ଭୁବନେଶ୍ୱର: ଜଗତସିଂହପୁର ଜିଲ୍ଲାର ତିର୍ତ୍ତୋଲ ବିଧାନସଭା ଆସନ ସବୁବେଳେ ଚର୍ଚ୍ଚାର କେନ୍ଦ୍ରରେ ରହିଛି। ଏହି ଆସନରୁ ନିଶାମଣି ଖୁଣ୍ଟିଆ, ପ୍ରତାପ ଚନ୍ଦ୍ର ମହାନ୍ତି ଓ ବସନ୍ତ କୁମାର ବିଶ୍ୱାଳଙ୍କ ଭଳି ନେତାମାନେ ବିଧାନସଭାକୁ ବାରମ୍ବାର ନିର୍ବାଚିତ ହୋଇ ସବୁବେଳେ ରାଜନୀତିକ ଚର୍ଚ୍ଚାରେ ରହିଥିଲେ। ଏବର ବିଧାୟକ ମଧ୍ୟ ଚର୍ଚ୍ଚାରେ ଭିନ୍ନ କାରଣରୁ ରହିଛନ୍ତି।
ବିଧାୟକମାନଙ୍କ ଭଳି ଏହି ନିର୍ବାଚନ ମଣ୍ଡଳୀଟି ମଧ୍ୟ ଏବେ ଚର୍ଚ୍ଚାରେ ରହିଛି। କାରଣ ଏହି ବିଧାନସଭା ଆସନରୁ ଆଗାମୀ ନିର୍ବାଚନ ଲଢ଼ିବା ପାଇଁ ବିଜେଡି ଓ ବିଜେପିର ବହୁ ନେତାମାନଙ୍କ ସମେତ ତିନିଜଣ ପୂର୍ବତନ ସାଂସଦ ଆଗ୍ରହ ପ୍ରକାଶ କରିଥିବା ଜଣାପଡ଼ିଛି। ସେମାନେ ହେଲେ ଶାସକ ଦଳ ବିଜେଡିର ବର୍ତ୍ତମାନର ସାଂସଦ ଡା. ରାଜଶ୍ରୀ ମଲ୍ଲିକ, ଦଳର ପୂର୍ବତନ ସାଂସଦ ଡ. କୁଳମଣି ସାମଲ ଓ ଗତଥର ବିଜେପି ଟିକଟରେ ଲୋକସଭା ନିର୍ବାଚନ ଲଢ଼ିଥିବା ପୂର୍ବତନ ସାଂସଦ ବିଭୁପ୍ରସାଦ ତରାଇ।
ଏହି ନିର୍ବାଚନ ମଣ୍ଡଳୀର ବିଧାୟକ ବିଷ୍ଣୁ ଦାସଙ୍କ ଦେହାନ୍ତ ପରେ ୨୦୨୦ରେ ତାଙ୍କ ପୁତ୍ର ବିଜୟଶଙ୍କର ଦାସ ଉପନିର୍ବାଚନରେ ପ୍ରାର୍ଥୀ ହୋଇ ବିଜୟ ଲାଭ କରିଥିଲେ। ନିର୍ବାଚନ ପରଠାରୁ ବର୍ତ୍ତମାନର ବିଧାୟକ ବିଜୟଶଙ୍କର ଦାସ ବିବାଦରେ ଛନ୍ଦି ହୋଇପଡ଼ିଥିବାରୁ ତାଙ୍କୁ ଆଗାମୀ ନିର୍ବାଚନରେ ଦଳ ପକ୍ଷରୁ ଆଉ ପ୍ରାର୍ଥୀ କରାଯିବ ନାହିଁ ବୋଲି ରାଜନୀତିକ ମହଲରେ ଆଲୋଚନା ହେଉଛି। ଏହାକୁ ଆଖି ଆଗରେ ରଖି ବର୍ତ୍ତମାନ ସାଂସଦ ତଥା ସେଠାକାର ପୂର୍ବତନ ବିଧାୟିକା ଡା. ରାଜଶ୍ରୀ ମଲ୍ଲିକ ପୁଣିଥରେ ବିଧାନସଭା ନିର୍ବାଚନ ଲଢ଼ିବା ପାଇଁ ଦଳୀୟ କର୍ତ୍ତୃପକ୍ଷଙ୍କ ନିକଟରେ ନିଜର ମତ ଜଣାଇ ଦେଇଥିବା କୁହାଯାଉଛି।
