ଚାନ୍ଦପୁର: ଦ୍ଵିତୀୟ ପର୍ଯ୍ୟାୟ ମତଦାନ ପାଇଁ ଆଉ ମାତ୍ର କିଛି ଘଣ୍ଟା ବାକି ରହିଛି। ଏଭଳି ଘଡି ସନ୍ଧି ମୂହୁର୍ତ୍ତରେ ସବୁ ରାଜନୈତିକ ଦଳ ନିଜ ନିଜର ସମର୍ଥିତ ପ୍ରାର୍ଥୀଙ୍କୁ ଜିତାଇବାକୁ ଜୋର ଲଗାଇଦେଇଛନ୍ତି।
ଏପରି ସ୍ଥଳେ ନୟାଗଡ ଜିଲା ଚାନ୍ଦପୁର ଥାନା ମୟୁର ଝାଲିଆ ପଂଚାୟତରେ ଆସନ୍ତା କାଲି ନିର୍ବାଚନ ହେବ। ଏହି ପଂଚାୟତରୁ ପ୍ରତିଦ୍ୱନ୍ଦିତା କରୁଥିବା ସରପଂଚ, ସମିତି ସଭ୍ୟ, ୱାର୍ଡ ସଭ୍ୟ ପ୍ରାର୍ଥୀଙ୍କୁ ଜିତାଇବା ପାଇଁ ଗତ କାଲି ବିଳମ୍ବିତ ରାତିରେ କେତେକ ଲୋକ ଟଙ୍କା ବାଣ୍ଟୁଥିବା ବେଳେ ସେଠାରେ ପହଂଚି ଗ୍ରାମବାସୀ ମାନେ ବିରୋଧ କରିଥିଲେ। ଗ୍ରାମବାସୀମାନଙ୍କର ବିରୋଧ ଦେଖି ପ୍ରାର୍ଥୀ ମାନେ ଆଣିଥିବା ମଦ ଟଙ୍କା ସହ ଖସି ପଳାଉଥିବା ବେଳେ ଗ୍ରାମବାସୀ ମାନେ ପ୍ରାର୍ଥୀଙ୍କୁ ଘେରିଯାଇ ଚାନ୍ଦପୁର ପୋଲିସ୍ କୁ ଖବର ଦେଇଥିଲେ।
ଘଟଣା ସ୍ଥଳରେ ଚାନ୍ଦପୁର ଆଇଆଇସି ରଶ୍ମିରଂଜନ ଦାସ ପହଂଚି ୨ଜଣ ପ୍ରାର୍ଥୀଙ୍କ ସହ ଜଣେ ୱାର୍ଡ ସଭ୍ୟାଙ୍କର ପ୍ରାର୍ଥୀଙ୍କୁ ଅଟକ ରଖିଛନ୍ତି। ସେମାନେ ହେଲେ ସରପଂଚ ପ୍ରାର୍ଥୀ ସୁଶାନ୍ତ କୁମାର କଳସ, ସମିତି ସଭ୍ୟ ପ୍ରାର୍ଥୀ ମନ୍ମଥ ତ୍ରିପାଠୀ ଓ ୱାର୍ଡ ସଭ୍ୟ ପ୍ରାର୍ଥୀ ପ୍ରାର୍ଥୀଙ୍କ ସ୍ୱାମୀ ନଣ୍ଡା ମହାରଣା।
ଏହି ୩ ଜଣଙ୍କୁ ଚାନ୍ଦପୁର ପୋଲିସ୍ ଅଟକ ରଖି ତଦନ୍ତ ଚଳାଇଛି। ସେମାନଙ୍କ ନିକଟରୁ ୨ ଟି ବାଇକ୍ ସହ ୧୦ ଲିଟର ମଦ ଜବତ ଓ ପୁସିଂ କାର୍ଡ ଜବତ କରାଯାଇଛି।
