ଭୁବନେଶ୍ବର: ଆଜି ବେଆଇନ ଔଷଧ ଚାଲାଣ ବେଳେ ଭୁବନେଶ୍ୱର ବରମୁଣ୍ଡା ବସ ଷ୍ଟାଣ୍ଡ ନିକଟରେ ଏସଟିଏଫ ଓ କମିଶନେରେଟ ପୋଲିସ ମିଳିତ ଚଢ଼ାଉ କରି ଜଣେ ଅଭିଯୁକ୍ତଙ୍କୁ ଗିରଫ କରିଛି। ଖବର ମୁତାବକ ବରମୁଣ୍ଡାରେ ସ୍ୱାସ୍ଥ୍ୟ ବିଭାଗ ଦ୍ୱାରା ନିଷେଧ ହୋଇଥିବା ଔଷଧ ବହୁ ମାତ୍ରାରେ ଚୋରାଚାଲାଣ ହେଉଥିବାର ଖବର ପାଇଥିଲା ଏସଟିଏଫ। ଏହି ପରିପ୍ରେକ୍ଷୀରେ ଆଜି କମିଶନେରେଟ ପୋଲିସ ଓ ଏସଟିଏଫ ଉକ୍ତ ସ୍ଥାନରେ ମିଳିତ ଚଢ଼ାଉ କରିଥିଲେ।
ଚଢ଼ାଉ ସମୟରେ ଉଭୟ ବିଭାଗ ୧୨୮୦ ବୋତଲ କୋଡିନ ଫସଫେଟ ଏବଂ କ୍ଲୋରୋଫେନାରମିନ ମାଲେଟ ମିଶ୍ରିତ ଥିବା ‘ଏସକଫ’ ନାମକ ବେଆଇନ କଫ ସିରପ, ଗୋଟିଏ ବାଇକ ଏବଂ ଅନ୍ୟାନ୍ୟ ଜିନିଷ ଜବତ କରିବା ସହ ଜଣେ ଅଭିଯୁକ୍ତଙ୍କୁ ଗିରଫ କରାଯାଇଛି।
ଗିରଫ ଅଭିଯୁକ୍ତ ଜଣକ ହେଲେ ପୁରି ଜିଲ୍ଲା ଗୋପ ଥାନା ଅଞ୍ଚଳର ପଦ୍ମଲାଭ ବେହେରା। ଗିରଫ ଅଭିଯୁକ୍ତଙ୍କ ବିରୋଧରେ ଭରତପୁର ଥାନାରେ କେଶ ନମ୍ବର ୧୮୩/୨୨ ରେ ଏକ ମାମଲା ରୁଜୁ କରାଯାଇ କୋର୍ଟଚାଲାଣ କରାଯାଇଥିବାର ସୂଚନା ମିଳିଛି।