ସେହିପରି ୨୦୧୪ର ବିଜେଡି ସାଂସଦ ଡ. କୁଳମଣି ସାମଲ ମଧ୍ୟ ପ୍ରାର୍ଥୀ ହେବାକୁ ଲବି ଚଳାଇଥିବା କୁହାଯାଉଛି। ଏଠାରୁ ଅନ୍ୟମାନଙ୍କ ମଧ୍ୟରେ ବିଜେପି ଛାଡ଼ି ବିଜେଡିରେ ସାମିଲ ହୋଇଥିବା ଡ. ରମାକାନ୍ତ ଭୋଇ, ମହିଳା କମିସନ ଅଧ୍ୟକ୍ଷା ମିନତୀ ବେହେରା, ତିର୍ତ୍ତୋଲ ବ୍ଲକ୍ ଅଧ୍ୟକ୍ଷ ମନୋଜ କୁମାର ବେହେରା, ଜିଲ୍ଲାପରିଷଦ ସଭାପତି ମନୋଜ ଭୋଇ, କଂଗ୍ରେସ ଛାଡ଼ି ବିଜେଡିରେ ଯୋଗ ଦେଇଥିବା ତିର୍ତ୍ତୋଲ ବ୍ଲକ୍ର ଅଧ୍ୟକ୍ଷ ଦେବେନ୍ଦ୍ର କୁମାର ମଲ୍ଲିକ ପ୍ରମୁଖଙ୍କ ନାଁ ବି ବିଜେଡି ଟିକେଟ ଆଶାୟୀ ତାଲିକାରେ ରହିଛି।
ବିଜେପି ଏହି ଆସନରୁ କେବେବି ଜିତି ପାରିନାହିଁ। ବିଗତ ୩ଟି ନିର୍ବାଚନ ଓ ଗୋଟିଏ ଉପ ନିର୍ବାଚନ ମଧ୍ୟରୁ ୨୦୧୯ ନିର୍ବାଚନରେ ବିଜେପି ପ୍ରାର୍ଥୀ ଡ. ରମାକାନ୍ତ ଭୋଇ ଓ ୨୦୨୦ ଉପ ନିର୍ବାଚନରେ ରାଜକିଶୋର ବେହେରା ପ୍ରାର୍ଥୀ ହୋଇ ଦ୍ୱିତୀୟ ସ୍ଥାନକୁ ଉଠି ପାରିଥିଲେ ହେଁ ସେମାନେ ୪୦ ହଜାରରୁ ଅଧିକ ଭୋଟ ବ୍ୟବଧାନରେ ହାରିଯାଇଥିଲେ। ତେଣୁ ୨୦୦୯ରେ ସିପିଆଇ ଟିକଟରେ ବିଜେଡି-ସିପିଆଇ ମେଣ୍ଟ ପ୍ରାର୍ଥୀଭାବେ ସଂସଦକୁ ନିର୍ବାଚିତ ହୋଇଥିବା ବିଭୁପ୍ରସାଦ ତରାଇ ଏବେ ବିଜେପିରେ ଅଛନ୍ତି। ସେ ୨୦୧୪ ନିର୍ବାଚନ କଂଗ୍ରେସ ଟିକଟ ଓ ୨୦୧୯ ନିର୍ବାଚନରେ ବିଜେପି ପକ୍ଷରୁ ଲୋକସଭା ନିର୍ବାଚନରେ ଲଢ଼ି ପରାଜିତ ହୋଇଛନ୍ତି। ତେଣୁ ସେ ଆଉ ଲୋକସଭା ନିର୍ବାଚନ ନ ଲଢ଼ି ଆଗାମୀ ନିର୍ବାଚନ ତିର୍ତ୍ତୋଲ ବିଧାନସଭା ଆସନରୁ ଲଢ଼ିବାକୁ ଦଳୀୟ କର୍ତ୍ତୃପକ୍ଷଙ୍କୁ ଜଣାଇ ଦେଇଥିବା କୁହାଯାଉଛି। ଅନ୍ୟମାନଙ୍କ ମଧ୍ୟରେ ଆଇନଜୀବୀ ରାଜକିଶୋର ବେହେରା, ସ୍ମିତା ପ୍ରଧାନ, ଇଂ. ପ୍ରକାଶ ଚନ୍ଦ୍ର ଦଳାଇ ପ୍ରମୁଖ ଟିକେଟ ଦୌଡ଼ରେ ରହିଛନ୍ତି।
ଦିନେ ଏହି ବିଧାନସଭା ଆସନଟି କଂଗ୍ରେସର ଗଡ଼ ଭାବରେ ବିବେଚିତ ଥିଲା। ୨୦୦୯ରେ ନୂତନଭାବେ ଗଠନ ହେବାପରେ ଏହି ଆସନକୁ ସଂରକ୍ଷିତ ରଖାଯାଇଛି। ୨୦୦୯ ପରଠାରୁ ଏହି ଆସନରୁ କଂଗ୍ରେସ ବିଜୟୀ ହୋଇପାରିନାହିଁ। କଂଗ୍ରେସ ଏବେ ଏଠାରେ ପ୍ରତିଦ୍ୱନ୍ଦ୍ୱୀତାରେ ୩ୟ ସ୍ଥାନକୁ ଖସି ଆସିଛି। କଂଗ୍ରେସରୁ ୨୦୨୦ ଉପନିର୍ବାଚନରେ ପ୍ରାର୍ଥୀ ହୋଇଥିବା ଯୁବନେତା ହିମାଂଶୁ ଭୂଷଣ ମଲ୍ଲିକ ପୁଣି ସୁଯୋଗ ପାଇବେ ବୋଲି ଆଶା କରାଯାଉଥିବାବେଳେ ପ୍ରତିମା ମଲ୍ଲିକଙ୍କ ନାଁ ମଧ୍ୟ ଚର୍ଚ୍ଚାରେ ରହିଛି।
