ଖୋର୍ଦ୍ଧା: ଆଜି ଖୋର୍ଦ୍ଧା ଜିଲ୍ଲା ବେଗୁନିଆ ପୋଲିସକୁ ମିଳିଛି ବଡ ସଫଳତା। ଜିଲ୍ଲାରେ କିଛି ଦିନ ହେବ ଗୋ ଚାଲାଣ କମିଥିବା ବେଳେ ଏବେ ପୁଣି ସକ୍ରିୟ ହୋଇଉଠିଛନ୍ତି ଗୋ ମାଫିଆ।
ସୂଚନା ମୁତାବକ ଖୋର୍ଦ୍ଧା ଏସପିଙ୍କ ନିର୍ଦ୍ଦେଶକ୍ରମେ ଏବଂ ଏସଡିପିଓଙ୍କ ତତ୍ୱାବଧାନରେ ବେଗୁନିଆ ଆଇଆଇସି ଲକ୍ଷ୍ମୀପ୍ରସାଦ ଶତପଥୀଙ୍କ ନେତୃତ୍ୱରେ ଏକ ଟିମ ରାତିରେ ବ୍ଲକିଙ୍ଗ ଚେକିଙ୍ଗ କରୁଥିଲେ। ତେବେ ବିଳମ୍ବିତ ରାତ୍ରିରେ ଜାମୁସାହି ଆଡୁ ଏକ ଗୋରୁ ବୋଝେଇ କଣ୍ଟେନର ଆସୁଥିବାର ଖବର ପାଇ ପୋଲିସ ସତର୍କ ରହିଥିଲା। ବୋତଲମା-ଚାରିଛକରେ ଉକ୍ତ କଣ୍ଟେନରକୁ ଦେଖି ପୋଲିସ ତାହାକୁ କାବୁ କରିବା ପାଇଁ ପିଛା କରିଥିଲା।
ତେବେ ଛଣଗିରି ଠାରେ ନିରୁପାୟ ହୋଇ ଗାଡ଼ି ଚାଳକ ଚଳନ୍ତା ଗାଡ଼ିରୁ ଡେଇଁ ଫେରାର ହୋଇଯାଇଥିଲେ। କିନ୍ତୁ ସୌଭାଗ୍ୟବଶତଃ କୌଣସି ଅଘଟଣ ଘଟିବା ପୁର୍ବରୁ ଗାଡ଼ିଟି ଏକ ବାଲି ଗଦାରେ ଧକ୍କା ହୋଇ ଅଟକି ଯାଇଥିଲା। ଉକ୍ତ କଣ୍ଟେନରରୁ ପୋଲିସ ସମୁଦାୟ ୮୪ଟି ଗୋରୁଙ୍କୁ ଉଦ୍ଧାର କରିଥିବା ବେଳେ ଦୁର୍ଭାଗ୍ୟବଶତଃ ଦୁଇଟି ଗୋରୁଙ୍କ ମୃତ୍ୟୁ ଘଟିଛି। ସମସ୍ତ ଜୀବନ୍ତ ଗୋରୁଙ୍କୁ ସିଝୁଆ ସ୍ଥିତ ଗୋଶାଳାକୁ ହସ୍ତାନ୍ତର କରାଯାଇଥିବା ବେଳେ ବେଗୁନିଆ ପୋଲିସ ଏ ସଂକ୍ରାନ୍ତରେ ଗାଡ଼ି ଚାଳକ ଓ ମାଲିକଙ୍କ ବିରୁଦ୍ଧରେ କେସ ନମ୍ବର ୩୦୩/୨୨ ରେ ମାମଲା ରୁଜୁ କରି ତଦନ୍ତ ଜାରିରଖିଥିବାର ଆଇଆଇସି ଶ୍ରୀ ଶତପଥୀ ସୂଚନା ଦେଇଛନ୍ତି।