ବାଣପୁର: ମଙ୍ଗଳବାର ଦିନ ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ସାନସିରେଇପୁର ଗ୍ରାମର ଏକ ଫୌଜଦାରୀ ମାମଲା ଯାହାର ଏସଟି କେସ ନମ୍ବର ୧୫/୬୬,୨୩/୨୨ କୁ ବିଚାରକରି ବାଣପୁର ସହକାରୀ ଦୌରା ଜଜ ଅମରେଶ ମହାପାତ୍ର ଅଭିଯୁକ୍ତ ସିଲୁ ପ୍ରଧାନଙ୍କୁ ଆଇପିସି ଦଫା ୩୨୬ ଓ ଦଫା ୩୦୭ ରେ ଦୋଷୀ ସାବ୍ୟସ୍ତ କରିବା ସହ ୩୦୭ ଦଫାରେ ଛଅ ବର୍ଷର ସଶ୍ରମ କାରାଦଣ୍ଡ ସହିତ ତିରିଶ ହଜାର ଟଙ୍କା ଜରିମାନା ପ୍ରଦାନ କରିଛନ୍ତି।
ସୂଚନା ମୁତାବକ, ୧୦.୦୨.୨୦୨୨ ତାରିଖରେ ସାନସିରେଇପୁର ଗ୍ରାମର ଅଭିମନ୍ୟୁ ଜେନାଙ୍କ ପୁତ୍ର ତପନ ଜେନା ଏକ ଗ୍ୟାରେଜରେ କାର୍ଯ୍ୟରତ ଥିବାବେଳେ ଅଭିଯୁକ୍ତ ସିଲୁ ପ୍ରଧାନ ଲୁହା ହାତୁଡିରେ ତପନଙ୍କ ମସ୍ତିଷ୍କକୁ ପଛପଟୁ ଶକ୍ତ ପ୍ରହାର କରିଥିଲେ। ଯାହାଫଳରେ ପ୍ରଚୁର ରକ୍ତସ୍ରାବ ହୋଇ ଘଟଣାସ୍ଥଳରେ ତପନ ସଂଜ୍ଞାହୀନ ହୋଇ ତଳେ ପଡିଯାଇଥିଲେ। ମରଣାନ୍ତକ ଆକ୍ରମଣ ପ୍ରତିବାଦରେ ତପନଙ୍କ ପିତାଙ୍କ ପକ୍ଷରୁ ବାଣପୁର ଥାନାରେ କେସ ନମ୍ବର ୬୨/୨୨ ରେ ମାମଲା ରୁଜୁ ହୋଇଥିଲା ଏବଂ ପରବର୍ତ୍ତୀ ସମୟରେ ବାଣପୁର କୋର୍ଟରେ ଉକ୍ତ ମାମଲାର ବିଚାର ଜାରି ରହିଥିବା ବେଳେ ମଙ୍ଗଳବାର ଦିନ ଏହାର ରାୟ ପ୍ରକାଶ ପାଇଛି।
ଅଭିଯୋଗକାରୀଙ୍କ ପକ୍ଷରୁ ୧୧ ଜଣଙ୍କ ସାଖ୍ୟ ପ୍ରମାଣ ଗ୍ରହଣ ଏବଂ ସିସିଟିଭି ଦୃଶ୍ୟ ଆଧାରରେ ହତ୍ୟା ଉଦ୍ୟମ ଏବଂ ଗୁରୁତର ଆଘାତ ଅଭିଯୋଗ ସତ୍ୟ ପ୍ରମାଣିତ ହେବାରୁ ଉକ୍ତ ଦଣ୍ଡାଦେଶ ଜାରି କରିଛନ୍ତି ବିଚାରପତି ଶ୍ରୀ ମହାପାତ୍ର। ସରକାରଙ୍କ ତରଫରୁ ଉକ୍ତ ମାମଲାକୁ ସରକାରୀ ଓକିଲ ସଚ୍ଚିତ ମିଶ୍ର ଏବଂ ରମେଶ ବିଷୋୟୀ ପରିଚାଳନା କରୁଥିଲେ।