କଲିକତା: ପଶ୍ଚିମବଙ୍ଗ ପୁଣି ଥରେ ଚର୍ଚ୍ଚାକୁ ଆସିଛି। ଏଥର କିନ୍ତୁ ବିଜେପି ଏବଂ ଟିଏମସି ନେତାଙ୍କ ମଧ୍ୟରେ ସଂଘର୍ଷର ଖବର ନୁହେଁ, ବରଂ ବନ୍ଦେ ଭାରତ ଟ୍ରେନ୍ କୁ ନେଇ ଚର୍ଚ୍ଚା ହେଉଛି। ବାସ୍ତବରେ ନିକଟରେ ପଶ୍ଚିମବଙ୍ଗରେ ଆରମ୍ଭ ହୋଇଥିବା ବନ୍ଦେ ଭାରତ ଏକ୍ସପ୍ରେସ ଟ୍ରେନରେ ପଥର ଫିଙ୍ଗିବା ଘଟଣା ସାମ୍ନାକୁ ଆସିଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ନୂଆ ଜଲପାଇଗୁଡିରୁ ହାୱଡା ଫେରୁଥିବା ମାଲଦା ଜିଲ୍ଲାର କୁମାରଗଞ୍ଜ ନିକଟରେ ବନ୍ଦେ ଭାରତ ଏକ୍ସପ୍ରେସ ଉପରେ ପଥର ଫିଙ୍ଗାଯାଇଛି। ପଥର ଫିଙ୍ଗିବା କାରଣରୁ ଉକ୍ତ ଟ୍ରେନର ସି-୧୩ ବଗି କ୍ଷତିଗ୍ରସ୍ତ ହୋଇଥିବା କୁହାଯାଉଛି।
ଏଥି ସହ ଭାରତୀୟ ଜନତା ପାର୍ଟି ଏହି ଘଟଣାରେ ତୀବ୍ର ପ୍ରତିକ୍ରିୟା ପ୍ରକାଶ କରି ଟିଏମସି କର୍ମୀଙ୍କୁ ବନ୍ଦେ ଭାରତ ଟ୍ରେନକୁ ପଥର ଫିଙ୍ଗିଥିବା ଅଭିଯୋଗ କରିଛି। ବିଜେପି ନେତା ଶୁଭେନ୍ଦୁ ଅଧିକାରୀ ଏହାକୁ ଟିଏମସିର ଷଡଯନ୍ତ୍ର ବୋଲି କହିଛନ୍ତି। ପ୍ରକାଶ ଯେ, କେନ୍ଦ୍ର ସରକାର ଭାରତୀୟ ରେଳର ଆଧୁନିକୀକରଣ ପାଇଁ ରେକର୍ଡ ବିନିଯୋଗ କରୁଛନ୍ତି। ଏହି କ୍ରମରେ ଦେଶରେ ବନ୍ଦେ ଭାରତ ଏକ୍ସପ୍ରେସ, ତେଜସ ଏକ୍ସପ୍ରେସ, ହମସଫର ଏକ୍ସପ୍ରେସ ଭଳି ଆଧୁନିକ ଟ୍ରେନ ନିର୍ମାଣ କରାଯାଉଛି।
ଡିସେମ୍ବର ୩୦ ତାରିଖ ୨୦୨୨ରେ ବନ୍ଦେ ଭାରତ ଏକ୍ସପ୍ରେସ ହାୱଡା ଏବଂ ନୂଆ ଜଲପାଇଗୁଡି ମଧ୍ୟରେ ଚାଲିବା ଆରମ୍ଭ କରିଥିଲା। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉପସ୍ଥିତିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆନୁଷ୍ଠାନିକ ଭାବେ ଏହି ଟ୍ରେନ୍ କୁ ପତାକା ଦେଖାଇ ଶୁଭାରମ୍ଭ କରିଥିଲେ। ମାତ୍ର ୨ ଦିନ ଚାଲିବା ପରେ ହିଁ ଏଭଳି ଘଟଣା ଘଟିବା ଏହାର ସୁରକ୍ଷା ଉପରେ ଅନେକ ପ୍ରଶ୍ନ ସୃଷ୍ଟି କରିଛି।
ଉଲ୍ଲେଖ ଯୋଗ୍ୟ ଯେ, ବନ୍ଦେ ଭାରତ ଟ୍ରେନରେ ଏହି ପ୍ରକାର ଆକ୍ରମଣ ପ୍ରଥମ ଥର ପାଇଁ ହୋଇନାହିଁ। ଅତୀତରେ ମଧ୍ୟ ଏହି ଟ୍ରେନ୍ ଅନେକ ଥର ଦୁର୍ବୃତ୍ତଙ୍କ ଶିକାର ହୋଇଆସୁଛି। ଡିସେମ୍ବର ୧୫ ତାରିଖ ୨୦୨୨ରେ ଛତିଶଗଡର ନାଗପୁର-ବିଲାସପୁର ବନ୍ଦେ ଭାରତ ଏକ୍ସପ୍ରେସ ଟ୍ରେନକୁ ପଥର ମାଡ କରାଯାଇଥିଲା। ଏହି କାରଣରୁ ଟ୍ରେନର ଝରକା କାଚ ଭାଙ୍ଗି ଯାଇଥିଲା। ଦୁର୍ଗ ଏବଂ ଭିଲାଇ ଷ୍ଟେସନ ମଧ୍ୟରେ ଏହି ଘଟଣା ଘଟିଥିଲା।
