ନୂଆଦିଲ୍ଲୀ: ଟ୍ୱିଟର ଇଣ୍ଡିଆ ଦ୍ୱାରା କଂଗ୍ରେସ ଦଳର ଅଫିସିଆଲ୍ ଟ୍ୱିଟର ହ୍ୟାଣ୍ଡେଲରେ ତାଲା ପଡିଛି। ଟ୍ୱିଟର ଏହି ପଦକ୍ଷେପ ନେଇଛି ଯେଉଁ ସମୟରେ କଂଗ୍ରେସର ପୂର୍ବତନ ସଭାପତି ରାହୁଲ ଗାନ୍ଧୀଙ୍କ ଆକାଉଣ୍ଟ ମଧ୍ୟ ଚାରି ଦିନ ପୂର୍ବରୁ କମ୍ପାନୀ ଦ୍ୱାରା ତାଲା ପଡିଥିଲା। ଦଳର ଆକାଉଣ୍ଟକୁ ଲକ୍ କରିବା ପରେ ଟ୍ୱିଟର ଇଣ୍ଡିଆ କହିଛି ଯେ, କଂଗ୍ରେସ ଟ୍ୱିଟର ହ୍ୟାଣ୍ଡେଲ କମ୍ପାନୀର ନିୟମ ଉଲ୍ଲଂଘନ କରିଛି।
ଜଣେ ଟୁଇଟର ମୁଖପାତ୍ର କହିଛନ୍ତି ଯେ, ଟ୍ୱିଟର ଏହାର ସମସ୍ତ ନିୟମକୁ ଚତୁର ଏବଂ ନ୍ୟାୟପୂର୍ଣ୍ଣ ପ୍ରୟୋଗ କରିଛି। ଆମେ ଅନେକ ଶହ ଶହ ଟ୍ୱିଟ୍ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଛୁ। ଯାହା ଆମର ନିୟମ ଉଲ୍ଲଂଘନ କରୁଥିବା ଚିତ୍ର ପୋଷ୍ଟ କରିଛି। ଆମର ଲକ୍ଷ୍ୟ ସର୍ବଦା ଲୋକଙ୍କ ଗୋପନୀୟତା ଏବଂ ସୁରକ୍ଷା ରକ୍ଷା କରିବା ବୋଲି ସେ କହିଛନ୍ତି।
ଟ୍ୱିଟର ଆହୁରି କହିଛି, ଯଦି ଏକ ଟୁଇଟ୍ ଆମର ନିୟମର ଉଲ୍ଲଂଘନ ବୋଲି ଜଣାପଡେ ଏବଂ ଆକାଉଣ୍ଟଧାରୀଙ୍କ ଦ୍ଵାରା ଏହାକୁ ଅପସାରଣ କରାଯାଏ ନାହିଁ, ତେବେ ଏପରି ପରିସ୍ଥିତିରେ ଆମେ ତାଙ୍କୁ ଏକ ନୋଟିସ୍ ପଠାଇଥାଉ। ଟୁଇଟ୍ ଅପସାରଣ ନହେବା ପର୍ଯ୍ୟନ୍ତ ଆକାଉଣ୍ଟ୍ ଲକ୍ ହୋଇ ରହିବ।
ଟୁଇଟର କହିଛି, ଜଣେ ଦୁଷ୍କର୍ମ ପୀଡ଼ିତାଙ୍କ ପିତାମାତାଙ୍କ ପରିଚୟ ପ୍ରକାଶ କରିଥିବାରୁ ଏନସିପିସିଆର ଦ୍ୱାରା ଆମକୁ ସଚେତନ କରାଯାଇଥିଲା। ଟ୍ୱିଟରର ସର୍ତ୍ତାବଳୀ ଏବଂ ନୀତି ତଥା ଭାରତୀୟ ଆଇନ ଅନୁଯାୟୀ ପ୍ରକାଶିତ ଚିନ୍ତାଧାରା ବିରୁଦ୍ଧରେ ଆମେ ଏହାର ସମୀକ୍ଷା କରିଛୁ।
ଉଲ୍ଲେଖ ଯୋଗ୍ୟ ଯେ କଂଗ୍ରେସ ନେତା ରାହୁଲ ଗାନ୍ଧୀ ଗତ ସପ୍ତାହରେ ଦିଲ୍ଲୀରେ ଦୁଷ୍କର୍ମ ଓ ହତ୍ୟା ଅଭିଯୋଗ ହୋଇଥିବା ୯ ବର୍ଷର ନାବାଳିକାଙ୍କ ପରିବାର ସହ ଫଟୋ ଟ୍ୱିଟ କରିଥିଲେ। ଏହା ପରେ ଏନସିପିସିଆର ରାହୁଲ ଗାନ୍ଧୀଙ୍କ ଟ୍ୱିଟକୁ ସଜ୍ଞାନକୁ ନେଇ ନାବାଳିକା ପୀଡିତାଙ୍କ ଗୋପନୀୟତା ଉଲ୍ଲଂଘନ କରିଥିବାରୁ କଂଗ୍ରେସ ନେତାଙ୍କ ଆକାଉଣ୍ଟ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଟ୍ୱିଟରକୁ ନିର୍ଦ୍ଦେଶ ଦେଇଥିଲା।
