ମୟୂରଭଞ୍ଜ: ମୟୂରଭଞ୍ଜ ଜିଲ୍ଲାର ମହୁଲଡିହା ଥାନା ଅନ୍ତର୍ଗତ ତରାମରା ଗ୍ରାମପଞ୍ଚାୟତର ଡକେଇପାଳ ଗ୍ରାମରେ ଘଟିଛି ଏକ ଚାଞ୍ଚଲ୍ୟକର ଦ୍ୱୈତ ହତ୍ୟାକାଣ୍ଡ। ଘର ଭିତରୁ ମା’ ଓ ୮ ବର୍ଷର ଝିଅଙ୍କ ମୃତଦେହ ଉଦ୍ଧାର ହୋଇଥିବାବେଳେ ଘଟଣା ପରେ ଅଭିଯୁକ୍ତ ଫେରାର ଥିବା ସୂଚନା ମିଳିଛି।
ମୃତକାମାନେ ହେଲେ ସୀତାମଣି ଟୁଡୁ (୩୦) ଏବଂ ତାଙ୍କ ୮ ବର୍ଷର ଝିଅ ଜବାମଣି ଟୁଡୁ।
ସୂଚନା ଅନୁସାରେ, ସୀତାମଣିଙ୍କ ସ୍ୱାମୀ ଚୈତନ୍ୟ ଟୁଡୁ ସକାଳ ପ୍ରାୟ ୧୦ଟାରେ କାମରେ ବାହାରକୁ ଯାଇଥିଲେ। ଦିନ ପ୍ରାୟ ୨ଟାରେ ଘରକୁ ଫେରିବା ପରେ ସମସ୍ତ କବାଟ ବନ୍ଦ ଥିବା ଦେଖିଥିଲେ। ବହୁ ଡାକିବା ସତ୍ତ୍ୱେ କୌଣସି ସୋରଶବ୍ଦ ନମିଳିବାରୁ ସେ ସିଡ଼ି ସାହାଯ୍ୟରେ ସ୍କାଏଲାଇଟ ଦେଇ ଘର ଭିତରକୁ ଦେଖିଥିଲେ।
ପରେ ଘର ଭିତରକୁ ପ୍ରବେଶ କରି ସ୍ତ୍ରୀ ଓ ଝିଅଙ୍କୁ ରକ୍ତାକ୍ତ ଅବସ୍ଥାରେ ପଡ଼ିଥିବା ଦେଖିଥିଲେ। ପ୍ରାଥମିକ ସୂଚନା ଅନୁସାରେ, ଜବାମଣିଙ୍କ ବେକକୁ ଧାରୁଆ ଅସ୍ତ୍ରରେ କାଟି ହତ୍ୟା କରଯାଇଥିବାର ଦେଖିଥିଲେ ।
ଖବର ପାଇ କରଞ୍ଜିଆ ଉପଖଣ୍ଡ ପୁଲିସ ଅଧିକାରୀ ନବକୃଷ୍ଣ ନାଏକ, ମହୁଲଡିହା ଥାନା ଅଧିକାରୀ ତୁଷାର ନାୟକ ଓ ପୁଲିସ ଟିମ୍ ଘଟଣାସ୍ଥଳରେ ପହଞ୍ଚି ଶବ ଜବତ କରିଛନ୍ତି। ସାଇଣ୍ଟିଫିକ ଟିମ୍ ଘଟଣାସ୍ଥଳରେ ତଦନ୍ତ କରିବା ପରେ ମୃତଦେହକୁ ବ୍ୟବଛେଦ ପାଇଁ ପଠାଯିବ।
ପୁଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି । ତେବେ ହତ୍ୟାକାଣ୍ଡର ପ୍ରକୃତ କାରଣ ଏବଂ ଅଭିଯୁକ୍ତଙ୍କ ପରିଚୟ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।