![](https://thesamikhsya.com/odia/wp-content/uploads/2023/02/delet-259.jpg)
ସୀତାରାମ ଅଗ୍ରୱାଲ
ଟାଙ୍ଗୀ: ଖୋର୍ଦ୍ଧା ଜିଲ୍ଲାରେ ବ୍ରାଉନ ସୁଗାର କାରବାର ବଢୁଥିବା ବେଳେ ପୋଲିସର କାର୍ଯ୍ୟାନୁଷ୍ଠାନ ଜାରି ରହିଛି। ବାଣପୁର ଓ ବାଲୁଗାଁ ଥାନା ଅଞ୍ଚଳକୁ ଛାଡିଦେଲେ ପ୍ରାୟତଃ ଜିଲ୍ଲାର ବାକି ସବୁ ଥାନା ଅଞ୍ଚଳରେ କାୟା ବିସ୍ତାର କରିସାରିଲାଣି ଧଳା ଜହର।
ଆଜି ଟାଙ୍ଗୀ ପୋଲିସ ମଙ୍ଗଳାଯୋଡି-ଟାଙ୍ଗୀ ରୋଡ ନିକଟସ୍ଥ ପଣସପୁରପାଟଣା ଗ୍ରାମର ଏକ ନିର୍ମାଣଧୀନ ଘରେ ଚଢ଼ାଉ କରି ବ୍ରାଉନ ସୁଗାର କାରବାର ଅଭିଯୋଗରେ ୨ ନିଶା ବେପାରୀଙ୍କୁ ଗିରଫ କରିଛି। ବେପାରି ଦ୍ବୟ ହେଲେ ଟାଉନ ଥାନା ଅଞ୍ଚଳର ପପୁ ଭରିମଲ (୨୫) ଏବଂ ରବି ଚନ୍ଦ୍ର ବରାଳ (୫୨)। ସେମାନଙ୍କ ନିକଟରୁ ୧୭.୬୦ ଗ୍ରାମ ବ୍ରାଉନ ସୁଗାର ଜବତ କରିଛି ପୋଲିସ, ଯାହାର ଆନୁମାନିକ ମୂଲ୍ୟ ୧ ଲକ୍ଷ ୭୫ ହଜାର ଟଙ୍କା ହେବ। ଅଭିଯୁକ୍ତମାନଙ୍କ ବିରୁଦ୍ଧରେ ମାମଲା ରୁଜୁ କରାଯାଇ କୋର୍ଟଚାଲାଣ କରାଯାଇଥିବାର ଆଇଆଇସି ଦିଗବିଜୟ ବିଶ୍ୱାଳ କହିଛନ୍ତି।