ମୁମ୍ବାଇ, ବଲିଉଡର ପ୍ରଖ୍ୟାତ ତଥା ଲୋକପ୍ରିୟ କୋରିୟଗ୍ରାଫର ସରୋଜ ଖାନଙ୍କ ଗତକାଲି ରାତିରେ ହୃଦଘାତରେ ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ 71 ବର୍ଷ ବୟସ ହୋଇଥିଲା। ସେ ଗତ ମାସରେ ଶ୍ବାସ ପ୍ରଶ୍ବାସ ନେବାରେ କଷ୍ଟ ଅନୁଭବ କରିଥିଲେ। ଫଳରେ ତାଙ୍କୁ ମୁମ୍ବାଇସ୍ଥିତ ଗୁରୁ ନାନକ ହସପିଟାଲରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କୁ କୋଭିଡ19 ପରୀକ୍ଷା ମଧ୍ୟ କରାଯାଇଥିଲା। ହେଲେ ରିପୋର୍ଟ ନେଗେଟିଭ ଆସିଥିଲା।
ସରୋଜ ବଲିଉଡ ଏବଂ କେତେକ ଆଞ୍ଚଳିକ ଭାଷାର ଚଳଚିତ୍ରରେ କୋରିୟଗ୍ରାଫର ଭାବେ କାମ କରିଛନ୍ତି। ସେ ପ୍ରାୟ ଦୁଇ ହଜାରରୁ ଅଧିକ ଗୀତରେ ନୃତ୍ୟ ସଂଯୋଜନା କରିଛନ୍ତି। ମୁଖ୍ୟତଃ ଶ୍ରୀଦେବୀ ଅଭିନିତ ନାଗୀନା, ମିଃ ଇଣ୍ଡିଆ, ମାଧୁରୀଙ୍କ ଅଭିନିତ ତେଜାବ ପ୍ରଭୃତି ଚଳଚିତ୍ର ପାଇଁ ସେ ବେଶ ଲୋକପ୍ରିୟ। ସରୋଜ ଖାନ 1974 ମସିହାରେ ଗୀତା ମେରା ନାମ ଚଳଚିତ୍ରରୁ ନିଜର କ୍ୟାରିୟର ଆରମ୍ଭ କରିଥିଲେ।
ତାଙ୍କ ବିୟୋଗରେ ପୁରା ଚଳଚିତ୍ର ଜଗତରେ ଶୋକର ଛାୟା ଖେଳିଯାଇଛି।