ଭୁବନେଶ୍ୱର: ରାଜଧାନୀର ସାଂସ୍କୃତିକ କ୍ଷେତ୍ରକୁ ସମୃଦ୍ଧ କରିବାରେ ପ୍ରଖ୍ୟାତ କଣ୍ଠଶିଳ୍ପୀ ଦେବ ଦାସଙ୍କ ଅବଦାନ ଅବିସ୍ମରଣୀୟ। ତାଙ୍କର ଅକାଳ ବିୟୋଗରେ ସଙ୍ଗୀତ କ୍ଷେତ୍ରରେ ବିରାଟ ଶୂନ୍ୟସ୍ଥାନ ସୃଷ୍ଟି ହୋଇଛି ବୋଲି ବିଶିଷ୍ଟ ବ୍ୟକ୍ତିମାନେ ମତପ୍ରକାଶ କରିଛନ୍ତି।
ସ୍ଥାନୀୟ ବୁଦ୍ଧବିହାର ପରିସରରେ ସାଂସ୍କୃତିକ ଅନୁଷ୍ଠାନ ସଂସ୍କତି ଓ ସଂସ୍କୃତି, ମ୍ୟୁଜିକ ସିଜ୍ଲର୍ସ ଓ ଉପାସନା ପକ୍ଷରୁ ଆୟୋଜିତ ଏହି ଶ୍ରଦ୍ଧାଞ୍ଜଳି ସଭାରେ ଭୁବନେଶ୍ୱର ମଧ୍ୟ ବିଧାୟକ ଅନନ୍ତ ନାରାୟଣ ଜେନା, ସୂଚନା କମିଶନର ଦିଲ୍ଲୀପ ବିଶୋଇ, ବରିଷ୍ଠ ସାମ୍ବାଦିକ ପ୍ରଦୋଷ ପଟ୍ଟନାୟକ, ଇଂ କମଳାକାନ୍ତ ମହାନ୍ତି, ପ୍ରସନ୍ନ କୁମାର ସାହୁ, ଦିଲ୍ଲୀପ ହାଲି, ଲକ୍ଷ୍ମୀକାନ୍ତ ପାଲିତ ପ୍ରମୁଖ ମୁଖ୍ୟ ଅତିଥି ଓ ସମ୍ମାନିତ ଅତିଥି ଭାବେ ଯୋଗଦେଇ ସ୍ୱର୍ଗତ ଦେବ ଦାସଙ୍କ ସ୍ମୃତିଚାରଣ କରିଥିଲେ।
ଏହି ଅବସରରେ ଅତିଥିମାନେ କହିଥିଲେ ଦେବ ଦାସ ଜଣେ ସଙ୍ଗୀତ ପ୍ରତି ଉତ୍ସର୍ଗୀକୃତ ମଣିଷ ଥିଲେ । ରାଜଧାନୀ ଭୁବନେଶ୍ୱରରେ ପ୍ରଥମେ ଯେଉଁ କେତେଜଣ ସଙ୍ଗୀତପ୍ରେମୀ ଓ କଣ୍ଠଶିଳ୍ପୀଙ୍କୁ ନେଇ ଅର୍କେଷ୍ଟା ଗଠନ ହୋଇଥିଲା, ସେମାନଙ୍କ ମଧ୍ୟରେ ଦେବ ଦାସ ଥିଲେ ପ୍ରମୁଖ। ସଦାସର୍ବଦା ଅନ୍ୟକୁ ଭଲ ପାଇବା ଓ ଗରିବଙ୍କ ପ୍ରତି ସହାୟତାର ହାତ ବଢାଉଥିବା ମଣିଷ ସେ ଥିଲେ । ସେ ଆଜି ନାହାଁନ୍ତି ସତ, ହେଲେ ସେ ଛାଡ଼ି ଯାଇଥିବା ସଙ୍ଗୀତର ଛାପ ନିଶ୍ଚିତ ଭାବେ ତାଙ୍କୁ ସ୍ମରଣୀୟ କରି ରଖିବ। ମୁକେଶଙ୍କ ଗୀତରେ ସେ ଥିଲେ ମାହିର। ପ୍ରତିବର୍ଷ ରାଜଧାନୀରେ ଏକାଧିକବାର ସଙ୍ଗୀତ କାର୍ଯ୍ୟକ୍ରମ କରି ଲୋକଙ୍କୁ ମନୋରଞ୍ଜନ ଯୋଗାଇ ଦେଉଥିବା ଦେବ ଦାସ ସମସ୍ତଙ୍କ ହୃଦୟରେ ବଞ୍ôଚ ରହିବେ ବୋଲି ଅତିଥିମାନେ ନିଜ ନିଜ ବକ୍ତବ୍ୟରେ ମତବ୍ୟକ୍ତ କରିଥିଲେ।
କମଲ କିରନ, ଗୁଲ୍ଶନ ଓ ଡ. ଜେନାମଣି ସଞ୍ଜୀବ କୁମାରଙ୍କ ସଂଯୋଜନାରେ ଆୟୋଜିତ ଏହି ଶ୍ରଦ୍ଧାଞ୍ଜଳି ସଭାରେ ବିଶିଷ୍ଟ କଣ୍ଠଶିଳ୍ପୀ ଆଦ୍ୟାଶା ଦାସ, ଲୋଭା ବିଶ୍ୱାଳ, ଅବନୀକାନ୍ତ ଦାସ, ପ୍ରଯୋଜକ ଲୁଟୁ ମହାନ୍ତି, ସଂସ୍କୃତି ଓ ସଂସ୍କୃତିର ଉପ ସଭାପତି ରବି ବିଶ୍ୱାଳ, ସୀମା ମହାନ୍ତି, ଶ୍ୱେତା ମିଶ୍ର ତଥା ଦେବଙ୍କ ସୁପୁତ୍ର ସୁରଜ ଦାସ ପ୍ରମୁଖ ତାଙ୍କ ଉଦ୍ଦେଶ୍ୟରେ ସ୍ମତିଚାରଣ କରିଥିଲେ।