍ରି କରିଛନ୍ତି। ଏହି ରିପୋର୍ଟ ପାଇବା ପରେ ଖୋର୍ଦ୍ଧା ଜିଲ୍ଲା ଆରକ୍ଷୀ ଅଧିକ୍ଷକ ଅଜେୟ ପ୍ରତାପ ସ୍ୱାଇଁ ଏବଂ ବାଲୁଗାଁ ଏସ.ଡି.ପି.ଓ ସୁରେଶ କୁମାର ଦାସଙ୍କ ନିର୍ଦ୍ଦେଶକ୍ରମେ ବାଣପୁର ଆଇଆଇସି ସଞ୍ଜୟ ପଟ୍ଟନାୟକ, ଏସ.ଆଇ ଉମାକାନ୍ତ ସାହୁ, ବିଜୟ ମଲ୍ଲିକ, ରାଜକିଶୋର ବେହେରା, ପ୍ରସନ୍ନ ଜେନା ଏବଂ ଏ.ଏସ.ଆଇ ହାଡିବନ୍ଧୁ ନାୟକଙ୍କୁ ନେଇ ଏକ ଟିମ ଗଠନ କରାଯାଇ ବିଭିନ୍ନ ଅଞ୍ଚଳରେ ଚଢ଼ାଉ କରାଯାଇଥିଲା ଏବଂ ଚୋରା ବାଇକ ଗୁଡିକୁ ଜବତ କରାଯାଇଥିଲା।
ଏହି ସମୟରେ ଅନ୍ୟ ଜଣେ ବାଇକ ଚୋରକୁ ମଧ୍ୟ ପୋଲିସ ଗିରଫ କରିଛି। ଏହି ବାଇକ୍ ଚୋର ଜଣକ ଦୀକ୍ଷିତପଡାର ମୁବାରକ ଖାନ ବୋଲି ସୂଚନା ରହିଛି। ତେବେ କୁଲେଇ, ମାନସିଂହପୁର, ଦୀକ୍ଷୀତପଡ଼ା ଏବଂ ଗୋତପଲ୍ଲୀ ଅଞ୍ଚଳରୁ ବାଣପୁର ପୋଲିସ ସମୁଦାୟ ୨୦ ଗୋଟି ଚୋରା ବାଇକ ଉଦ୍ଧାର କରିଛି।
