ସୀତାରାମ ଅଗ୍ରୱାଲ
ବାଲୁଗାଁ: ଖୋର୍ଦ୍ଧା ଜିଲ୍ଲା ବାଲୁଗାଁ ଥାନା ଅନ୍ତର୍ଗତ ନାଭାଲ ଫାଣ୍ଡି ପାଖରେ ଏକ ସଡ଼କ ଦୁର୍ଘଟଣା ଘଟିଯାଇଛି। ଉକ୍ତ ଦୁର୍ଘଟଣାରେ ଚାରି ଜଣ ଆହତ ହୋଇଥିବାସ୍ଥଳେ ଦୁଇଜଣଙ୍କ ଅବସ୍ଥା ଗୁରୁତର ଅଛି। ସୂଚନା ମୁତାବକ ଆଜି ସକାଳ ପାଖାପାଖି ୧୧ ଘଟିକା ସମୟରେ ଏହି ଦୁର୍ଘଟଣା ଘଟିଛି।
ମିଳିଥିବା ସୂଚନା ଅନୁସାରେ ନାଭାଲ ଛକ ଗୁରୁଦ୍ୱାର ନିକଟରେ ଏହି ଦୁର୍ଘଟଣା ଘଟିଛି। ବାଲୁଗାଁ ଗାନ୍ଧୀ ନଗରର ଅକ୍ଷୟ ପରିଡ଼ା ତାଙ୍କ ପିଉସୀ ଉମା ଜେନାଙ୍କୁ ସାଇକେଲରେ ବସାଇ ବାଲୁଗାଁରୁ ନାଭାଲ ଅଭିମୁଖେ ଜାତୀୟ ରାଜପଥରେ ଯାଉଥିବା ସମୟରେ ଏକ କାର୍ ପଛପଟୁ ଧକ୍କା ଦେଇଥିଲା। ଭୁବନେଶ୍ୱରରୁ ଆନ୍ଧ୍ରା ଫେରୁଥିବା ଏପି.୩୦ ଏ.ଆର ୮୯୨୫ ନମ୍ବର ବିଶିଷ୍ଟ ଏକ କାର ଅକ୍ଷୟଙ୍କୁ ପଛପଟୁ ଧକା ଦେଇଥିଲା। ଫଳରେ ଅକ୍ଷୟ ଏବଂ ଉମା ସାଇକେଲରୁ ଛିଟିକି ପଡ଼ି ଗୁରୁତର ଆହତ ହେବା ସହ କାରଟି ମଧ୍ୟ ଭାରସାମ୍ୟ ହରାଇ ରାସ୍ତା କଡ଼କୁ ଖସିପଡିଥିଲା। କାର ଚାଳକଙ୍କ ନାମ ଲୋକେଶ୍ୱର ରାଓ ଏବଂ ସେଥିରେ ତାଙ୍କ ସମ୍ପର୍କୀୟ ଉପେନ୍ଦ୍ର ରାଓ ଉପସ୍ଥିତ ଥିଲେ। ଉଭୟଙ୍କ ଘର ଆନ୍ଧ୍ରପ୍ରଦେଶର ଶ୍ରୀକାକୁଲମ ଜିଲ୍ଲା ଅନ୍ତର୍ଗତ ଟେକିଲି ଗ୍ରାମ ବୋଲି ଜଣାପଡିଛି। କାର ଚାଳକ ତାଙ୍କ ଭଉଣୀଙ୍କୁ ଭୁବନେଶ୍ୱର ରେଳ ଷ୍ଟେସନ ଛାଡି ନିଜ ଗ୍ରାମ ଟେକିଲିକୁ ଯାଉଥିବାବେଳେ ଏହି ଦୁର୍ଘଟଣା ଘଟିଥିଲା।
ଖବର ପାଇ ବାଲୁଗାଁ ଅଗ୍ନିଶମ ଅଧିକାରୀ ନିତ୍ୟାନନ୍ଦ ଜେନା ଏବଂ ନାଭାଲ ଫାଣ୍ଡି ଅଧିକାରୀ ଗୋବିନ୍ଦ ଗୌଡ଼ ଘଟଣାସ୍ଥଳରେ ପହଞ୍ଚି ସମସ୍ତ ଚାରି ଜଣ ଆହତଙ୍କୁ ଉଦ୍ଧାର କରି ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଇଛନ୍ତି। ସାଇକେଲ ଚାଳକ ଅକ୍ଷୟଙ୍କ ଡାହାଣ ଗୋଡ଼ ଭାଙ୍ଗିଯାଇଥିବାବେଳେ ଉମାଙ୍କ ଅବସ୍ଥା ସଙ୍କଟାପନ୍ନ ଅଛି ବୋଲି ସୂଚନା ମିଳିଛି। ଅନ୍ୟପକ୍ଷେ କାର ଚାଳକ ଲୋକେଶ୍ୱର ଏବଂ ଉପେନ୍ଦ୍ରଙ୍କ ଅବସ୍ଥା ସ୍ଥିର ଥିବା ସୂଚନା ମିଳିଛି। ଉକ୍ତ ଦୁର୍ଘଟଣାରେ ସାଇକେଲଟି ସମ୍ପୂର୍ଣ୍ଣ ନଷ୍ଟ ହୋଇଯାଇଥିବା ବେଳେ କାରଟିକୁ ପୋଲିସ ଜବତ କରି ତଦନ୍ତ ଚଳାଇଛି।
