ଖୋର୍ଦ୍ଧା: ବେଆଇନ ପଥର ଖଣି ଉପରେ ଆଜି ଶିଳ୍ପାଞ୍ଚଳ ଫାଣ୍ଡି ପୋଲିସ ଚଢାଉ କରିଛି। ଚଢାଉ ବେଳେ ଗୋଟେ ପଥର ବୋଝେଇ ଟ୍ରକ, ଦୁଇ ଗୋଟି ପାୱାର ଟିଲର ସହ ଜଣେ ଅଭିଯୁକ୍ତଙ୍କୁ ପୋଲିସ ଗିରଫ କରିଛି।
ସୂଚନା ଅନୁଯାୟୀ, କୌଣସି ବିଶ୍ଵସ୍ତ ସୂତ୍ରରୁ ଖବର ପାଇ ଆଜି ଖୋର୍ଦ୍ଧା ଟାଉନ ଥାନା ଅନ୍ତର୍ଗତ କୁମାରବସ୍ତ ଅଞ୍ଚଳରେ ଚାଲୁଥିବା ଚୋରା ପଥର ଖଣି ଉପରେ ଶିଳ୍ପାଞ୍ଚଳ ଫାଣ୍ଡି ପୋଲିସ ଚଢାଉ କରିଥିଲା। ଚଢାଉ ସମୟରେ ମୁଖ୍ୟ ଅଭିଯୁକ୍ତ ଗଙ୍ଗପଡାର ଶ୍ରୀକାନ୍ତ ଯାଦବଙ୍କୁ ପୋଲିସ ଖଣିରୁ ଗିରଫ କରିଥିଲା।
ଏଥି ସହିତ ଉକ୍ତ ବେଆଇନ ପଥର ଖଣି ମଧ୍ୟରୁ ଗୋଟେ ମାଙ୍କଡା ପଥର ବୋଝେଇ ଟ୍ରକ (ଓଆର -୦୯ଇ -୯୫୩୩), ଦୁଇ ଗୋଟି ପାୱାର ଟିଲର ଏବଂ କିଛି ପଥର କାଟିବା ପାଇଁ ବ୍ୟବହୃତ ଯନ୍ତ୍ରାଂଶ ପୋଲିସ ଜବତ କରିଥିଲା। ଏ ସଂକ୍ରାନ୍ତରେ ଖୋର୍ଦ୍ଧା ଟାଉନ ଥାନାରେ କେସ ନମ୍ବର ୧୩୧/୨୨ ରେ ଏକ ମାମଲା ରୁଜୁ କରାଯାଇ ତଦନ୍ତ ଜାରି ରହିଛି।
