ରେଢ଼ାଖୋଲ (କନ୍ଦର୍ପ ବେହେରା): ରେଢ଼ାଖୋଲ ଅଂଚଳର ଜଣେ ରଙ୍ଗିଲା ବାବା ନିରୀହ ଯୁବତୀଙ୍କୁ ଦୁଷ୍କର୍ମ କରିଥିବା ଅଭିଯୋଗରେ ମାନ୍ୟବର କୋର୍ଟ କୋଡିଏ ବର୍ଷ ସଶ୍ରମ କାରାଦଣ୍ଡାଦେଶ ଦେଇଛନ୍ତି।
ପ୍ରକାଶ ଯେ, ସମ୍ବଲପୁର ଜିଲ୍ଲା ରେଢ଼ାଖୋଲ ବ୍ଲକ ଅନ୍ତର୍ଗତ ଲୁହାପଙ୍କ ଗ୍ରାମ ପଞ୍ଚାୟତ ସ୍ଥିତ ବୈଷ୍ଣବଝୁଲି ଗ୍ରାମରେ ୫୩ ବର୍ଷୀୟ ବାବା ପ୍ରଫୁଲ୍ଲ ମହଲା ରହି ଆସୁଥିଲେ। ଗତ ୫ ଡିସେମ୍ବର ୨୦୨୪ ମସିହାରେ ଚାରମାଳ ଥାନା ଅଞ୍ଚଳର ଜଣେ ଯୁବତୀ ବାବାଙ୍କ ପାଖକୁ ମନସ୍କାମନା ପୂର୍ଣ୍ଣ କରିବା ପାଇଁ ଆସିଥିଲେ। ମଠ ପରିସରରେ କେହି ନ ଥିବା ବେଳେ ଏହାର ସୁଯୋଗ ନେଇ ନିରୀହ ଯୁବତୀ ଜଣଙ୍କୁ ରଙ୍ଗିଲା ପ୍ରଫୁଲ୍ଲ ବାବା କୌଣସି ଏକ ଔଷଧ ଖାଇବା ପାଇଁ ଦେଇଥିଲେ। ଯୁବତୀ ଜଣଙ୍କ ଔଷଧ ଖାଇବା ପରେ ଅଚେତ ହୋଇ ଯାଇଥିଲେ। ଏହା ପରେ ବାବା ଜଣଙ୍କ ଅଚେତ୍ ଅବସ୍ଥାରେ ଯୁବତୀଙ୍କୁ ଦୁଷ୍କର୍ମ କରିଥିଲେ। ଏଥିରେ ଯୁବତୀ ଜଣଙ୍କ ଚେତା ଫେରିବା ପରେ ରକ୍ତସ୍ରାବ ଦେଖି ଦୁଷ୍କର୍ମ ହୋଇଥିବା ଜାଣିପାରିଥିଲା।
ଯୁବତୀ ଜଣଙ୍କ ଏକ ଅଟୋ କରି ରେଢ଼ାଖୋଲ ଉପଖଣ୍ଡ ଚିକିତ୍ସାଳୟକୁ ପହଞ୍ଚି ଚିକିତ୍ସାଳୟ ଗେଟ୍ ପାଖରେ ପୁଣି ଅଚେତହୋଇ ଯାଇଥିଲେ। ସ୍ଥାନୀୟ ଲୋକେ ଉଦ୍ଧାର କରି ନେଇ ଚିକିତ୍ସାଳୟରେ ଚିକିତ୍ସିତ କରିଥିଲେ। ଏଥିରେ ଯୁବତୀ ଜଣଙ୍କ ଚିକିତ୍ସିତ ଅବସ୍ଥାରେ ରହି ଡାକ୍ତରୀ ମାଇନା କରାଯାଇଥିଲା। ଏହା ରେଢ଼ାଖୋଲ ପୋଲିସ ଜାଣିବା ପରେ ତତ୍କାଳୀନ ଥାନା ଅଧିକାରୀ ସବିତାଲତା ସେଠୀ ଏବଂ ଏସଡିପିଓ ପ୍ରଶାନ୍ତ କୁମାର ମେହେର ଯୁବତୀଙ୍କ ପାଖରେ ପହଞ୍ଚି ପଚରାଉଚରା ପରେ ଅଭିଯୋଗ କ୍ରମେ ଉକ୍ତ ବାବାଙ୍କୁ ଗିରଫ କରି ରେଢ଼ାଖୋଲ ପୋଲିସ ଏ ସଂକ୍ରାନ୍ତରେ କେସ ନଂ ୨୮୬/୨୪ ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରି ଅଭିଯୁକ୍ତ ରଙ୍ଗିଲା ବାବାକୁ କୋର୍ଟ ଚାଲାଣ କରିଥିଲା।
ରେଢ଼ାଖୋଲ ଏଡିଜେ କୋର୍ଟ ବିଚାରପତି ପାର୍ଥ ସାରଥୀ ପଟ୍ଟନାୟକ ୨୧ ଜଣ ସାକ୍ଷଙ୍କ ବୟାନ ରେକର୍ଡ କରି ୨୦ ବର୍ଷ ସଶ୍ରମ କାରାଦଣ୍ଡ ସହ ଦଶ ହଜାର ଟଙ୍କା ଜୋରିମାନା ଦେବା ସହ ଜିଲ୍ଲା ଆଇନ ସେବା ପ୍ରାଧିକରଣକୁ ପୀଡ଼ିତା ଙ୍କୁ ଆର୍ଥିକ ସହାୟତା ପ୍ରଦାନ ପାଇଁ ନିର୍ଦ୍ଦେଶ ଦେଇଛନ୍ତି।