ନୂଆପଡାରେ ପ୍ରଚାର: ବର୍ତ୍ତମାନ ନୂଆପ଼ଡା ଉପନିର୍ବାଚନ ନେଇ ରାଜ୍ୟ ରାଜନୀତି ବେଶ ସରଗରମ। ଏହି ନିର୍ବାଚନ ଶାସକ ବିଜେପି ପାଇଁ ଯେତିକି ଗୁରୁତ୍ବପୂର୍ଣ୍ଣ ବିଜେଡି ପାଇଁ ମଧ୍ୟ ସେତିକି ମର୍ଯ୍ୟଦାପୂର୍ଣ୍ଣ। ଏହି ନିର୍ବାଚନରେ କିପରି ନିଜ ପ୍ରାର୍ଥୀ ଜିତିବେ ସେ ନେଇ ତିନି ପ୍ରମୁଖ ଦଳ ଶତଚେଷ୍ଠା କରିବାରେ ଲାଗିଛନ୍ତି। ବର୍ତ୍ତମାନ ସବୁଦଳର ନେତା ଭୁବନେଶ୍ବର ଛାଡି ନୂଆପଡାରେ ଡେରା ପକାଇଛନ୍ତି। ମିନି ଭୁବନେଶ୍ବର ପାଲଟିଛି ନୂଆପଡା।
ତେବେ ଏହି ପ୍ରଚାର ସରଗରମ ଭିତରେ ଏକ ନୂଆ ଖବର ଆସିଛି। ତାହା ହେଲା ଯେ, ବିଜେଡିର ଜଣେ ଆଦିବାସୀ ନେତା ନୂଆପଡାରେ ପ୍ରଚାର ନ କରି ଆମେରିକା ଖସି ପଳାଉଥିଲେ। ଯାହାକୁ ନେଇ ଦଳ ଭିତରେ ବେଶ ଚର୍ଚ୍ଚା ଆଲୋଚନା ହେବାରେ ଲାଗିଲା। କାରଣ ହେଲା ବର୍ତ୍ତମାନ ନୂଆପଡାରେ ଆଦିବାସୀଙ୍କ ନିଜ ପକ୍ଷରେ ନେବାକୁ ତିନି ଦଳ ଚେଷ୍ଠା କରୁଥିବା ବେଳେ ବିଜେଡିର ଏହି ଆଦିବାସୀ ସାଂସଦ ପ୍ରଚାର ନ କରି ଆମେରିକା ଯାଉଥିବାରୁ ଦଳୀୟ ନେତାମାନେ ହଜମ କରିପାରିଲେ ନାହିଁ।
ତେବେ ଯେଉଁ ବିଜେଡି ସାଂସଦଙ୍କ କଥା ଆମେ କହୁଛୁ ସେ ହେଉଛନ୍ତି ନିରଂଜନ ବିଶି। ଏହି ରାଜ୍ୟସଭା ସାଂସଦ ନୂଆପଡା ପ୍ରଚାରରେ ଉପସ୍ଥିତ ନ ରହିବାରୁ ଦଳୀୟ ନେତାମାନେ ନବୀନ ନିବାସକୁ ଖବର ଦେଲେ। ନବୀନ ନିବାସ ଅନ୍ୟତମ ସାଂସଦ ସସ୍ମିତ ପାତ୍ରଙ୍କୁ ତାଙ୍କୁ ଖୋଜି ଆଣିବାକୁ ନିୟୋଜିତ କରାଗଲା। ସସ୍ମିତ ତାଙ୍କ ନେଟୱାର୍କ ଲଗାଇ ଖୋଜିବା ପରେ ଜାଣିଲେ ଯେ, ସେ ମୁମ୍ବାଇରେ ଅଛନ୍ତି। ଆମେରିକା ଯିବା ପାଇଁ ସେଠାରେ ଅପେକ୍ଷା କରିଛନ୍ତି।
ସସ୍ମିତ ପାତ୍ର ନବୀନ ନିବାସକୁ ଏହି ଖବର ଦେଲେ। ସେ କହିଲେ ଯେ ନିରଞ୍ଜନ ବିଶି ସଂସଦୀୟ କମିଟ ଭ୍ରମଣରେ ଆମେରିକା ଯାଉଛନ୍ତି। ଏହାକୁ ନେଇ କୁଆଡେ ନବୀନ ଉତକ୍ଷିପ୍ତ ହେଲେ, ତୁରନ୍ତ ସେଠାରୁ ଫେରିଆସିବାକୁ ନିର୍ଦ୍ଦେଶ ଦିଆଗଲା। ଫଳରେ ସସ୍ମିତ ନିରଞ୍ଜନଙ୍କ ପାଇଁ ଏକ ଫେରନ୍ତା ଟିକେଟ କରି ରାୟପୁରକୁ ଆଣିଲେ। ଏହାପରେ ନିରଞ୍ଜନ ରାୟପୁରରୁ ନୂଆପଡାରେ ପହଞ୍ଚିଥିବାର ଜଣାପଡିଛି।
ତେବେ ନୂଆପଡା ଉପନିର୍ବାଚନ ଚାଲିଥିବା ବେଳେ କଣ ପାଇଁ ନିରଂଜନ ମଇଦାନ ଛାଡି ବିଦେଶ ଯାଉଥିଲେ ସେ ନେଇ ପ୍ରଶ୍ନ ଉଠିଛି। ଯଦି ସେ ଆମେରିକା ଯାଉଥିଲେ ତେବେ ସେ ଦଳର ମୁଖିଆଙ୍କର ଅନୁମତି ନେଇଛନ୍ତି କି ନାହିଁ ତାହା ମଧ୍ୟ ଏକ ଚର୍ଚ୍ଚାର ବିଷୟ ହୋଇଛି।