(କୈଳାଶ ଚନ୍ଦ୍ର ଚୌଧୁରୀ, ବ୍ରହ୍ମପୁର): ଧରାକୋଟ ଥାନା ଅର୍ନ୍ତଗତ ଢଉ ଗାଁ ଛକରେ ଦୁଇ ଯୁବକ ବନ୍ଧୁକ କାରବାର କରୁଥିବା ବେଳେ ଦୁଇ ଯୁବକଙ୍କୁ ପୋଲିସ ଗିରଫ କରିଛି। ଉଭୟଙ୍କ ଠାରୁ ଦେଶୀ ବନ୍ଧୁକ ସହ ଜୀବନ୍ତ ଗୁଳି ଜବତ କରାଯାଇଛି।
ବିଶ୍ୱସ୍ତ ସୂତ୍ରରୁ ଖବର ପାଇ ଥାନା ଅଧିକାରୀ ଚନ୍ଦ୍ରିକା ସ୍ବାଇଁଙ୍କ ନିର୍ଦ୍ଦେଶନାରେ ଅତିରିକ୍ତ ନୀରିକ୍ଷକ ଅଞ୍ଜଳି ବେହେରା ଓ ଏସ୍ ଆଇ ସସ୍ମିତା ପଣ୍ଡା ଅନ୍ୟ କର୍ମଚାରୀଙ୍କ ସହ ଚଢାଉ କରିଥିଲେ। ଘଟଣାସ୍ଥଳରୁ ଉମେଶ ପାତ୍ର ଓ ଅମର ସାହୁଙ୍କୁ କାବୁ କରି ଜେରା କରିଥିଲେ। ସେହି ସମୟରେ ଉଭୟଙ୍କଠାରୁ ଗୋଟିଏ ଦେଶୀ ବନ୍ଧୁକ, ଦୁଇଟି ଜୀବନ୍ତ ଗୁଳି ଓ ଗୋଟିଏ ଦାମୀ ମୋବାଇଲ ଫୋନ ଜବତ କରିଥିଲେ।
ଆସ୍କା ଥାନା ଅଞ୍ଚଳର ଉକ୍ତ ଦୁଇ ଯୁବକ ପୁରୁଣା ଅପରାଧୀ ଏବଂ ଉମେଶ ନାମରେ ଆସ୍କା ଥାନାରେ ୪ ଟି ଅପରାଧ ମାମଲା ଓ ଅମର ସାହୁ ନାମରେ ୬ ଟି ସଙ୍ଗୀନ ମାମଲା ଥିବା ଜଣାପଡ଼ିଛି। ଥାନା ପୋଲିସ୍ ଉକ୍ତ ଦୁଇ ଯୁବକ ଦ୍ୱୟଙ୍କୁ ଭାରତୀୟ ନ୍ୟାୟ ସଂହିତା ଦଫା ଅନୁଯାୟୀ ମାମଲା ନଂ ୬୧/୬୨ ରୁଜୁ କରି କୋର୍ଟ ଚାଲାଣ କରିଛି।