ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ବଡ଼ବଜାର ଥାନା ଅର୍ନ୍ତଗତ ଫାଷ୍ଟ ଗେଟ୍ ନିକଟରେ ପାନ ଦୋକାନ କରିଥିବା ବୁବୁ ବେହେରା ନାମକ ଜଣେ ଯୁବକଙ୍କୁ ଆତର୍କିତ ଭାବେ ଆକ୍ରମଣ କରାଯାଇଥିଲା। ଯାହା ଫଳରେ ତାଙ୍କର ଜଣେ ସାଙ୍ଗ ଆହତ ହୋଇଥିବା ବେଳେ ବୁବୁ ପ୍ରାଣ ବିକଳରେ ଦୋକାନରୁ ଓହ୍ଲାଇ ଦୌଡ଼ି ପଳାଇଥିଲେ। କିନ୍ତୁ ଆକ୍ରମଣକାରୀ ଯୁବକ ମାନେ ତାଙ୍କୁ ଗୋଡ଼ାଇ ଗୋଡ଼ାଇ ହାଣି ଘଟଣାସ୍ଥଳରୁ ଚମ୍ପଟ୍ ମାରିଥିଲେ।
ପରିବାର ଲୋକେ ତାଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରିଥିଲେ ଓ ଚିକିତ୍ସାଧୀନ ଅବସ୍ଥାରେ ବୁବୁଙ୍କୁ ଡ଼ାକ୍ତର ମୃତ୍ୟୁ ଘୋଷଣା କରିଥିଲେ। ଖବର ପାଇ ପୋଲିସ ଡାକ୍ତରଖାନାରେ ପହଞ୍ଚି ଶବ ଜବତ କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରି ଘଟଣାର ତଦନ୍ତ ଆରମ୍ଭ କରିଥିଲା।
ମୃତ ବୁବୁଙ୍କ ଜ୍ୱାଇଁ ଠାରୁ ଅଭିଯୋଗ ପାଇ ଅଭିଯୁକ୍ତ ୧୧ ଜଣଙ୍କ ବିରୋଧରେ ମକଦ୍ଦମା ରୁଜୁ କରି ଘଟଣାର ତଦନ୍ତ ଆରମ୍ଭ କରାଯାଇଥିଲା। କିଛି ଅଭିଯୁକ୍ତଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଥିଲା। ଏହା ମଧ୍ୟରେ ଅଭିଯୁକ୍ତ ଗୋପାଳ ବେହେରା ପାରୋଲରେ ଆସି ଫେରାର ଥିବା ବେଳେ ବାଲାଜୀ ସେଠୀ ଜାମିନରେ ଆସି ଫେରାର ହୋଇଯାଇଛି।
ଅନ୍ୟ ଅଭିଯୁକ୍ତ ମାନଙ୍କ ବିଚାର କରି ବ୍ରହ୍ମପୁର ଅତିରିକ୍ତ ଜିଲ୍ଳା ଜଜ୍ ବିଶ୍ଵଜିତ ଗୌତମ ବିଧାୟକ ରମେଶ ଜେନା, ସନ୍ତୋଷ ପାଣିଗ୍ରାହୀ ଓ ଜଗନ୍ନାଥ ବେହେରାଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି।
ସାକ୍ଷ୍ୟ ପ୍ରମାଣକୁ ଭିତ୍ତି କରି ଅନ୍ୟ ଅଭିଯୁକ୍ତ ସୁନୀଲ ଗୌଡ, ଅନୀଲ ରେଡ଼ି, ଦୀପକ୍ ସିଂ ଓ ରବି ମହାକୁଡ଼କୁ ଆଜୀବନ କାରାଦଣ୍ଡ ଆଦେଶ ଶୁଣାଇଛନ୍ତି। ଅନ୍ୟ ଅଭିଯୁକ୍ତ ମାନଙ୍କର ବିଚାର ପରେ ହେବ ବୋଲି ସୁଚନା ମିଳିଛି।